ລາວ ຢືນຢັນ ທີ່ກອງປະຊຸມ ບໍ່ມີ AH1N1 ຣະບາດ

ໃນຣະຫວ່າງ ​ກາຣ​ເຂົ້າຮ່ວມ​ປະຊຸມ ຣັຖມົນຕຣີ ສາທາຣະນະ​ສຸ​ຂ ອາຊ໊ຽນ+(ບວກ) 3 ​ເພື່ອ​ສກັດ​ກັ້ນ ​ໄຂ້ຫວັດໝູ​ ທີ່​ບາງກອກ​ ໃນ​ມື້​ວັນ​ທີ່ 7 ພື​ສພາ ​ນີ້​ນັ້ນ ດຣ. ບຸນ​ຫລາຍ ພົມມະ​ສັກ ຫົວໜ້າ​ ຫ້ອງກາຣປະສານ​ງານ​ຕ້ານ ​ແລະ ​ຄວບ​ຄຸມ ພຍາ​ທຕິດ​ຕໍ່​ ກະຊວງ​ສາທາຣະນະ​ສຸຂ ສປປລາວ ​ໄດ້​ກ່າວ ​ຕໍ່​ຜູ້​ສື່​ຂ່າວ​ເອ​ເຊັຽ​ເສຣີ ວ່າ ຍັງ​ບໍ່​ພົບ​ເຫັນ​ມີ​ຜູ້​ຕິດ​ເຊື້ອ​ໂຣຄ ​ແຕ່​ຢ່າງ​ໃດ ​ແຕ່​ກໍ​ມີ​ ກາຣ​ເຝົ້າຣະວັງ ​ຢ່າງ​ໃກ້ຊິດ ​ໂດຽສະ​ເພາະ​ ທີ່​ສນາມ​ບິນ​ວັດ​ໄຕ ຊື່​ງ​ເປັນ​ຈຸດ​ເຣີ່ມຕົ້ນ ຂອງ​ຊ່ອງ​ທາງ​ເຂົ້າ/ອອກ ຣະຫວ່າງ​ປະ​ເທສ ​ເຮັດ​ໃຫ້​ເປັນ​ຈຸດ​ ທີ່​ສ່ຽງ​ຫລາຍ ສະນັ້ນ ຈື່ງ​ຈະ​ມີ​ກາຣກວດ​ ຕາມ​ຜູ້​ໂດຽສາຣ ຫລາຍ​ເພີ່ມ​ຂື້ນ ດັ່ງ​ທີ່​ ທ່ານ​ໄດ້​ໃຫ້ກາຣອະທິບາຍ​ ວ່າ:

“ອັນ​ໜື່ງ​ແລ້ວ ​ແມ່ນ​ຕື່ມ​ແບບ form ຈາກ​ນັ້ນ​ແລ້ວ ​ກໍ inform ​ເຂົາ​ເຈົ້າ ​​ເວລາ​ເຂົາ​ເຈົ້າ ພັກ​ຢູ່ (​ໃສ) ທີ່​ໄໜ່ ​ຖ້າ​ມີ​ອາກາຣ ສົງສັຍ ​ມີ​ໄຂ້ ມີ​ໄອ ​ແໜ້ນ​ໜ້າ​ເອິກ ຂີ້ມູກ​ໄຫລ​ເໝືອນ​ໄຂ້ ​ດັ່ງ​ຫວັດກໍ ​ເຮົາ​ກໍ​ບອກ​ສະຖານ​ທີ່ ​ຫລື ​ເບີ​ໂທຣະສັພ​ ໃຫ້​ເຂົາ​ຮູ້​ ແລ້ວ​ກໍ contact ​ແລ້ວ​ກໍ​ພວກ​ເຮົາ ​ກໍ​ມີ​ແພ​ທໝໍ​ ກຽມ​ເນາະ ​ແລະ​ ກໍ​ມີ hot line #166 ດ້ວຍ”

ນອກຈາກ​ ກາຣ​ເຝົ້າຣະວັງ ​ແລ້ວນັ້ນ ທາງ​ກາຣ ສປປລາວ ຍັງ​ໄດ້ເຣັ່ງ ດ້ານ​ປະຊາ​ສັມພັນ​ ໃຫ້​ຄວາມ​ຮູ້​ແກ່​ປະຊາຊົນ ​ເພື່ອ​ບໍ່​ໃຫ້​ແຕກ​ຕື່ນ ກັບ​ສະຖານະ​ກາຣ ທີ່​ເກີດ​ຂື້ນ ​ແຕ່​ຢ່າງ​ໃດ ​ເພາະ​ບໍ່​ຮ້າຍ​ແຮງ ​ຢ່າງ​ທີ່​ຄິດ​ໄວ້​ນັ້ນ​ ​ແລະ​ ໂດຽສະ​ເພາະ ​ກໍ​ສາມາດ ​ປ້ອງ​ກັນ​ໄດ້​ ຖ້າ​ຫາກ​ຮູ້ຈັກ ​ວິທີ​ອະນາມັຍ​ ເຊັ່ນ: ​ກາຣລ້າງ​ມື ​ໃຫ້​ສະອາດ ຫລື ​​ເອົາ​ຜ້າ​ປິດ​ດັງ ​ຫາກ​ວ່າ ​ຕ້ອງ​ໄດ້​ເຮັດ​ວຽກ​ງານ ​ຫລື ​ສັມຜັສ​ໃກ້ຊິດ​ ກັບ​ຜູ້​ທີ່​ ສົງສັຍ​ນັ້ນ. ພ້ອມ​ດຽວ​ກັນ​ນີ້ ​ທ່ານ​ກໍ​ວ່າ ຍ້ອນ​ທາງ​ກາຣລາວ ​ໄດ້​ຜ່ານ​ກາຣ​ເຝົ້າຣະວັງ ​ກາຣຣະບາດ​ ຂອງ​ໄຂ້​ຫວັດ​ນົກ​ແລະ ​ໂຣຄ SARS ມາກ່ອນ​ແລ້ວ ຈື່ງ​ຄາດ​ວ່າ ​ມີ​ກາຣຕຣຽມພ້ອມ ​ໃນ​ທົ່ວ​ປະ​ເທສ ດັ່ງທີ່​ທ່ານ​ ໄດ້​ກ່າວ​ເພີ່ມ​ອີກ​ວ່າ:

“​ເຮົາມີ​ແຜນ​ຕອບ​ໂຕ້​ ກາຣຣະບາດ​ໃຫຍ່ ສມັຍ H5N1 ຕອນ​ນີ້ ​ກໍ​ມາ​ໃຊ້​ເລີຽ ​ເມື່ອ​ກ່ອນໆ​ ກໍ​ມີ​ຢູ່​ແລ້ວ ​ແຕ່​ວ່າ train ​ເຂົາ ​ເປັນຕົ້ນວ່າ​ ໃນ​ກໍຣະນີ AH1N1 ນີ້ ມັນ case division ມັນ​ປ່ຽນ​ເປັນ​ອະ​ໄຣບ້າງ ຢ່າງ​ນັ້ນກໍ train ​ເຂົາ​ໄປ ທັງ​ໝົດ ພວກ​ເຮົາ ​ກໍ​ມີ​ຢູ່​ປະມານ ປັຈຈຸ​ບັນ​ນີ້ກວ່າ 5,000 ​ໂດ​ສ໌​ເນາະ ຖື​ວ່າ​ພຽງພໍ​ກັບ​ຄວາມ​ຕ້ອງກາຣ”