ອະນາໄມໂລກ ຊ່ວຍຢາປ້ອງກັນ ໄຂ້ຫວັດໝູ

ສປປລາວ ໄດ້ຮັບຢາສັກ ປ້ອງກັນ ເຊື້ອໂຣກໄຂ້ຫວັດໝູ ສາຍພັນ H1N1 ຈາກການຊ່ອຍເຫລືອ ຂອງປະເທດ ອອສເຕຣເລັຍ ຜ່ານອົງການ ອະນາໄມໂລກ ແລ້ວ. ພິທີມອບຢາ ຈາກສະຖານທູດ ອອສເຕຣເລັຍ ໃຫ້ຣັຖບານ ສປປລາວ ໄດ້ຈັດຂື້ນໃນ ມື້ວັນຈັນ ທີ 15 ມີນາ 2010 ຜ່ານມາ. ເຈົ້າໜ້າທີ່ກະຊວງ ສາທາຣະນະສຸຂ ຜູ້ນຶ່ງເວົ້າກ່ຽວກັບ ເຣື້ອງນີ້ວ່າ:

"ຫາກໍ່ໄດ້ຮັບ ມື້ວານນີ້ ຫາກໍ່ຈັດພິທີຮັບ ມື້ວານນີ້ມີ 6 ແສນກວ່າ ໂດສເນ໋າະ ທາງໂຄງການສັກຢາ ກັນພຍາດ ຂະເຈົ້າກໍຄົງ ຈະເລີ້ມສັກໃຫ້ ກຸ່ມທີ່ມີຄວາມສ່ຽງ".

ທ່ານເວົ້າ ຕື່ມວ່າ ກຸ່ມຄົນທີ່ມີຄວາມສ່ຽງ ຈະຕ້ອງໄດ້ສັກຢາ ກ່ອນກໍມີ ພວກນາຍໝໍນາງໝໍ ທີ່ເຮັດວຽກໃກ້ຊິດ ກັບຜູ້ປ່ວຍ, ພວກແມ່ຍິງ ທີ່ຖືພາ, ຄົນປ່ວຍທີ່ເປັນໂຣກ ຊໍາເຮື້ອ, ຊຶ່ງຈຳນວນທັງໝົດ ຂອງພວກທີ່ມີ ຄວາມສ່ຽງເຫລົ່ານີ້ ຈະຢູ່ໃນປະມານ 6 ແສນຄົນພໍດີ.

ສຳລັບການ ແຈກຢາຍຢາ ໃຫ້ປະຊາຊົນ ກໍຈະແຈກຢາຍ ຜ່ານໂຄງການສັກຢາ ກັນພຍາດທີ່ມີ ຢູ່ໃນທຸກໆແຂວງ. ສ່ວນຜູ້ທີ່ຕົກ ຢູ່ໃນເປົ້າໝາຍ ຄວາມສ່ຽງກໍໄປ ຮັບການ ສັກຢາ ຕາມສະຖານ ບໍລິການ ສາທາຣະນະສຸຂ ຕ່າງໆ ໃກ້ບ້ານຂອງຕົນໄດ້ ໃນໄວໆນີ້. ທ່ານເວົ້າເຖິງ ສະຖານະການ ໄຂ້ຫວັດໝູ ສາຍພັນ H1N1 ໃນສປປລາວ ໃນຂະນະນີ້ວ່າ:

"ດຽວນີ້ມັນກໍບໍ່ໄດ້ ເພີ້ມຂື້ນເນ໋າະ ບໍ່ໄດ້ເພີ້ມຂື້ນ ຫລາຍ ເພາະດຽວນີ້ມັນ ກໍມີແຕ່ວ່າ ພວກເຮົາ ເຫັນແຕ່ຢູ່ໃນ ກໍຣະນີ ໂປຣເຈັກ ທີ່ພວກເຮົາເຮັດ ທາງດ້ານການເຖົ້າ ລະວັງ ທາງດ້ານແລປຫັ້ນ ເທົ່ານັ້ນແຫລ໋ະ ແຕ່ວ່າທົ່ວໆໄປແລ້ວ ກໍບໍ່ມີຈຳນວນ ເພີ້ມຂື້ນ".

ນອກຈາກນີ້ ອົງການອະນາໄມໂລກ ໄດ້ລາຍງານ ເມື່ອວັນທີ 7 ມົກກະຣາ 2010 ຜ່ານມາວ່າ ໃນ ລາວ ມີຜູ້ປ່ວຍຕິດເຊື້ອ ໄຂ້ຫວັດໝູ ສາຍພັນ A/H1N1 ທັງໝົດ 292 ກໍຣະນີ ເສັຍຊີວິດ 2 ຄົນ.