ປະຊາຊົນ ໃຊ້ສຸຂສາລາ ເພີ້ມຂຶ້ນ

ປະຊາຊົນ ໃນເຂດ ສອກຫລີກ ຫ່າງໄກ ນິຍົມ ເດີນທາງ ໄປໃຊ້ ສຸຂສາລາ ຫລາຍຂຶ້ນ ກ່ວາເກົ່າ.
ຈະເຣີນສຸກ ຣາຍງານ
2008-07-29
ອີແມວລ໌
ຄໍາເຫັນ
Share
ພິມ

ເຈົ້າ​ໜ້າ​ທີ່ ຂັ້ນ​ສູງ ຈາກ ຫ້ອງການ ສາທາຣະນະ​ສຸກ ​ແຂວງ​ໄຊ​ຍະ​ບູຣີ ກ່າວ​ເຖິງ ການພັທນາ ຄຸນ​ນະພາ​ບຊີວິດ ຂອງ​ປະຊາຊົນ ​ເຂດ​ສອກຫລີກ​ຫ່າງ​ໄກ ​ໃນ​ປັດຈຸບັນ ວ່າ:

“ດຽວ​ນີ້ ມີ​ຫລາຍ​ຢູ່ ສ​ເລັ່ຍ ​ໃນ​ປີ​ນີ້ ພວກ​ເຮົາ ສ​ເລັ່ຍກັບ​ປີ​ກາຍ ດຽວ​ນີ້ ກໍ​ຫ່າງ​ໄດ້ 5 ​ເດືອນ, ​ເຮົາ​ມາ ​ເບິ່ງ​ຄົນ​ບໍຣິການ ຢູ່​ຂັ້ນ​ສຸຂສາລາ ກໍ​ເພີ້ມຂຶ້ນ​ແລ້ວ ດຽວ​ນີ້ ຖື​ວ່າ ​ເພີ້​ມຂຶ້ນ ຈາກ​ປີ​ກາຍ​ຜ່ານ​ມາ.”

ນອກຈາກ​ນີ້​ແລ້ວ, ​ແຂວງ​ໄຊ​ຍະ​ບູຣີ ຍັງ​​ໄດ້​ຕອບ​ສນອງ ນະ​ໂຍບາຍ ຂອງຣັຖບານ ​ໂດຍ​ມີ​ການ​ຊ່ອຍ​ເຫລືອ ​ແລະ ຣະດົມ​ເງິນ ​ໄປ​ຊ່ອຍ ​ໃນ​ການ​ຊື້​ຢາ ​ແລະ ການ​ໂຄສະນາ ສຸຂສຶກສາ ​ໃນ​ແຕ່​ລະ​ບ້ານ ​ເພື່ອ​ໃຫ້​ມີ​ຄວາມ​ຮູ້ ​ເພີ້​ມຕື່ມ ​ທາງ​ດ້ານ​ສຸຂພາບ.

​ເຖິງ​​ແມ່ນ​ວ່າ ​ຜົນ ໃນ​ການ​ດໍາ​ເນີນ​ງານ ອອກ​ມາ​ຂ່ອນ​ຂ້າງ​ດີ ກໍ​ຕາມ, ​ແຕ່​ໜ່ວຍ​ງານ ກ່ຽວຂ້ອງ ຍັງ​ພົບ​ກັບ ອຸປສັກ ​ໃນ​ການ​ພັທນາ ຄຸນ​ນະພາ​ບ ຊີວິດປະຊາຊົນ, ຊຶ່ງ​ເຈົ້າ​ໜ້າ​ທີ່ ​ໄດ້​ກ່າວ​ເຖິງ ​ເຣື້ອງນີ້​ວ່າ:

“ອຸປສັກ ພວກ​ເຮົາ ຜ່ານ​ມາ, ​ເຮົາ​ພົບ ຄວາມ​ຫຍຸ້ງຍາກ ​ໃນ​ເຣື້ອງການ​ເດີນທາງ ຄົມມະນາຄົມ, ພວກ​ເຮົາ ກໍ​ເປັນ​ເມືອງ​ທຸກ​ຍາກ, ​ເຂດ​ບ່ອນ​ພື້ນ​ທີ່ ​ໃນ​ການ​ເດີນທາງ ຖື​ວ່າ ການ​ເດີນທາງ​ຍາມ​ຝົນ ມີ​ບ່ອນ​ຍາກຫລາຍ​ກ່ວາ ບ່ອນ​ງ່າຍ ​ເພາະວ່າ ຣະດູ​ຝົນ​ມາ​ນີ້ ພວກ​ເຮົາ ກໍ​ໄປ​ຫາ ສຸຂສາລາ ກໍ​ຫຍຸ້ງຍາກ.”

​ໃນຊ່ວງ​ໜ້າ ຣະດູ​ຝົນ​ ຈະ​ມີ​ປະມານ 40 ກ່ວາ​ບ້ານ ທີ່​​ເຈົ້າ​ໜ້າ​ທີ່ ບໍ່​ສາມາດ ​ໄປ​ເຖິງ​ໄດ້, ຖ້າ​ຫາກ​ໃຊ້ຣົດ​ຍົນ ​ໃນ​ການ​ເດີນທາງ ນັ້ນ ຈະ​ຕ້ອງ​ໃຊ້​ເວລາ ປະມານ 8 ຊົ່ວ​ໂມງ ​ກ່ອນ​ຈະ​​ໄປ​ເຖິງ ​ບ້ານ ທີ່ຢູ່​ເຂດ​ປ່າ​ເລິກ.

​ເຈົ້າໜ້າ​ທີ່ ​ໄດ້​ກ່າວ​ສລຸ​ບວ່າ ​ປັດຈຸບັນ ທາງ​ຜ​ແນ​ກສາທາຣະນະ​ສຸກ ຈະ​ມີ​ໜ່ວຍ​ງານ ​ເຄື່ອນ​ທີ່ ​ເພື່ອ​ໄປ​ກວດ​ສຸຂພາບ, ບໍຣິການ ສັກ​ຢາ ​ແລະ ຊັ່ງ​ນໍ້າໜັກ ​ໃນ​ແຕ່​ລະ​ບ້ານ ຈໍານວນ 4 ຄັ້ງ ຕໍ່ປີ, ພ້ອມ​ກັບ ຈໍາ​ໜ່າຍຢາ ລາຄາ​ຖືກ.

ເຕັມຫນ້າ