ຜແນກໂຍທາທິການ ແລະ ຂົນສົ່ງ ແຂວງບໍລິຄຳໄຊ ເປີດເຜີຍ ເຖິງຄວາມຄືບໜ້າ ໃນການກະຕຽມສະຖານທີ່ ສຳລັບ ການກັບຄືນມາປະເທດ ຂອງຊາວມົ້ງລາວ ຈາກສູນກັກຂັງຊົ່ວຄາວ ບ້ານຫ້ວຍນ້ຳຂາວ ປະເທດໄທ ວ່າ ຂະນະນີ້ ໄດ້ກະຕຽມສະຖານທີ່ ແລະ ປຸກເຮືອນ ປະມານ 500 ຫລັງ ສຳລັບ ຊາວມົ້ງລາວ ທີ່ຍັງເຫລືອ ທັງໝົດ ໂດຍໄດ້ສຳເຣັດໄປແລ້ວ ປະມານ 90 ສ່ວນຮ້ອຍ. ດັ່ງເຈົ້າໜ້າທີ່ ຈາກຂແນງເຄຫາຜັງເມືອງ ແຂວງບໍລິຄຳໄຊ ເວົ້າກ່ຽວກັບ ເຣື້ອງນີ້ວ່າ:
”ເພາະວ່າ ພວກເຮົາ ຮັບປະກັນໃຫ້ໄດ້ ປະມານ 500 ຫລັງຄາເຮືອນ ກໍໄດ້ຮັບຄວາມຜິດຊອບ ມາແຕ່ເພິ່ນທັງໝົດນັ້ນແຫລ໋ະ ດຽວນີ້ 90% ແລ້ວ 100% ພາຍໃນຕົ້ນປີ 2010 ດຽວນີ້ ເຮືອນບໍ່ທັນແລ້ວໝົດແຕ່ວ່າ ພວກເຮົາ ກໍມີເຮືອນຊົ່ວຄາວ ໃຫ້ຢູ່ໄດ້.”
ສະຖານທີ່ ສຳລັບຊາວມົ້ງລາວນີ້ ຕັ້ງຢູ່ ໃນເຂດເມືອງບໍລິຄັນ ແລະ ປາກຊັນ ແຂວງບໍລິຄຳໄຊ ຊຶ່ງມີພື້ນທີ່ ກວ້າງປະມານ 50 ເຮັກຕາຣ ຢູ່ຫ່າງຈາກເຂດໂຕເມືອງ ປະມານ 50 ກິໂລແມັດ. ທ່ານເວົ້າ ອີກວ່າ ນອກຈາກ ການປຸກເຮືອນ ດັ່ງກ່າວນີ້ແລ້ວ ກໍຍັງມີ ການກໍ່ສ້າງໂຮງຮຽນ, ໂຮງໝໍ ແລະ ກໍຍັງມີການຈັດສັນ ພື້ນທີ່ ສຳລັບປູກຝັງ ອີກດ້ວຍ. ສຳລັບ ບ້ານເຮືອນ ທີ່ກຳລັງປຸກຂຶ້ນນີ້ ເປັນໂຄງການຮີບດ່ວນ ແຕ່ຕໍ່ໄປ ຈະໃຫ້ມີນ້ຳປະປາ ແລະ ໄຟຟ້າດ້ວຍ.
ຮອງຫົວໜ້າ ຜແນກໂຍທາທິການ ແລະ ຂົນສົ່ງ ແຂວງບໍລິຄຳໄຊ ເວົ້າເຖິງ ການຊ່ອຍເຫລືອອື່ນໆ ອີກວ່າ:
”ຖືວ່າ ຈະຊ່ອຍເຫລືອ ໃຫ້ຢູ່ລອດ ຊັ້ນແຫລ໋ະ ໃຫ້ຢູ່ໄດ້ ມີບ່ອນຫາຢູ່ຫາກິນ ມີເຂົ້າກິນໃນເບື້ອງຕົ້ນ ສອງປີ ມີເຂົ້າກິນ ມີອາຫານກິນ ມີເຄື່ອງນຸ່ງຫົ່ມ ມີຫຍັງຄົບຖ້ວນ ບໍລິບູນ ໝາຍຄວາມວ່າ ເບື້ອງຕົ້ນ ເຂົາເຈົ້າ ຍັງບໍ່ມີ ບ່ອນເຮັດກິນຫັ້ນນາ ບ່ອນທີ່ທຳກິນ ຣັຖ ຈະຕ້ອງໄດ້ຊ່ອຍ ຊ່ອຍໃຫ້ເຂົາເຈົ້າ ເຣື້ອງຢູ່ເຣື້ອງກິນ ຄົບຖ້ວນ.”
ທ່ານເວົ້າຕື່ມວ່າ ສຳລັບ ການຮັກສາຄວາມປອດພັຍ ໃນບໍລິເວນນີ້ນັ້ນ ກໍຈະຕ້ອງ ເປັນປົກກະຕິ ຄື ພື້ນທີ່ອື່ນໆ ຍ້ອນວ່າ ຊາວມົ້ງລາວ ທີ່ກັບຄືນປະເທດ ຈະຖືວ່າ ເປັນຄົນລາວ ທົ່ວໄປອື່ນໆ.