ທາງການລາວ ໃຫ້ການຊ່ອຍເຫລືອ ຊາວເຜົ່າມົ້ງ ທີ່ຖືກສົ່ງກັບ
2008.09.02
ເຈົ້າໜ້າທີ່ ຈາກກະຊວງ ປ້ອງກັນ ຄວາມສງົບ ຂອງລາວ ທ່ານນື່ງ ໄດ້ອະທິບາຍ ກັບ ວິທຍຸເອເຊັຽເສຣີ:
“ນອກຈາກ ທີ່ຝ່າຍໄທ ຈະໃຫ້ແລ້ວ ພວກຂ້າພະເຈົ້າ ຈະໃຫ້ອີກ ຈະລ້ຽງ ເຂົາເຈົ້າ ອີກໄປປະມານ ນື່ງປີ ຈົນກ່ວາ ຈະຮອດລະດູ ການເກັບກ່ຽວ. ໄດ້ຄ່າຕອບແທນ ຜູ້ລະ 3 ແສນກີບ ແລ້ວກໍ ຈະໃຫ້ເຄື່ອງນຸ່ງຫົ່ມ ເຄື່ອງຫຍັງຕ່າງໆ ທີ່ຂາດເຂີນ ພວກຂ້າພະເຈົ້າ ຈະຊື້ ໃຫ້ໝົດ.”
ເຈົ້າໜ້າທີ່ ຄົນດຽວກັນນີ້ ໄດ້ອະທິບາຍ ວ່າ ເທົ້າປັດຈຸບັນນີ້ ຝ່າຍລາວ ໄດ້ຮັບເອົາ ຊາວເຜົ້າມົ້ງ ທີ່ທາງການໄທ ສົ່ງຄືນ ໃຫ້ 5 ຊຸດແລ້ວ ມີຈໍານວນ ທັງໝົດ ປະມານ 2,000 ຄົນ. ຊາວມົ້ງ ຈໍານວນນີ້ ສ່ວນຫລາຍ ຈະສົ່ງກັບຄືນ ບ້ານເດີມ ຂອງເຂົາເຈົ້າ ໃນສາມແຂວງ ຄື ແຂວງວຽງຈັນ ຊຽງຂວາງ ແລະແຂວງບໍຣິຄໍາໄຊ.
ນັບຕັ້ງແຕ່ ທາງການໄທ ແລະ ທາງການລາວ ໄດ້ມີການຕົກລົງກັນ ວ່າ ຈະສົ່ງຊາວເຜົ້າມົ້ງ ຈາກສູນ ບ້ານຫ້ວຍນໍ້າຂາວ ກັບຄືນໄປຍັງ ລາວ, ອົງການນາໆຊາດ ມີຄວາມຢ້ານກົວ ວ່າ ການກະທໍາ ຂອງທາງການໄທ ແລະ ທາງການລາວ ຈະບໍ່ໂປ່ງໃສພໍ ແລະ ຢ້ານວ່າ ຊາວມົ້ງເລົ່ານີ້ ບໍ່ມີຄວາມປອດໄພ. ກ່ຽວກັບເຣື້ອງນີ້ ທາງການ
ລາວ ໄດ້ຖະແຫລງວ່າ:
“ແລະ ກໍໄດ້ສົ່ງ cassette CD ບັນທືກພາບ ທີ່ຂ້າພະເຈົ້າ ໄປສົ່ງ ແຕ່ລະຈຸດ ແຕ່ລະບ່ອນນັ້ນ ໃຫ້ທາງນ່ວຍງານ ຝ່າຍໄທ ໄປສາຍໃຫ້ເຂົາເຈົ້າເບິ່ງ. ອັນທີສອງມາ ພີ່ນ້ອງເຂົາເຈົ້າ ທີ່ມາແລ້ວ ເຂົາກໍໂທຣະສັບໄປຫາກັນວ່າ ຣັຖບານລາວ ໄດ້ເອົາໃຈໃສ່ ແນວນັ້ນແນວນີ້ ເຂົາເຈົ້າ ກໍພໍອົກພໍໃຈ ທີ່ວ່າ ຈະກັບຄືນບ້ານເກີດເມືອງນອນນີ້.”
ຜ່ານມາ ທາງກະຊວງ ການຕ່າງປະເທດ ຂອງລາວ ກໍເຄີຽເວົ້າ ວ່າ ຊາວມົ້ງ ທຸກຄົນ ທີ່ກັບຄືນ ມາລາວ ຈະໄດ້ຮັບສິດທິ ຄືກັນ ກັບປະຊາຊົນລາວ ທົ່ວໄປ, ມີບັດປະຊາຊົນ ແລະ ໄດ້ຮັບການປົກປ້ອງ ທາງດ້ານກົດໝາຍ, ແຕ່ເຖິງຢ່າງໃດ ກໍດີຊາວມົ້ງ ຈໍານວນນື່ງ ກໍຍັງລັ່ງເລໃຈຢູ່ ເພາະຢ້ານຕົນເອງ ບໍ່ມີຄວາມປອດໄພ ໃນຊີວິດ.