ລາວ ປະຕິເສດ ຄໍາກ່າວຫາ ຂອງ ກຸ່ມສິດທິມະນຸດ
2008.10.29
ເຜົ່າມົ້ງ ຫ້ວຍນໍ້າຂາວ ທີ່ກໍາລັງຖືກສົ່ງກັບ ສປປລາວ
ອົງການ ສິດທິມະນຸດ ນາໆຊາດ ຮຽກຮ້ອງໃຫ້ ທາງການລາວ ປ່ອຍຕົວ ພວກຜູ້ນໍາ ຊາວມົ້ງລາວ ທີ່ທໍາການ ກໍ່ກວນຄວາມສງົບ ຢູ່ສູນບ້ານຫ້ວຍນໍ້າຂາວ ປະເທດໄທ ເມື່ອເດືອນ ມິຖຸນາ ຜ່ານມາ. ຈາກລາຍງານ ຂອງອົງການ ສິດທິມະນຸດ ຜູ້ນໍາເລົ່ານີ້ ໄດ້ຖືກສົ່ງກັບຄືນ ສປປລາວ ແລະ ຕໍ່ມາກໍໄດ້ຖືກກັກຂັງ.
ທ່ານ ຢົ້ງ ຈັນທະລັງສີ ໂຄສົກ ກະຊວງ ການຕ່າງປະເທດລາວ ກ່າວວ່າ:
“ດຽວນີ້ ຢາກແຈ້ງໃຫ້ຮູ້ ເລີຍວ່າ ບໍ່ມີຜູ້ໃດເຊື່ອວ່າ ບໍ່ໄດ້ກັບ ບ້ານເກີດເມືອງນອນ ຂອງໂຕ ມີແຕ່ວ່າ ຢູ່ໃນພວກ 18 ຄົນນີ້ ຢູ່ໃນຫັ້ນ ມີ 9 ຄົນ ທີ່ເປັນເປົ້າໝາຍ ທີ່ທາງເຈົ້າໜ້າທີ່ໄທ ໄດ້ຂໍຮ້ອງໃຫ້ ພວກເຮົານີ້ ຂໍໃຫ້ຣັຖບານລາວນີ້ ຄຸ້ມຄອງ ເຂົາບໍ່ຢາກເຫັນໜ້າ ຢູ່ເມືອງໄທອີກ ເພາະວ່າ ເຂົາກະທໍາຜິດ ຢູ່ເມືອງໄທ.”
ເມື່ອ ວັນທີ 20 ມິຖຸນາ ຊາວເຜົ່າມົ້ງລາວ ກວ່າ 5,000 ຄົນ ໃນຈໍານວນ 8,000 ຄົນ ພາກັນ ຍ່າງອອກຈາກ ສູນ ອົບພະຍົບ ບ້ານຫ້ວຍນໍ້າຂາວ ເພື່ອປະທ້ວງ ການຈັບກຸມ ແລະ ເນລະເທດ ຊາວເຜົ່າມົ້ງ ລາວ ທີ່ຂໍລີ້ພັຍ ການເມືອງ.
ອົງການ ສິດທິມະນຸດ ກ່າວວ່າ ກອງທະຫານໄທ ໄດ້ເຂົ້າມາ ຢັບຢັ້ງ ຢຸດການປະທ້ວງ ໃນຄັ້ງນັ້ນ ພຽງແຕ່ 5 ກິໂລແມັດ ຈາກສູນ ອົບພະຍົບ ແລະ ໄດ້ ສະກັດກັ້ນ ຜູ້ເດີນກະບວນ ພ້ອມທັງ ລູກເລັກເດັກນ້ອຍ ຕລອດຄືນ ໂດຍ ປາສະຈາກ ອາຫານການກິນ ແລະ ນໍ້າດື່ມ. ໃນມື້ທີສອງ, ທາງການໄທ ກໍໄດ້ຈັບກຸມ ຊາວມົ້ງ 837 ຄົນ ແລະ ໄດ້ສົ່ງພວກ ຂະເຈົ້າ ຄືນໄປ ສປປລາວ ໃນມື້ຕໍ່ມາ.
ສໍາລັບ ການເບິ່ງແຍງ ຊາວມົ້ງ ດັ່ງກ່າວ ທ່ານ ຢົ້ງ ໄດ້ກ່າວວ່າ:
“ພວກຂ້າພະເຈົ້າ ດູແລເບິ່ງແຍງ ພິເສດນີ້ ໝາຍຄວາມວ່າ 1 ໄດ້ແນະນໍາ ອໍານາດການປົກຄອງ ທ້ອງຖິ່ນ ບໍ່ໃຫ້ປ່ອຍປະລະເລີຍ ພວກນີ້ ໃຫ້ເຂົາ ລັກກັບເມືອງໄທອີກ, ອັນທີ 2 ເຕືອນ ກ່າວເຕືອນເຂົາ ວ່າ ຖ້າກັບຄືນເມືອງໄທ ແລ້ວຈະຖືກຈັບໂລດ ເພາະທາງເຈົ້າໜ້າທີ່ ໄທ ໄດ້ແຈ້ງມາ ໃຫ້ພວກ ຂ້າພະເຈົ້າຮູ້ ແລ້ວວ່າ ຖ້າກັບຄືນ ເມືອເມືອງໄທ ມື້ໃດ ແມ່ນຖືກຈັບມື້ນັ້ນ.”
ເຖິງຢ່າງໃດກໍຕາມ ທາງການ ລາວ ແລະ ໄທ ເຫັນວ່າ ຊາວມົ້ງເລົ່ານີ້ ເປັນພຽງແຕ່ ຜູ້ລັກລອບເຂົ້າເມືອງ ທີ່ຜິດກົດໝາຍ ຈຶ່ງໄດ້ຖືກ ສົ່ງກັບຄືນໄປ ບ້ານເກີດເມືອງນອນ ຊຶ່ງການສົ່ງກັບ ບໍ່ໄດ້ຖືກ ກວດກາ ຫລື ສັງເກດການ ຈາກ ອົງການນາໆຊາດ ເລີຍ.