ມີການຮຽກຮ້ອງ ໃຫ້ເລື່ອນການພິສູດ ຄົນງານຕ່າງດ້າວ

ອົງການ ສິດທິມະນຸດ ປະຈຳ ປະເທດໄທ ໄດ້ອອກ ຖແຫລງຂ່າວ ຕໍ່ສື່ມວນຊົນ ຂໍໃຫ້ ຣັຖບານໄທ ເລື່ອນເວລາ ໃນການ ຈົດທະບຽນ ຄົນງານຕ່າງດ້າວ ສາມຊາດ ລາວ ພະມ່າ ແລະ ກຳພູຊາ ທີ່ຈະໝົດ ອາຍຸ ໃນມື້ວັນທີ 28 ກຸມພາ 2010 ອອກໄປກ່ອນ.

ນອກຈາກນັ້ນ ຍັງຂໍຮ້ອງໃຫ້ ຣັຖບານໄທ ເຫັນຄວາມສຳຄັນ ຂອງຄົນງານ ຕ່າງດ້າວເຫລົ່ານີ້ ຫລາຍຂື້ນ ເພາະພວກຂະເຈົ້າ ໄດ້ເຮັດຜົນ ປະໂຫຍດ ດ້ານເສຖກິດ ໃຫ້ປະເທດໄທ ຢ່າງຫລວງຫລາຍ. ທ່ານ ສຸນັຍ ພາສຸຂ ເຈົ້າໜ້າທີ່ ຈາກອົງການ ສິດທິມະນຸດ ປະຈຳບາງກອກ ປະເທດໄທ ເວົ້າວ່າ:

"ລາຍງານ ທີ່ພວກເຮົາ ຈະເປີດເຜີຍ ມື້ນີ້ ຣັຖບານໄທ ຈະຕ້ອງໃຫ້ ຄວາມສົນໃຈ ເຮົາຄາດວ່າຈະ ເຫັນຄຳຕອບ ທີ່ແຈ່ມແຈ້ງ ຫລາຍຂື້ນຈາກ ຮັຖບານໄທ ຫາກທາງ ຣັຖບານບໍ່ສາມາດ ຕອບໄດ້ວ່າ ເປັນຫຍັງຈຶ່ງເລືອກ ວັນທີ 28 ກຸມພາ ເປັນມື້ສຸດທ້າຍ ກໍຄວນເລື່ອນ ຫລືຍົກເລີກ ໄປເລີຍ".

ອົງການ ສິດທິມະນຸດ ຍັງໄດ້ສເນີ ແນະນຳ 4 ຂໍ້ໃຫ້ແກ່ ຣັຖບານໄທ ຄື:

1 ຣັຖບານໄທ ຄວນຈັດຕັ້ງ ກັມມະການ ພິເສດ ເພື່ອສອບສວນ ການລະເມີດສິດທິ ພື້ນຖານຂອງ ຄົນງານຕ່າງດ້າວ.

2 ຍົກເລີກ ກົດໝາຍ ທີ່ຈຳກັດ ສິດທິ ຂອງຄົນງານ ຕ່າງດ້າວ ໃນເຂດພາກໃຕ້ ຂອງໄທ ແລະ ໃຫ້ນັບຖື ສິດທິມະນຸດ ຂັ້ນພື້ນຖານ.

3 ຍຸຕິຄວາມ ຮຸນແຮງ ທີ່ເກີດຂື້ນກັບ ຄົນງານຕ່າງດ້າວ.

4 ຂໍໃຫ້ ຣັຖບານ ແກ້ໄຂກົດໝາຍ ມາດຕຣາ 88 ແລະ 100 ເພື່ອອະນຸຍາດ ໃຫ້ຄົນງານ ສາມາດ ຈັດຕັ້ງສະພາ ແຮງງານຕ່າງດ້າວ ພາຍໃຕ້ກົດໝາຍ ແຮງງານໄທ.

ປັດຈຸບັນນີ້ ຍັງມີຄົນງານ ຕ່າງດ້າວ ຈຳນວນຫລາຍ ທີ່ບໍ່ເຂົ້າສູ່ ຂະບວນການ ພິສູດສັນຊາດ ເພາະບໍ່ມີ ເອກກະສານ ປະຈຳໂຕ ແລະ ໜັງສືຜ່ານແດນ ທີ່ຖືກຕ້ອງ ຕາມກົດໝາຍ ຊຶ່ງທາງ ຣັຖບານຄວນ ຫາທາງຊ່ອຍເຫລືອ ແລະແກ້ໄຂ.