ຣັດຖະບານລາວ ຍອມຮັບວ່າ ການລົງທຶນ ມີອຸປະສັກຫລາຍຢ່າງ ແລະພ້ອມທີ່ຈະແກ້ໃຂ ຕາມການສະເນີ ຂອງນັກທຸຣະກິດຍີ່ປຸ່ນ

ທ່ານ ເຊອິໂຣະ ໂຕກຸນະກະ ຜູ້ອໍານວຍການບໍຣິສັດ ປູກໄມ້ໂອຈິລາວ ກ່າວວ່າ ໃນ ສັດຕະວັດທີ 21 ນີ້ການເຮັດວຽກ ຕ້ອງແຂ່ງຂັນກັບເວລາ ແຕ່ການຕອບສະໜອງ ຂອງພາກສ່ວນ ຣັດຖະບານລາວ ຫລາຍບ່ອນ ຍັງຊັກຊ້າ ແລະບໍ່ມີຜູ້ຮັບຜິດຊອບ ທີ່ແນ່ນອນໃນວຽກງານໃດນຶ່ງ.

ທ່ານ ໂຕກຸນະກະ ຕ້ອງໄດ້ປົບຂຶ້ນປົບລົງ ຣະຫວ່າງສູນກາງ ແລະທ້ອງຖີ່ນ ເປັນຫລາຍໆເທື່ອ ເພື່ອສະເນີວຽກງານ ແຕ່ລະຢ່າງ ແລະຮູ້ສຶກວ່າ ການປະຕິບັດນະໂຍບາຍ ຂອງສູນກາງ ແລະທ້ອງຖີ່ນ ມີຄວາມແຕກຕ່າງກັນ. ບໍຣິສັດຂອງທ່ານ ໂຕກຸນະກະ ເປັນນຶ່ງໃນຈໍານວນ 15 ສະມາຊິກ ຂອງບໍຣິສັດຫຸ້ນສ່ວນ ທີ່ໄດ້ມາລົງທຶນ ປູກຕົ້ນໄມ້ ທີ່ແຂວງຄໍາມ່ວນ ແລະແຂວງບໍລິຄໍາໄຊ ມີແຜນການປູກຕົ້ນໄມ້ ໃນເນື້ອທີ່ 50 ພັນເອັກຕາຣ ໃຫ້ສໍາເຣັດກ່ອນປີ 2012 ແລະວ່າ ທ່ານມີຄວາມຕ້ອງການ ໃຫ້ນັກທຸຣະກິດຍີ່ປຸ່ນ ມາລົງທຶນ ຢູ່ປະເທດລາວຫລາຍຂຶ້ນ ແຕ່ກໍຢາກໃຫ້ຣັດຖະບານລາວ ປັບປຸງວຽກງານຕ່າງໆ ໃຫ້ດີກວ່າເກົ່າ ກ່ອນ ໂດຍໃຫ້ທາງການລາວ ສະເນີກົດໝາຍຣະບຽບ ແລະມາຕການ ທີ່ກ່ຽວຂ້ອງ ກັບການລົງທຶນ ຕໍ່ນັກລົງທຶນ ແບບບໍ່ມີການລໍາອຽງ, ຕ້ອງເຮັດໃຫ້ ການຂໍໃບອະນຸຍາດຕ່າງໆ ໃນທຸກບ່ອນ ມີຄວາມສະດວກທີ່ສຸດ ເທົ່າທີ່ຈະເຮັດໄດ້, ບໍ່ໃຫ້ມີຄວາມແຕກຕ່າງ ແບບບໍ່ຍຸຕິທໍາ ໃນການເກັບພາສີອາກອນ ຈາກນັກລົງທຶນ ຕ່າງປະເທດ ແລະອະນຸຍາດ ການລົງທຶນ-ຜ່ານ ປະຕູດຽວ.

ພ້ອມດຽວກັນ ຝ່າຍຍີ່ປຸ່ນ ຍັງສະເນີໃຫ້ຣັດຖະບານລາວ ສ້າງຄວາມງ່າຍດາຍ ໃນຂັ້ນຕອນການສໍາຣະພາສີ ແລະ ກວດຄົນເຂົ້າເມືອງ ເພື່ອນັກລົງທຶນ ຈະສາມາດທໍາທຸຣະກິດ ໄດ້ງ່າຍຂຶ້ນ, ປັບປຸງຣະບົບການຈັດສົ່ງສີນຄ້າ ຣະບົບໂຄງລ່າງ ພື້ນຖານ ແລະຣະບົບທີ່ກ່ຽວຂ້ອງ ກັບຊານເມືອງວຽງຈັນ ແລະບັນຫາອື່ນໆໃຫ້ດີຂຶ້ນ.

ບັນຫາຊຶ່ງຝ່າຍຍີ່ປຸ່ນ ສະເນີນັ້ນ ມີລັກຊະນະ ທີ່ຄ້າຍຄືກັນ ກັບນັກທຸຣະກິດອື່ນໆ ທັງພາຍ ໃນແລະຕ່າງປະເທດ ໄດ້ປະເຊີນມາກ່ອນແລ້ວ.

ທ່ານ ສຸລິວົງ ດາລາວົງ ປະທານ ຄະນະກໍາມະການ ແຜນການ ແລະການລົງທຶນ ໄດ້ຍອມຮັບວ່າ ມີບັນຫາຫລາຍຢ່າງ ທີ່ເປັນອຸປະສັກ ແກ່ການລົງທຶນ ຊຶ່ງມີບາງບັນຫາ ທີ່ກ່ຽວຂ້ອງກັບນະໂຍບາຍ ລວມຂອງທາງການ ກັບຄວາມຮູ້ເທົ່າບໍ່ເຖີງການ ຂອງພາກສ່ວນກ່ຽວຂ້ອງ ຮ່ວມໄປເຖີງຣະບົບນິຕິກໍາດ້ວຍ.

ມະນີຈັນ ຣາຍງານ