ລາວລວບລວມຂໍ້ມູນ ເຂົ້າປະຊຸມອ່າງແມ່ນໍ້າຂອງ

ມີການເປີດ ກອງປະຊຸມ ແລກປ່ຽນບົດຮຽນ ຣະຫວ່າງໜ່ວຍງານ ທີ່ກ່ຽວຂ້ອງຈາກ ລາວ ວຽດນາມ ແລະກັມພູຊາ ເພື່ອຫາທາງອອກ ໃນການພັທນາ ແລະ ປ້ອງກັນ ບັນຫາ ທີ່ຈະເກີດຂຶ້ນ ໃນເຂດລຸ່ມແມ່ນໍ້າ 3 ເຊ ຄື ເຊກອງ ເຊສານ ແລະເຊປົກ  ສາຂາແມ່ນໍ້າ ຂອງນັ້ນ ຣະຫວ່າງ ວັນທີ 31 ພຶສພາ ຫາທີ 2 ມິຖຸນາ 2010 ທີ່ເມືອງ Buon Me Thuat ແຂວງ Dak Lak ປະເທດວຽດນາມ. ຕາມຄໍາເວົ້າຂອງ ເຈົ້າໜ້າທີ່ ອົງການ ຊັພຍາກອນນໍ້າ ແລະ ສິ່ງແວດລ້ອງຂອງລາວ:

"ເຮົາເວົ້າເລື່ອງ 3 S ນີ້ ເວົ້າທຸກປະເທດ ຕົ້ນຕໍກໍແມ່ນ ເຊກອງນີ່ ເຊຊານ ເຊປົກ ແມ່ນເບາະບັນດາ ປະເທດ ທີ່ວ່າມີຊາຍແດນ ຮ່ວມກັນ ຄະເຈົ້າຕ້ອງທວງໂລດ ຄະເຈົ້າຕ້ອງຍົກ ມາໂລດ ອັນນີ້ເຮົາຕ້ອງກຽມ ເອກກະສານ ຕື່ມອີກ".

ຄະນະ ກັມມາທິການ ແມ່ນໍ້າຂອງ MRC ມີຄວາມເຫັນວ່າ ພື້ນທີ່ລຸມນໍ້າ 3 ເຊ ເປັນສາຂາ ແມ່ນໍ້າ ທີ່ເປັນຕົ້ນນໍ້າ ລໍາທານ ໃຫ້ແກ່ປະຊາຊົນ ລຸ່ມນໍ້າຂອງ ໃນລາວ ວຽດນາມແລະ ກັມພູຊາ, ເປັນພື້ນທີ່ລຸ່ມນໍ້າ ທີ່ມີຄວາມສໍາຄັນ ຊຶ່ງຄວນຈັດກອງ ປະຊຸມ ປຶກສາຫາຣືກັນ ໃນຣະດັບ ພູມີພາກ. MRC ຄາດຫວັງວ່າ ການແລກປ່ຽນ ຂໍ້ມູນ ຜູ້ທີ່ມີສ່ວນໄດ້ ສ່ວນເສັຽ ຈາກ 3 ປະເທດ ຜ່ານການນໍາສເນີ ຂໍ້ມູນຕົວຈິງ ທີ່ເກີດຂຶ້ນ ໃນພື້ນທີ່ ຈະຊ່ວຍໃຫ້ ຮ່າງແຜນການ ທີ່ຈະປະຕິບັດ ຮ່ວມກັນໄດ້ ເພື່ອບໍ່ໃຫ້ ມີຜົລສະທ້ອນ ຈາກການພັທນາ ທີ່ອາຈຈະເຮັດໃຫ້ ເກີດການປ່ຽນແປງ ດ້ານສະພາບແວດລ້ອມ ຂ້າມພົມແດນ. ໃນນັ້ນ ພາກສ່ວນກ່ຽວຂ້ອງ ຂອງລາວ ກໍຄວນກຽມ ຄວາມພ້ອມ ເຂົ້າຮ່ວມກອງປະຊຸມ  ທ່ານກ່າວຕໍ່ໄປວ່າ:

"ຢາກໃຫ້ທີມງານ ອາຈານຕ່າງໆ ຫລືວ່າ ຜູ້ມີສ່ວນຮ່ວມ ຄວນຄິດເບິ່ງເລື່ອງ Transboundary ຕື່ມ ເພື່ອວ່າບໍ່ຢາກ ຖືກຮັບ ຄັນເຮົາບໍ່ມີຂໍ້ມູນ ໄດ້ຕໍ່ສູ້ໄປຮ່ວມ ພວກເຮົາກໍຈະ ຖືກທ່າຮັບ".

ຕົວແທນຂອງ ປະເທດລາວ ຈະຕ້ອງມີຄວາມພ້ອມ ເປັນຢ່າງດີ ຖ້າຫາກປະເທດ ກ່ຽວຂ້ອງ ສອບຖາມເຖິງ ສະພາບການ ໃນລາວ ໂດຍສະເພາະກ່ຽວກັບ ໂຄງການ ພັທນາຈໍານວນນຶ່ງ ໃນແຂວງພາກໃຕ້ ຊຶ່ງເຮັດໃຫ້ ແມ່ນໍ້າເຊກອງ ເປິະເປື້ອນ ໃນປັຈຈຸບັນນີ້.