ຜູ້ແທນຣາສດອນໄທ ເລີ້ມອອກສຽງຕ້ານເຂື່ອນ

ສະມາຊິກ ສະພາ ຜູ້ແທນ ຣາສດອນ ໄທ ຮຽກຮ້ອງ ໃຫ້ ນາຍົກ ຣັຖມົນຕຣີ ໄທ ຄັດຄ້ານ ໂຄງການ ສ້າງເຂື່ອນ ໄຊຍະບຸຣີ.
ໂພໄຊສວັດ
2011-04-25
ອີແມວລ໌
ຄໍາເຫັນ
Share
ພິມ

ກົດຟັງສຽງ

ທ່ານ ວັຊລະ ເພັດທອງ ສະມາຊິກ ສະພາ ຜູ້ແທນ ຣາສດອນ ໄທ ໃນຖານະ ໂຄສົກ ຄນະກັມມາທິການ ການພັທນາ ການເມືອງ, ການສື່ສານ ມວນຊົນ ແລະ ການມີ ສ່ວນຮ່ວມ ຂອງ ປະຊາຊົນ ໄດ້ຖແລງ ຕໍ່ສື່ ມວນຊົນ ໃນມື້ວັນເສົາ ທີ 23 ເມສາ 2011 ນີ້ວ່າ ທາງຄນະ ກັມມາທິການ ມີມະຕິ ຄັດຄ້ານ ການສ້າງເຂື່ອນ ໄຊຍະບຸຣີ ເພາະຈະມີ ຜົນກະທົບ ຕໍ່ຊີວິດ ການເປັນຢູ່ ຂອງຄົນໄທ ແລະ ປະຊາຊົນ ປະເທດ ຕ່າງໆ ທີ່ອາສັຍ ຢູ່ຕາມແຄມ ແມ່ນໍ້າຂອງ ຮວມທັງ ຜົນກະທົບ ຕໍ່ລະບົບ ນິເວດວິທຍາ, ຊຶ່ງໃນ ກອງປະຊຸມ MRC, 4 ປະເທດ ລາວ, ກຳພູຊາ, ວຽດນາມ ແລະໄທ ເມື່ອວັນທີ 19 ເມສາ 2011 ນັ້ນ ຍັງບໍ່ທັນ ມີຂໍ້ສລຸບ.

ມີແຕ່ຜູ້ ຕາງໜ້າຂອງ ທາງການລາວ ເທົ່ານັ້ນ ທີ່ຢືນຢັນ ໃຫ້ໂຄງການ ກໍ່ສ້າງເຂື່ອນ ໄຊຍະບຸຣີ ດຳເນີນ ຕໍ່ໄປ, ໃນຂນະທີ່ ອີກ 3 ປະເທດ ຕ້ອງການ ໃຫ້ສຶກສາ ຢ່າງລະອຽດ ຖີ່ຖ້ວນ ເສັຍກ່ອນ. ນອກຈາກ ນັ້ນ ທາງຄນະ ກັມມາທິການ ຍັງຕັ້ງ ຂໍ້ສັງເກດ ວ່າ ໃນການລົງນາມ ຊື້ກະແສ ໄຟຟ້າ ຈາກລາວ ອາດຈະຂັດຕໍ່ ຣັຖທັມມະນູນ ຂອງໄທ ມາດຕາ 190 ທີ່ບໍ່ໄດ້ ຜ່ານ ກອງປະຊຸມ ຣັຖສະພາ ເສັຍກ່ອນ.

ດ້ວຍເຫດນີ້ ທາງຄນະ ກັມມາທິການ ຈຶ່ງຈະຍື່ນ ໜັງສື ຄັດຄ້ານ ການກໍ່ສ້າງ ເຂື່ອນ ໄຊຍະບຸຣີ ຕໍ່ນາຍົກ ຣັຖມົນຕຣີ ແລະ ໜ່ວຍງານ ກ່ຽວຂ້ອງ ທັງໝົດ ຂອງໄທ. ນັກວິຊາການ ເຫັນວ່າການ ສ້າງເຂື່ອນ ໄຊຍະບຸຣີ ຈະສົ່ງຜົນ ກະທົບ ຕໍ່ ປະຊາຊົນ ທີ່ອາສັຍ ຢູ່ຕາມແຄມ ແມ່ນໍ້າຂອງ ທັງລາວ, ໄທ, ກຳພູຊາ ແລະ ວຽດນາມ. ຕົວຢ່າງ ກໍໄດ້ເຫັນ ມາແລ້ວ ຈາກ ເຂື່ອນ ຂອງຈີນ ທີ່ເຮັດໃຫ້ ລະດັບນໍ້າ ໃນແມ່ນໍ້າຂອງ ປ່ຽນແປງ ຂຶ້ນລົງ ຜິດ ປົກກະຕິ ສ້າງຄວາມ ເດືອດຮ້ອນ ຢ່າງມະຫາສານ ໃຫ້ ປະຊາຊົນ ໃນພູມີພາກ ລຸ່ມ ແມ່ນໍ້າຂອງ ແຫ່ງນີ້.

ເຕັມຫນ້າ