ວຽດນາມຢາກໃຫ້ລາວ ເລື່ອນການສ້າງເຂື່ອນ

ທ່ານ Pham Khoi Nguyen ຣັຖມົນຕຣີ ຊັພຍາກອນ ທັມມະຊາດ ແລະ ສະພາບ ແວດລ້ອມ ວຽດນາມ ກ່າວຕໍ່ ອົງການ ຂ່າວ DPA ວ່າ ວຽດນາມ ໄດ້ຂໍໃຫ້ ລາວ ຢັບຢັ້ງ ການສ້າງ ເຂື່ອນ ໃສ່ ແມ່ນໍ້າຂອງ ເປັນເວລາ 10 ປີ.
ມະນີຈັນ
2011-04-27
ອີແມວລ໌
ຄໍາເຫັນ
Share
ພິມ

ກົດຟັງສຽງ

ທ່ານ Nguyen ຜູ້ເປັນ ປະທານ ຄນະກັມການ ແມ່ນໍ້າຂອງ ຂອງ ວຽດນາມ ເວົ້າວ່າ ຣັຖບານ ວຽດນາມ ມີຄວາມ ວິຕົກກັງວົນ ກ່ຽວກັບ ເຂື່ອນ ຂອງລາວ ທີ່ຈະສົ່ງ ຜົລກະທົບ ໃສ່ເຂດ ປາກແບ່ງ ແມ່ນໍ້າຂອງ ໃນ ວຽດນາມ ແລະ ໄດ້ຂໍໃຫ້ ຝ່າຍລາວ ສົ່ງເອກສານ ກ່ຽວກັບ ການກໍ່ສ້າງ ເຂື່ອນ ນັ້ນໃຫ້ຕົນ. ທ່ານແຈ້ງວ່າ ເອກສານ ທີ່ ວຽດນາມ ໄດ້ຮັບນັ້ນ ບໍ່ໄດ້ຣະບຸ ເຖິງຂໍ້ມູນ ຕົວຈິງ ໃນການ ຄໍານວນ ຕີຣາ ເບິ່ງ ຜົລກະທົບ ຕ່າງໆ ທີ່ອາຈເກີດຂຶ້ນ ຈາກເຂື່ອນນັ້ນ  ແລະວ່າ 4 ປະເທດ ລຸ່ມນໍ້າຂອງ ລາວ-ໄທ-ກັມພູຊາ-ວຽດນາມ ຈະປະຊຸມ ໃນຣະດັບ ຣັຖມົນຕຣີ ກ່ຽວກັບ ເຂື່ອນ ຂອງລາວ ໃນເດືອນ ພຶສຈິກາ 2011.

ເຂື່ອນ ໄຊຍະບູຣີ ເປັນນຶ່ງ ໃນຈໍານວນ ເຂື່ອນ 11 ແຫ່ງ ຊຶ່ງມີແຜນການ ຈະສ້າງ ໃສ່ ແມ່ນໍ້າຂອງ. ກອງທຶນ ເພື່ອສັດປ່າ ໂລກ ໄດ້ເຕືອນວ່າ ການຄໍານວນ ເບິ່ງຜົລ ກະທົບ ດ້ານສິ່ງ ແວດລ້ອມ ບໍ່ໄດ້ ມາຕຖານ ຫລາຍ.  ກອງທຶນເພື່ອ ສັດປ່າ ໂລກ ແລະ ອີກ 263 ຈັດຕັ້ງ ສາກົລ ທີ່ບໍ່ຂຶ້ນກັບ ຣັຖບານ ໄດ້ຮ່ວມກັບ ວຽດນາມ ຮຽກຮ້ອງ ໃຫ້ເລື່ອນ ການສ້າງ ເຂື່ອນ ໄຊຍະບູຣີ ໃນຣະຍະ 10 ປີ ແລະ ໃຫ້ມີການ ສຶກສາ ຄໍານວນ ຜົລກະທົບ ຢ່າງເຕັມສ່ວນ. 

ຜູ້ພິທັກ ສິ່ງແວດລ້ອມ ຕ່າງກໍ ເປັນຫ່ວງວ່າ ເຂື່ອນ ໄຊຍະບູຣີ ຈະໄປຕັນ ທາງຂຶ້ນລ່ອງ ຂອງໝູ່ປາ ໃນເຂດລຸ່ມ ແມ່ນໍ້າຂອງ ຊຶ່ງຈະກະທົບ ກະເທືອນ ໃສ່ການ ສນອງອາຫານ ສໍາລັບ ປະຊາຊົນ ຫລາຍລ້ານ ຄົນ.

ເຕັມຫນ້າ