ທາງການລາວ ກຳລັງລໍຖ້າ ການຢືນຢັນ ຄວາມຊ່ວຍເຫລືອ ຈາກສະຫະພັນ ກິລາຄົນພິການ ແຫ່ງອາຊຽນ

ຜູ້ຕ່າງໜ້າ ກິລາ ແຕ່ ລະປະເທດ ທີ່ເຂົ້າຮ່ວມ ກິລາ ຊິເກ້ມ (SEA Games) ໄດ້ທຳພິທີ ປິດ ການແຂ່ງຂັນ ຄັ້ງທີ່ 24 ໃນ ວັນທີ 15 ເດືອນ ທັນວາ ປີ 2007 ທີ່ໄດ້ຈັດຂື້ນ ໃນ ແຂວງ ໂຄຣາດ ປະເທດໄທ. Photo by AFP

ທາງການລາວ ກຳລັງລໍຖ້າ ການຢືນຢັນ ຄວາມຊ່ວຍເຫລືອ ຈາກສະຫະພັນກິລາ ຄົນພິການ ແຫ່ງອາຊຽນສາກ່ອນ ກ່ອນທີ່ ຈະພິຈາຣະນາວ່າ ຕົນເອງ ຈະສາມາດ ເປັນເຈົ້າພາບ ຈັດການແຂ່ງຂັນກິລາ ອາຊຽນ ພາຣາເກມ ຄັ້ງທີ 5 ໄດ້ຫລືບໍ່.

ເຖິງແມ່ນວ່າການແຂ່ງຂັນກິລາ ອາຊຽນພາຣາເກມ ຄັ້ງທີ 4 ຢູ່ທີ່ແຂວງ ໂຄຣາຊ ຂອງໄທ ໄດ້ສີນສຸດລົງແລ້ວກໍຕາມ. ບັນຫາມີຢູ່ວ່າ ຕໍ່ໄປແມ່ນປະເທດໃດ ຈະເປັນຜູ້ຮັບ ຈັດການແຂ່ງຂັນກິລາ ອາຊຽນພາຣາເກມ ຄັ້ງທີ 5 ຕໍ່ໄປ.

ຕາມປົກະຕິ ແລ້ວ, ຈະຕ້ອງແມ່ນ ສປປ ລາວ ເປັນຜູ້ຮັບຈັດຕໍ່ ເນືອງຈາກວ່າ ຕໍ່ໄປ ສປປ ລາວ ຈະເປັນເຈົ້າພາບ ຈັດການແຂ່ງຂັນ ກິລາອາຊຽນ ຄັ້ງທີ 25 ໃນປີ 2009 ນີ້. ກ່ອນໜ້ານີ້ ທາງການລາວ ກໍໄດ້ໃຫ້ຄວາມເຫັນ ໄປແລ້ວວ່າອາດບໍ່ສາມາດ ຮັບໄດ້ ຍ້ອນບໍ່ມີຄວາມຕຽມພ້ອມ ໃນຫລາຍດ້ານ. ກ່ຽວກັບເຣື້ອງນີ້ ທ່ານ ດຣ. ປະເສີດ ໂພທິສານ ຮອງປະທານ ສະຫະພັນກິລາ ຄົນພິການ ແຫ່ງຊາດລາວວ່າ ກຳລັງພິຈາຣະນາ ຄວາມເປັນໄປໄດ້ ອີກຄັ້ງໃໝ.

(ສຽງ) "ຊ່ວງລະຍະນີ້ ພວກເຮົາບໍ່ທັນກຽມພ້ອມ ໝາຍຄວາມວ່າ ອາດຈະລໍໄປກ່ອນ ສັກລະຍະນຶ່ງ ບາງທີກໍອາດ ຈະມີຄວາມສາມາດ ຮັບໄດ້ຖ້າວ່າ ປະເທດເພື່ອນມິດ ມີການສະນັບສະໜູນ ບວກໃສ່ ກັບທຶນຣັຖ ອາດຈະເປັນໄປໄດ້ ບໍ່ໝາຍຄວາມວ່າ ຕັດຂາດເລີຽວ່າບໍ່ຮັບ."

ໃນວັນປິດການແຂ່ງຂັນກິລາອາຊຽນ ພາຣາເກມ ຢູ່ທີ່ນະຄອນຣາຊະສິມມາ ນັ້ນ ລາວບໍ່ໄດ້ໄປຮັບເອົາທຸງ ໃນການເປັນເຈົ້າພາບກິລາ ອາຊຽນພາຣາເກມ ຈາກປະ ເທດໄທເລີຽ. ທ່ານ ດຣ. ປະເສີດວ່າ ລາວອາດປ່ຽນໃຈ ຮັບໜ້າທີ່ດັ່ງກ່າວໄດ້ ແຕ່ຂໍເບິ່ງເງືອນໄຂ ຂອງການຊ່ວຍເຫລືອ ຈາກສະຫະພັນກິລາ ຄົນພິການແຫ່ງ ອາຊຽນ ທີ່ຈະເດີນທາງ ມາຢ້ຽມຢາມລາວ ໃນໄວໆນີ້ເສັຽກ່ອນ.

ທ່ານວ່າ ສິ່ງທີ່ລາວຕ້ອງການ ໃຫ້ປະເທດເພື່ອນມິດ ຊ່ວຍເຫລືອນັ້ນ ກໍມີ ການປັບປຸງ ໂຄງຮ່າງພື້ນຖານຕ່າງໆ ສຳລັບຈັດການແຂ່ງຂັນກິລາ ຄົນພິການໃຫ້ ຢູ່ໃນລະດັບ ມາຕະຖານ ຣວມໄປເຖິງການສົ່ງຄູຝຶກແອບ ໃຫ້ນັກກິລາຄົນພິການ ຂອງລາວມີຫລາຍຂື້ນ. ຖ້າເງື່ອນໄຂດັ່ງກ່າວນີ້ ຫາກເປັນໄປໄດ້ແລ້ວ ລາວກໍຈະ ຮັບເອົາທຸງ ເປັນເຈົ້າພາບ ຈັດການແຂ່ງຂັນກິລາ ອາຊຽນພາຣາເກມໄດ້.

ສົມເນ ຣາຍງານ