ລາວຢາກຮ່ວມ ອົງການ ການຄ້າໂລກ

ລາຍງານຈາກຫນ່ວຍງານ ດ້ານການ ພິຈາຣະນາ ສະມາຊີກໃຫມ່ ອົງການ ການຄ້າໂລກ ຣະບຸວ່າ ກົດຣະບຽບແລະ ຂໍ້ບັງຄັບໃຫມ່ ທີ່ກ່ຽວພັນກັບ ການເຂົ້າເປັນ ສະມາຊີກອົງການ ການຄ້າໂລກແລະ ສົນທິສັນຍາຕ່າງໆ ທີ່ຕົວແທນຂອງລາວ ແກ້ໄຂດັດແປງ ທີ່ສເນີຕໍ່ຄນະ ກັມມະການ ການຄ້າໂລກ ວ່າງກອງປະຊຸມ ຄັ້ງທີ5 ໃນມື້ວັນທີ14 ເດືອນ ກໍຣະກະດາ ປີ2009 ນັ້ນຈະຊ່ອຍ ສປປລາວ ເຂົ້າໃນຂັ້ນຕອນ ການພິຈາຮະນາ ໃນການເປັນສະມາຊີກ ອົງການ ການຄ້າໂລກ ເປັນຄັ້ງສຸດ ທ້າຍ ກຸ່ມດັ່ງກ່າວຈະເລີ້ມ ພິຈາຣະນາ ແລະທົບທວນ ໃນຫລາຍບັນຫາ ກ່ອນຈະອານຸມັດໃຫ້ ສປປລາວ ເປັນສະມາຊີກ ອົງການ ການຄ້າໂລກໄດ້.

ສປປລາວ ໃຫ້ຄວາມສົນໃຈ ແລະເລີ້ມປະຕິບັດ ສຳເນົາທີ່ຢາກ ເປັນສະມາຊີກ ອົງການ ການຄ້າໂລກ ມາແຕ່ປີ1997 ແລະໄດ້ຮັບຖານະ ຜູ້ສັງເກດການ ໃນປີ1998 ເລີ້ມແຕ່ນັ້ນມາ ທາງການລາວ ກໍ່ພາກັນ ກະຕຽມເອກສານ ເພື່ອຂໍເຂົ້າເປັນ ສະມາຊີກ ຢ່າງເປັນທາງການ ດ້ວຍຄຳແນະນຳ ຊ່ອຍເຫລືອທາງດ້ານ ເທກນີກແລະ  ນັກວີຊາການ ຈາກທະນາຄານໂລກ ທະນາຄານ ພັທນາເອເຊັຽ ແລະກອງທືນສາກົນ ພ້ອມດ້ວຍສະຫະພາບ ຢູໂຣບ ແລະກຸ່ມອາຊຽນ.

ເຈົ້າຫນ້າທີ່ລາວ ໄດ້ພົບປະ ກັບຄນະກັມມະການ ພິຈາຣະຈາ ຂອງອົງການ ການຄ້າໂລກ ມາຫລາຍຄັ້ງແລ້ວ ເພື່ອທົບທວນ ແລະສເນີ ການປະຕິຮູບ ກົດຫມາຍທີ່ ກ່ຽວຂ້ອງ ແລະຈຳເປັນຂອງ ສປປລາວ ໃນການເຂົ້າເປັນ ສະມາຊີກ ດັ່ງກົດຫມາຍການ ລົງທືນການຄ້າ ສິດທິການຄ້າ ໃນລາວແລະ ກົດຣະບຽບຕ່າງໆ ຮ່ວມດ້ວຍ ມາຕຖານສີນຄ້າ ຂອງລາວ. ການພິຈາຣະນາ ໃນຂັ້ນຕອນ ຕໍ່ໄປຖືວ່າເປັນ ຄັ້ງສຳຄັນແລະ ສຸດທ້າຍທີ່ຈະ ຕັດສີນຊາຕາ ຂອງລາວວ່າຈະຖືກ ຮັບເປັນສະມາຊີກ ອົງການ ການຄ້າໂລກ ຫລືບໍ່.