ເຂຕຮ່ວມມືດ້ານກາຣຄ້າ ຂອງສະມາຊິກອາຊ໊ຽນ

ສປຈີນ ສົ່ງເສີມໃຫ້ນັກ ທຸຣະກິຈກາຣຄ້າ ຊາວຈີນ ຈັດຕັ້ງເຂຕກາຣ ຮ່ວມມື ດ້ານເສຖກິຈແລະ ກາຣຄ້າ ກັບບັນດາປະເທສ ສະມາຊິກ ອາຊ໊ຽນ ເພື່ອເປັນກາຣເພີ່ມ ທະວີ ຄວາມຮ່ວມມືໃນ ພູມີພາຄ ໃຫ້ຫລາຍກວ່າເກົ່າ.

ທ່ານ Gao Hucheng ຮອງຣັຖມົນຕຣີ ກະຊວງກາຣຄ້າຈີນ ໃຫ້ຄຳເຫັນດັ່ງກ່າວ ຢູ່ກອງປະຊຸມ ເພື່ອຕຣຽມກາຣຈັດ ງານແສດງສິນຄ້າຈີນ-ອາຊ໊ຽນ ຄັ້ງທີ່ 7 ໃນມື້ວັນພຸທ ຜ່ານມານີ້ ພ້ອມກັບຢືນຢັນວ່າ ກາຣຄ້າຂາຍຣະຫວ່າງ ຈີນ ແລະບັນດາປະເທສ ສະມາຊິກອາຊ໊ຽນ ເພີ່ມທະວີຂຶ້ນ ຢ່າງຫລວງຫລາຍ ໂດຽສະເພາະ ຫລັງຈາກມີ ກາຣຄ້າເສຣີ ຣະຫວ່າງກັນແຕ່ ເດືອນມົກຣາ 2010 ນີ້ເປັນຕົ້ນມາ.

ຂໍ້ມູລກາຣຄ້າຂາຍ ຈາກຫ້ອງກາຣ ພາສີອາກອນ ຣະຫວ່າງ 2 ຝ່າຍໃນໄຕຣມາຕ ທຳອິດຂອງປີ 2009 ຮວມເປັນທັງໝົດ 39.12 ຕື້ດອລລາຣ໌ ສະຫະຣັຖ ທີ່ເປັນອັຕຣາ ເສລັ່ຽເພີ່ມຂຶ້ນ 66% ຂອງຣະຍະດຽວກັນ ໃນປີກ່ອນນັ້ນ.

ສະເພາະສິນຄ້າຈີນ ທີ່ສົ່ງຂາຍໃຫ້ ບັນດາ ປະເທສອາຊ໊ຽນ ເພີ່ມຂຶ້ນ 52.9% ໂດຽມີມູລຄ່າ ທັງໝົດ 18.69 ຕື້ດອລລາຣ໌. ໃນຂະນະດຽວກັນ ສິນຄ້າຈາກ ອາຊ໊ຽນ ເຂົ້າຈີນ ກໍເພີ່ມຂຶ້ນເຊັ່ນກັນ ເຖິງ 80.2% ທີ່ຕົກເປັນມູລຄ່າ ທັງໝົດ 20.43 ຕື້ດອລລາຣ໌.

ຢ່າງໃດກໍຕາມ ເຈົ້າໜ້າກາຣຄ້າ ຂອງຈີນ ຍັງໄດ້ສເນີໃຫ້ທາງ ກາຣກ່ຽວຂ້ອງທັງ ສອງຝ່າຍ ໄດ້ນຳປະຕິບັຕ ຕາມຂໍ້ຕົກລົງ ກາຣຄ້າເສຣີ ຣະຫວ່າງກັນ ໃຫ້ຫລາຍກວ່າ ເກົ່າ ໃນຂັ້ນຕໍ່ໆໄປ ພ້ອມກັບໃຫ້ເພີ່ມ ກາຣຮ່ວມມື ດ້ານກາຣລົງທຶນ ໃນພາຄສ່ວນຕ່າງໆ ໂດຽສະເພາະ ດ້ານກາຣກະເສຕ ດ້ານພັທນາໂຄງຮ່າງ ພື້ນຖານ ແລະ ຊັພຍາກອນມະນຸສ ແລະເພີ່ມຂຍາຍດ້ານ ອຸຕສາຫະກັມ ຕ່າງໆນຳດ້ວຍ.