ຜະແນກ ສາທາຣະນະສຸກ ແຂວງອັຕະປື ເຕືອນປະຊາຊົນ ບໍ່ໃຫ້ກິນ ອາຫານ ສຸກໆດິບໆ

ສານໃບໄມ້ໃນຕັບກາຝາກ ພວກປາດິບ ຈາກການກິນ ປາດິບ ຈະພາໃຫ້ເປັນ ພວກມະເຣັງຕັບ ເປັນກະດັນຕັບ ເພາະວ່າ ປະຊາຊົນ ສ່ວນຫລາຍ ພວກຊຸມຊົນ ເຂົາມັກ ຈະກິນ ປາດິບກັນ.

ຜະແນກສາທາຣະນະສຸກ ແຂວງອັຕະປື ເຕືອນປະຊາຊົນ ບໍ່ໃຫ້ກິນອາຫານ ສຸກໆດິບໆ ເພາະ ອາດເຮັດໃຫ້ ເປັນໂຣກມະເຮັງ ໃນຕັບໄດ້.

ທ່ານວ່າ ພະຍາດ ກາຝາກປະເພດສານໃບໄມ້ໃນຕັບ ໃນກໍພົບເຫັນຫລາຍຢູ່ໃນ ແຂວງອັຕະປື ຫລັງຈາກໄດ້ສຳຣວດ ປະຊາຊົນ ໃນຫລາຍໝູ່ບ້ານ.

(ສຽງ) "ສານໃບໄມ້ໃນຕັບ ກາຝາກພວກປາດິບ ຈາກການກິນປາດິບ ຈະພາໃຫ້ເປັນພວກມະເຣັງຕັບ ເປັນກະດັນຕັບ ເພາະວ່າ ປະຊາຊົນ ສ່ວນຫລາຍ ພວກຊຸມຊົນ ເຂົາມັກຈະກິນປາດິບກັນ."

ທ່ານວ່າ ຈາກການສຳຣວດ ແລະຄົ້ນຄ້ວາ ກ່ຽວກັບ ໂຣກສານໃບໄມ່ໃນຕັບ ຈາກ ຈຳນວນ 10 ໝູ່ບ້ານ ຈະພົບເຫັນຜູ້ປ່ວຍ ປະມານ 30% ທີ່ເປັນໂຣກ ໃບໄມ້ໃນຕັບ ເນື່ອງຈາກວ່າ ຊາວບ້ານຢູ່ຕາມຊົນະບົດ ມັກກິນອາຫານ ປະເພດປາດິບ ຫລືປາແດກ ເປັນສ່ວນໃຫ່ຽ. ຈຳນວນ ທີ່ເປັນພະຍາດນີ້ ທາງສາທາຣະນະສຸກແຂວງ ກໍໄດ້ເອົາຢາຂ້າເຊື້ອໃຫ້ກິນ.

(ສຽງ) "ກິນຢາພວກຂ້າເຊື້ອສານ ຕົວນີ້ເນາະ ຫາກບໍ່ໄດ້ຮັບການປິ່ນປົວ ກໍຈະກາຍເປັນມະເຮັງ ໃນຕັບໄດ້."

ທ່ານ ອະທິບາຍວ່າ ເມື່ອຄົນເຮົາກິນອາຫານສຸກໆດິບໆ ທີ່ມີສານໃບໄມ້ໃນຕັບ ເຂົ້າໄປແລ້ວ ສານນັ້ນກໍຈະເຂົ້າໄປ ອາໃສຢູ່ໃນຕັບ ຂອງຂອງຄົນ. ພາຍໃນ ປະມານນຶ່ງເດືອນ ພະຍາດນັ້ນ ກໍຈະສະແດງ ອາການອອກມາເຊັ່ນວ່າ ມີຄວາມຮູ້ສືກ ບໍ່ສະບາຍໃນຕົວ, ມີອາການເປັນໄຂ້ ເຈັບປວດກ້າມເນື້ອ ກິນເຂົ້າບໍ່ແຊບ ອາການຢາກຂີ້ຢາກຮາກ ຜີວໜັງຫລ້າເຫລືອງ ແລະໜ່ວຍຕາເປັນສີຂາວ.

ບາງກໍຣະນີກໍເບົາບາງ, ບາງກໍຣະນີ ກໍຮຸ້ນແຮງ ສຸດແລ້ວແຕ່ ການພັດທະນາຕົວ ຂອງເຊື້ອພະຍາດ ແລ້ວກໍເຮັດໃຫ້ ຄົນເຈັບປ່ວຍລົງໄປ. ທາງແຂວງອັຕະປື ຈຶ່ງຮຽກຮ້ອງ ມາຍັງປະຊາຊົນ ໃນແຂວງຈົ່ງພະຍາຍາມກິນ ອາຫານທີສຸກໆ ແທນທີ່ຈະກິນ ອາຫານສຸກໆດິບໆ ເພາະວ່າ ເຂດອັຕະປື ກໍມີເຊື້ອພະຍາດ ກາຝາກໃບໄມ້ໃນຕັບ ຢູ່ໃນໂຕປູ ໂຕປາ ແລະໃນ ສິ່ງແວດລ້ອມອື່ນໆ.

ສົມເນ ຣາຍງານ