ແມ່ຍິງລາວທີ່ສູນຫາຍ ໄປຈີນ

ໜ່ວຍງານ ຕ້ານ ການຄ້າມະນຸສ ຂອງລາວ ເປີດເຜີຍວ່າ ທີ່ຜ່ານມາ ທາງການລາວ ໄດ້ຮັບຄໍາ ຮ້ອງຮຽນ ຈາກ ຫລາຍຄອບຄົວ ຢູ່ພາກເໜືອ ຂອງປະເທດ ວ່າລູກສາວ ຂອງ ພວກຂະເຈົ້າ ທີ່ຖືກຄົນຈີນ ມາຂໍແຕ່ງງານ ແລ້ວຫາຍໄປຈີນ ຊື່ງບາງຄອບຄົວ  ກໍບໍ່ແຈ້ງໃຫ້ ທາງການຮູ້ ຫຼືຂໍຄວາມ ຊ່ວຍເຫລືອ. ດັ່ງເຈົ້າໜ້າທີ່ ເວົ້າວ່າ:

"ຕາມທາງ ຂະເຈົ້າ ຟ້ອງຂຶ້ນມາ ຫລືວ່າແຈ້ງຄົນ ບໍ່ເຫັນ ລູກສາວ ກໍມີຫລາຍ ຈໍານວນນຶ່ງ ບາງເທື່ອ ຜູ້ເຫັນຂະເຈົ້າ ກະບໍ່ສົນໃຈ ບາງຊົນເຜົ່າ ບໍ່ຄ່ອຍສົນໃຈ ລູກຜູ້ຍິງ".

ທ່ານເວົ້າວ່າ ມີຫລາຍຄອບຄົວ ທີ່ມາແຈ້ງຄວາມ ວ່າລູກສາວ ຂອງຕົນຫາຍໄປ ຈີນ ແລະ ຄອບຄົວ ທີ່ບໍ່ມາແຈ້ງ ກໍມີພໍສົມຄວນ ແລະວ່າ ປັດຈຸບັນ ທາງການກ່ຽວຂ້ອງ ກໍາລັງ ຮວບຮວມຂໍ້ມູນ ເພື່ອ ຫາທາງ ຊ່ວຍເຫລືອຢູ່. ທ່ານວ່າ ໃນເດືອນ ພຶສພາ 2012 ທາງການຈີນ ກໍໄດ້ຊ່ວຍ ແມ່ຍິງລາວ ທີ່ຖືກຄົນຈີນ ຕົວະຍົວະໄປ ແຕ່ງງານນັ້ນ ໄດ້ 10 ກວ່າຄົນ ທີ່ຫາກໍສົ່ງ ຕົວມາໃຫ້ ທາງການລາວ ເມື່ອບໍ່ດົນ ມານີ້.

ແມ່ຍິງລາວ ທີ່ຖືກ ສົ່ງກັບບ້ານ 10 ກວ່າຄົນ ທີ່ວ່ານັ້ນ ເຈົ້າໜ້າທີ່ ຍັງຖືວ່າເປັນ ຈໍານວນທີ່ໜ້ອຍ ເຕັມທີ່ ຫາກທຽບໃສ່ ຈໍານວນ ທີ່ຫຼາຍຄອບຄົວ ໄດ້ມາແຈ້ງຕໍ່ ທາງການ. ກ່ຽວກັບ ບັນຫານີ້ ເຈົ້າໜ້າທີ່ ຕ້ານການ ຄ້າມະນຸສ ກໍເວົ້າວ່າ ເປັນບັນຫາ ສໍາຄັນ ທີ່ແກ້ໄຂຍາກ ເນື່ອງຈາກວ່າ ມີຊາວຈີນ ເຂົ້າມາຍົວະເອົາ ແມ່ຍິງ ຊົນເຜົ່າລາວ ຢູ່ເລື້ອຍໆ.