ຂົວມິຕພາບແຫ່ງທີ່ 5

ທາງກາຣ ລາວແລະໄທຍ ກຳລັງ ອອກແຜນກາຣ ຂອງ ໂຄງກາຣ ສ້າງຂົວ ມິຕພາບ ຂ້າມ ແມ່ນ້ຳຂອງ ແຫ່ງທີ່ 5.
ຫວາດ ສີມູນ
2012.08.27
N30827WS
ສຽງບັນທຶກໄວ້ ດາວໂລ້ດ

ຄນະກັມກາຣ ສະເພາະກິຈ ກ່ຽວກັບ ໂຄງກາຣສ້າງ ຂົວມິຕພາບ ລາວ-ໄທຽ ຂ້າມແມ່ນ້ຳຂອງ ແຫ່ງທີ່ 5 ໄດ້ຕົກລົງ ເລືອກເອົາເຂຕ ພື້ນທີ່ ກຳໜົດ ການກໍ່ສ້າງ ຢູ່ບ້ານ ຫ້ວຍເສີມເໜືອ ເມືອງແລະແຂວງ ບືງກາຣ ຂອງໄທຽ ຂ້າມໄປຍັງເຂຕ ເມືອງປາກຊັນ ແຂວງບໍຣິຄຳໄຊ ຂອງລາວ.

ທ່ານພອຣສັກ ເຈຣະນັຍ ເຈົ້າແຂວງໆບືງກາຣ ໄດ້ແຈ້ງຕໍ່ທາງ ສື່ມວລຊົນ ໃນມື້ວັນຈັນ ນີ້ວ່າ ທາງຄນະ ຣັຖບາລໄທຽ ໄດ້ຮັບຜ່ານ ກາຣພິຈາຣະນາ ຂອງໂຄງກາຣ ສ້າງຂົວ ຂ້າມແມ່ນ້ຳຂອງ ແຫ່ງໃໝ່ນີ້ແລ້ວ ເປັນຢ່າງດີ ທີ່ຈະຕົກເປັນ ມູລຄ່າ ໃນກາຣກໍ່ສ້າງ ປະມານ 2 ຕື້ບາທ ແລະຄາດວ່າ ຄົງຈະເຣີ່ມລົງມື ກໍ່ສ້າງໄດ້ ພາຍໃນ 3 ປີ ຂ້າງໜ້ານີ້.

ທ່ານເຈົ້າແຂວງ ບືງກາຣ ໄດ້ແຈ້ງເພີ່ມວ່າ ຂົວມິຕພາບ ລາວ-ໄທຽ ຂ້າມແມ່ນ້ຳຂອງ ແຫ່ງໃໝ່ນີ້ ຈະເປັນກາຣຊ່ວຍ ເພີ່ມທະວີ ປະຣິມານ ກາຣຄ້າຂາຍ ຣະຫວ່າງ ລາວ-ໄທຽ ຈາກ 5.4 ຕື້ບາທ (5 ຕື້ 400 ລ້ານບາທ) ໃນປັຈຈຸບັນ ຂຶ້ນມາເປັນ 24 ຕື້ບາທ ຊຶ່ງເປັນມູລຄ່າ ຂອງສິນຄ້າ ທີ່ຜ່ານຂົວມິຕພາບ ຂ້າມແມ່ນ້ຳຂອງ ແຫ່ງທີ່ 1 ຣະຫວ່າງ ໜອງຄາຍ ແລະ ນະຄອນຫລວງ ວຽງຈັນ ໃນເວລານີ້.

ນອກຈາກນັ້ນ ທ່ານ ພອຣສັກ ກໍວ່າ ຂົວຂ້າມແມ່ນ້ຳຂອງ ຈາກບືງກາຣ ໄປຍັງບໍຣິຄຳໄຊ ຍັງຈະເປັນກາຣຊ່ວຍ ໃນກາຣ ລຳລຽງ ສິນຄ້າຈາກໄທຽ ໄປຍັງ ເມືອງວິນຫ໌ (Vinh) ຊາຍແດນວຽຕນາມ ນຳອີກ ທີ່ຈະມີຣະຍະ ທາງທັງໝົດ ປະມານ 335 ກິໂລແມ໊ຕ ຕລອດຮອດ ດ້ານທຸຣະກິຈ ກາຣທ່ອງທ່ຽວ ແລະ ອື່ນໆຫລາຍໆຢ່າງ ທີ່ຈະໄດ້ຮັບ ຄວາມ ສະດວກສະບາຍ ຫລາຍຂຶ້ນ ກວ່າເກົ່າ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.