ການສໍ້ຣາສບໍ່ບັງຫຼວງ ໃນລາວ

ການສໍ້ຣາສ ບັງຫລວງ ເປັນການຄຸກຄາມ ທໍາລາຍ ການພັທນາ ເສຖກິດ ແລະ ສັງຄົມ ຂອງປະເທດ ຊື່ງກົມກວດກາ ແຫ່ງຣັດ ກໍຍອມຮັບວ່າ ບັນຫານີ້ ເກີດຈາກ ເຈົ້າໜ້າທີ່ ພະນັກງານ ທີ່ລະເມີດ ກົດຣະບຽບ ແລະ ການເພີກເສີຽ ຂອງເຈົ້າໜ້າທີ່. ການສໍ້ຣາສ ບັງຫລວງ ໃນລາວ ມີຢູ່ທົ່ວໄປ ຢ່າງກວ້າງຂວາງ ຈື່ງເຮັດໃຫ້ ປະຊາຊົນ ຂາດຄວາມ ເຊື່ອໝັ້ນ ໃນການນໍາພາ ຂອງພັກ ທີ່ມີຂື້ນ ເລື້ອຍໆວ່າ ບໍ່ປາບປາມກັນ ຢ່າງຈິງຈັງ. ເຈົ້າໜ້າທີ່ ຄນະກັມມະການ ສູນກາງພັກ ໄດ້ກ່າວ ກ່ຽວກັບ ເຣື້ອງນີ້ວ່າ:

"ດຽວນີ້ການ ແກ້ໄຂນີ້ກໍ ມັນກໍຈະໃຫ້ ເຕັມຮ້ອຍ ສ່ວນຮ້ອຍ ມັນກໍຍັງ ບໍ່ທັນເຕັມທີ ພຍາຍາມ ຈະສຸມໃຊ້ ຄວາມພຍາຍາມ ທີ່ສຸດເພື່ອ ແກ້ໄຂ ໃຫ້ມັນໄດ້ດີ ເທົ່າທີ່ຄວນ ຄິດວ່າ ຈະດີຂື້ນ ກໍອີງໃສ່ ກົດໝາຍ ອີງໃສ່ ລະບຽບການຕ່າງໆ ເພື່ອ ປະຕິບັດ ຕໍ່ບັນຫານີ້ ໃຫ້ເຂັ້ມງວດ".

ທ່ານວ່າ ການກວດກາ ບັນຫາ ສໍ້ຣາສ ບັງຫລວງ ອຸບປສັກ ຕົ້ນຕໍກໍຄື ພະນັກງານ ເລີ້ມແຕ່ ລະດັບ ສູນກາງ ລົງໄປຮອດ ລະດັບ ທ້ອງຖິ່ນ ຍັງບໍ່ສາມາດ ເຮັດໜ້າທີ່ ຂອງຕົນໄດ້ ຢ່າງສຸດກົກ ສຸດປາຍ ຍັງມີຄວາມ ຢ້ານກົວ ແລະ ເກງໃຈກັນຢູ່ ຕັ້ງແຕ່ ກົມກວດກາ ແຫ່ງຣັດ ໄດ້ຕັ້ງຂື້ນ ເພື່ອແກ້ໄຂ ບັນຫາ ປາກົດວ່າ ບໍ່ເຫັນມີ ພະນັກງານ ຖືກຕັດສີນ ລົງໂທດ ຈໍາຄຸກ ຍ້ອນການສໍ້ໂກງ. ເຈົ້າໜ້າທີ່ ກົມກວດກາ ຄະດີ ອາດຍາ ປະຈໍາອົງການ ອັຍການສູງສຸດ ເວົ້າເປັນ ພາສາໄທວ່າ:

"ກໍາບໍ່ໄດ້ ແຕ່ວ່າ ກໍຈັດຢູ່ ແຕ່ວ່າມັນ ເປັນເຣື້ອງຄະດີ ມັນກ່ຽວກັບ ການສົ່ງຟ້ອງ ຂອງ ອັຍການສານ ຂື້ນສານ ມັນຕ້ອງເປັນ ສະຖິຕິແນວນັ້ນ ແຕ່ທາງເຮົາ ບໍ່ທັນມີ ສະຖິຕິ ວ່າ ຄະດີການ ສໍ່ຣາສ ບັງຫລວງ ຈັກເຣື້ອງ ເຮົາຍັງ ບໍ່ມີຢູ່".

ຕາມຫາງສຽງ ຂອງ ປະຊາຊົນ ທັມມະດາແລ້ວ ໃຜໆກໍວ່າ ເບື່ອໜ່າຍ ນໍາການ ສໍ້ຣາສ ບັງຫລວງ ເຮັດຫຍັງ ກໍມີແຕ່ຊື້ຈ້າງ ໝົດທຸກຢ່າງ ຈະຖືກກົດໝາຍ ຫລືບໍ່ກໍຕາມ ຕ້ອງໄດ້ຊື້ຈ້າງ ເອົາຄວາມ ສະດວກສະບາຍ ໃນການ ແລ່ນວຽກ.