ຊາວສວັນນະເຂຕ ຄອງຖ້າການຊ່ວຍເຫຼືອ

ປະຊາຊົນ ແຂວງ ສວັນນະເຂຕ ຈຳນວນ ຫລວງຫລາຍ ທີ່ໄດ້ ຮັບເຄາະ ຈາກພັຍ ນ້ຳຖ້ວມ ຍ້ອນລົມ ພາຍຸ ໃຕ໊ຝຸ່ນ ຫລາຍລູກ ໄດ້ພັດເຂົ້າ ທໍາລາຍ ສ້າງຄວາມ ເສັຽຫາຍ ໃນຣະຍະ 3 ເດືອນ ທີ່ຜ່ານມາ ນີ້ນັ້ນ ຍັງລໍຖ້າ ຄວາມຊ່ວຍເຫລືອ ຈາກ ທາງກາຣ ຊຶ່ງນອກຈາກ ດ້ານອາຫາຣ ກາຣກິນ ແລະ ເຄື່ອງນຸ່ງຫົ່ມ ແລ້ວ ຍັງຕ້ອງກາຣ ເຄື່ອງອຸປກອນ ເພື່ອທຳມາ ຫາກິນ ແລະ ແນວພັນເຂົ້າ. ດັ່ງຊາວບ້ານ ເມືອງໄຊຍ໌ບູຣີ ຜູ້ນື່ງ ໄດ້ເວົ້າຕໍ່ ຜູ້ສື່ຂ່າວ ເອເຊັຽເສຣີ ວ່າ:

"ເຣື່ອງຕ້ອງກາຣ ກໍບໍ່ໄດ້ ມີອື່ນໄກ ແລ້ວລູກເອີຽ ຢາກໄດ້ ເຂົ້າປູກ ມາເຮັດ ນາແຊງ ຄັນໄດ້ນັ້ນ ແລ້ວ ແມ່ບໍ່ຕາຍ ເຮືອນກໍ (ຖືກນ້ຳ) ຖ້ວມ... ພີ໊..(ຮອດ) ຫົວເຂົ່າ (ພີ້) ນີ້ ເຮືອນຂ້ອຍ ຫາບໍ່ມີ ອີ່ຫຍັງ (ຖືກ) ຖ້ວມໝົດ ເຄື່ອງເຮືອນ ໄປເອົາ ກໍບໍ່ທັນ".

ແຂວງ ສວັນນະເຂຕ ເປັນແຂວງ ທີ່ໄດ້ຮັບ ຄວາມເສັຽຫາຍ ຫລາຍທີ່ສຸດ ຈາກ ລົມພາຍຸ ໄຫມ໋າ ແລະ ນົກເຕັນ ທີ່ພັດຜ່ານ ທາງພາຄເໜືອ ແລະ ພາຄກາງ ຂອງລາວ ແຕ່ທ້າຍ ເດືອນ ມີຖຸນາ ມາຮອດ ເດືອນ ກັນຍາ ທີ່ເຮັດ ໃຫ້ມີ ຝົນຕົກໜັກ ເກີດດິນເຈື່ອນ ແລະ ນ້ຳຖ້ວມ ໃນຫລາຍ ພື້ນທີ່ ເປັນກາຣ ສ້າງຄວາມ ເສັຽຫາຍ ແກ່ໄຮ່ນາ ຮົ້ວສວນ ກວ່າ 7,188 ເຮັກຕ໊າຣ໌ ແລະ ເຮືອນຊານ ບ້ານຊ່ອງ ຂອງ ປະຊາຊົນ ບໍ່ຕໍ່າກວ່າ 2,060 ຫລັງຄາເຮືອນ ພ້ອມກັບ ໂຮງຮຽນ ສີບກວ່າແຫ່ງ ນຳດ້ວຍ.

ຢ່າງໃດ ກໍຕາມ ສໍາລັບດ້ານ ການຊ່ວຍເຫລືອ ນັ້ນ ກໍວ່າມີ ຫລາຍພາຄສ່ວນ ໄດ້ນໍາເອົາ ເຄື່ອງຂອງ ກາຣຊ່ວຍເຫລືອ ຕ່າງໆ ໄປຊ່ວຍ ບັນເທົາທຸກ ໂດຽສະເພາະ ອາຫາຣ ນ້ຳດື່ມ ແລະ ຢາຮັກສາ ໂຣຄ ແຕ່ກໍຍັງບໍ່ ພຽງພໍ ກັບຄວາມ ຕ້ອງກາຣ ຈົນເທົ່າ ປັຈຈຸບັນ ນີ້.