ການປະມູນໄມ້ ໃນລາວປີນີ້

ປັດຈຸບັນນີ້ ທາງການລາວ ກໍາລັງ ຄົ້ນຄວ້າ ຣາຄາປະມູນໄມ້ ຂອງປີນີ້ ເພື່ອສເນີ ໃຫ້ຣັຖມົນຕຣີ ກະຊວງການຄ້າ ພິຈາຣະນາ ແລະ ເຊັນຮັບຮອງ ເພື່ອນໍາໄປເປັນ ຣາຄາກາງ ໃນການປະມູນໄມ້ ທີ່ຈະເປີດຂຶ້ນ ປະມານ ເດືອນມີນາ ໃນທົ່ວທຸກແຂວງ. ຜູ້ທີ່ຈະສາມາດ ປະມູນໄມ້ນີ້ໄດ້ ຈະຕ້ອງເປັນ ໂຮງງານໄມ້ ທີ່ຂຶ້ນທະບຽນ ຢູ່ໃນສປປລາວ ພຽງເທົ່ານັ້ນ. ເຈົ້າໜ້າທີ່ ກົມການຄ້າ ພາຍໃນ ກະຊວງ ອຸດສາຫະກັມ ແລະ ການຄ້າ ນະຄອນຫລວງວຽງຈັນ ກ່າວວ່າ:

“ດຽວນີ້ ຍັງບໍ່ທັນຮູ້ເທື່ອ ຣັຖບານ ກໍາລັງຄົ້ນຄ້ວາຢູ່ ຣາຄາໄມ້ນີ້ ຍັງບໍ່ທັນອອກເທື່ອ ຣາຄາປະມູນ ມັນມີຫລາຍ ບໍ່ສາມາດ ຈະຕອບໄດ້. ດຽວນີ້ ຣັຖມົນຕຣີ ການຄ້າ ກໍາລັງພິຈາຣະນາ ຢູ່ ອອກລາຍເຊັນ ຣາຄາໄມ້ ຂອງປີນີ້ ຍັງບໍ່ທັນ ອອກເທື່ອ.”

ທ່ານ ກ່າວຕໍ່ໄປ ອີກວ່າເມື່ອຣັຖມົນຕຣີ ກະຊວງ ອຸດສາຫະກັມ ການຄ້າ ໄດ້ເຊັນຮັບຮອງແລ້ວ ແລະ ທາງກະຊວງ ກະສິກັມ ປ່າໄມ້ ຈະນໍາເອົາໄມ້ ທີ່ຕັດໄວ້ແລ້ວ ມາໄວ້ຍັງສນາມ 2 ເພື່ອກວດກາໄມ້ ໃນບັນຊີວ່າ ໃນແຕ່ລະແຂວງ ມີໄມ້ປະເພດໃດແດ່. ເມື່ອກວດກາ ສໍາເລັດແລ້ວ, ຈະປະກາດ ໃຫ້ທາງເຈົ້າຂອງ ໂຮງເລື່ອຍ ຮູ້ເຖິງກໍານົດການ ຂອງການປະມູນ ແລະ ທາງຄນະກັມມະການ ເປີດຊອງປະມູນ ໃນການຂາຍໄມ້. ສໍາລັບ ບຸກຄົນ ທີ່ຈະສາມາດ ປະມູນໄມ້ ໄດ້ນັ້ນ ຈະຕ້ອງເປັນ ເຈົ້າຂອງກິຈການ ທີ່ລົງທະບຽນ ໂຮງງານໄມ້ ຢ່າງຖືກຕ້ອງ ຕາມກົດໝາຍ ແລະ ຜູ້ທີ່ຂຸດຄົ້ນໄມ້ ກໍບໍ່ສາມາດ ທີ່ຈະປະມູນ ໄມ້ໄດ້ ເຊັ່ນກັນ:

“ໃຜຈະມາບໍ່ໄດ້ ຕ້ອງແມ່ນຜູ້ມີ ໂຮງເລື່ອຍໄມ້ ໂຮງງານເຮັດໄມ້ ຢູ່ລາວ, ໂຮງງານ ທີ່ຂຶ້ນທະບຽນ ຢູ່ເມືອງລາວຄັກແນ່ ແລ້ວຈຶ່ງຄ່ອຍປະມູນໄດ້ ໂຮງງານ ເຟີນີເຈີບໍ, ໂຮງງານ ອຸດສາຫະກັມໄມ້, ນັກລົງທຶນຊື່ໆ ແມ່ນບໍ່ໄດ້.”

ໃນການຕັດສິນ ການປະມູນໄມ້ ໃນແຕ່ລະຄັ້ງ ຈະມີ 3 ໜ໋ວຍງານ ເຂົ້າເປັນ ກັມມະການຮ່ວມ ຄື ເຈົ້າໜ້າທີ່ ຈາກກົມການຄ້າພາຍໃນ, ກະຊວງກະສິກັມ ປ່າໄມ້ ແລະ ກະຊວງການເງິນ.