ກຸ່ມສະພາບແວດລ້ອມ ຂໍໂຈະເຂື່ອນໄຊຍະບູລີ

ອົງການສະພາບ ແວດລ້ອມ ຢາກໃຫ້ ອອສເຕຣເລັຽ ຊ່ວຍຍັບຍັ້ງ ໂຄງການເຂື່ອນ ໄຊຍະບູລີ ມູນຄ່າ 3 ພັນ 5 ຮ້ອຍລ້ານໂດລາ ຊຶ່ງຈະເປັນເຂື່ອນ ທໍາອິດ ໃນໂຄງການ ພັທນາໄຟຟ້າ ພະລັງນໍ້າ ທັງໝົດ 11 ເຂື່ອນ ທີ່ຈະສ້າງ ໃສ່ແມ່ນໍ້າຂອງ ຕອນລຸ່ມ.  ມີການຍົກບັນຫາ ຜົລກະທົບ ຈາກເຂື່ອນ ໄຊຍະບູລີ ທີ່ຈະມີ ຕໍ່ຊີວະນາໆພັນ ແລະ ຜູ້ຄົນຫລາຍເຖິງ 40 ລ້ານຄົນ ທີ່ຝາກຊີວິດ ໄວ້ກັບແມ່ນໍ້າຂອງ.

ໄທ ແລະລາວ ຢາກຈະເດີນໜ້າ ໃນໂຄງການເຂື່ອນ ໄຊຍະບູລີ ແຕ່ Australia ຜ່ານຄນະກັມມາທິການ ແມ່ນໍ້າຂອງ ຫລື MRC ຫາກສນັບສນູນ ຄວາມວິຕົກກັງວົນ ຂອງວຽດນາມ ແລະ ກັມພູຊາ ກ່ຽວກັບ ໂຄງການດັ່ງກ່າວ. 

ສະຫະຣັຖ ອະເມຣິກາ ໄດ້ຮຽກຮ້ອງໃຫ້ ໂຈະໂຄງການນັ້ນໄວ້ 10 ປີ ເພື່ອສຶກສາ ຜົລກະທົບ ທາງສະພາບແວດລ້ອມ ຕໍ່ໄປ.  ຜູ້ຕາງໜ້າກຸ່ມ ສະພາບແວດລ້ອມ ແມ່ນໍ້າສາກົລ Am Trandem ເວົ້າວ່າ Australia ຕ້ອງກົດດັນ MRC ເພື່ອໃຫ້ແນ່ໃຈ ວ່າທັງ 4 ປະເທດສະມາຊິກ ຄື ລາວ ໄທ ກັມພູຊາ ແລະວຽດນາມ ມີທິດທາງ ປ້ອງກັນລ່ວງໜ້າ ແລະ ໃຫ້ຮູ້ຂໍ້ມູນ ເລື່ອງຜົລກະທົບ ທີ່ຈະເກີດຈາກເຂື່ອນ ນັ້ນ ຢ່າງເຕັມສ່ວນ. ການຕັດສິນ ໃຈຂອງ MRC ກ່ຽວກັບໂຄງການ ເຂື່ອນໄຊຍະບູລີ ອາຈມີຂຶ້ນ ໃນວັນທີ 22 ມີນາ ນີ້.

MRC ຊຶ່ງມີສູນກາງ ຢູ່ລາວ ໄດ້ຮັບການອູ້ມຊູ ທາງການເງິນ ຈາກຕ່າງປະເທດ ໂດຍມີ Australia ເປັນຜູ້ມີສ່ວນຮ່ວມ ທີ່ສໍາຄັນ. ໃນຄໍາຖແລງຢ່າງ ເປັນທາງການ ສປປລາວ ເວົ້າວ່າ ຕົນບໍ່ເຫັນວ່າ ຈະມີເຫດຜົລໃດໆ ໃນການເລື່ອນ ໂຄງການເຂື່ອນ ໄຊຍະບູລີ ທີ່ໄດ້ມາຕຖານ ທຸກຢ່າງ ທັງທາງກົດໝາຍ ສະພາບແວດລ້ອມ ແລະ ທາງສັງຄົມນັ້ນ. ເມື່ອປີ 2007 ລາວ ໄດ້ເຊັນບັນທຶກ ຄວາມເຂົ້າໃຈ ເລື່ອງການຂາຍ ໄຟຟ້າຈາກເຂື່ອນ ໄຊຍະບູລີ ໃຫ້ໄທ 95 ເປີເຊັນ.  ທ່ານ Carl Thayer ນັກວິໄຈການເມືອງ ເວົ້າວ່າ ອອສເຕຣເລັຽ ປະເຊີນກັບຊ່ວງ ເວລາການທູດ ທີ່ຫຍູ້ງຍາກ ຖ້າໄທແລະລາວ ຫາກຕັ້ງໃຈ ຈະເດີນໜ້າ ພັທນາເຂື່ອນໄຟຟ້າ ໄຊຍະບູລີ.