ຊາວເມືອງຄວນຣະວັງ ເຊື້ອໄຂ້ຫວັດຍາມໜາວ

ດຣ. ເປົາລີ ສີຈົມວົງ, ຫົວໜ້າຜແນກ ສາທາຣະນະສຸກ ແຂວງຜົ້ງສາລີ ເຕືອນ ປະຊາຊົນ ທີ່ອາສັຍ ໃນແຂວງ ຜົ້ງສາລີ ວ່າໃນຊ່ວງນີ້ ໃຫ້ຣະວັງ ການຕິດເຊື້ອໄຂ້ຫວັດ ເນື່ອງຈາກວ່າ ສະພາບອາກາດ ໃນລະຍະນີ້ ໜາວຫລາຍ, ອາດຈະສົ່ງຜົນ ກະທົບ ຕໍ່ສຸຂພາບ ຂອງປະຊາຊົນ. ນອກຈາກນັ້ນ, ທາງຜແນກ ສາທາຣະນະສຸກ ຍັງອີງໃສ່ ຄໍາສັ່ງ ຂອງເຈົ້າແຂວງ ຜົ້ງສາລີ ທີ່ສັ່ງໃຫ້ປະຊາຊົນ ທຸກຄົວເຣືອນ ເຝົ້າຣະວັງ ໂຣກ ທີ່ຈະຣະບາດ ໃນຊ່ວງຣະດູໜາວນີ້ ອີກດ້ວຍ.

“ໃນຊ່ວງນີ້ ຄວນຣະວັງ ເປັນຫວັດ ຣະບົບຫາຍໃຈ ນໍ້ມູກໄຫລນີ້ແຫລະ ໜາວເລີຍເນາະ ໜາວລົບສິບຫົກ ອົງສາ ກິນນໍ້າອຸ່ນ ນຸ່ງເຄື່ອງອຸ່ນ ແລ້ວກໍຝິງໄຟ."

ດຣ. ເປົາລີ ກ່າວຕື່ມວ່າ ທາງຜແນກ ສາທາຣະນະສຸກ ໄດ້ປະຕິບັດຕາມ ຄໍາສັ່ງ ຂອງເຈົ້າແຂວງ ທີ່ໄດ້ສັ່ງໃຫ້ປະຊາຊົນ ຢູ່ໃນແຕ່ລະເມືອງ ຂອງແຂວງຜົ້ງສາລີ ໃຫ້ພ້ອມກັນ ຊ່ອຍຮັກສາ ສຸຂພາບ ຂອງຕົນເອງ ແລະ ຄົນໃກ້ຄຽງ, ແລະ ໃຫ້ເຝົ້າຣະວັງ ຕິດພຍາດ ທີ່ຈະຣະບາດ ໃນຊ່ວງ ຣະດູໜາວນີ້.

ທ່ານ ຍັງກ່າວຕື່ມວ່າ ໃນຊ່ວງ ທີ່ອາກາດໜາວເຢັນນີ້ ຍັງບໍ່ໄດ້ຮັບ ຣາຍງານ ວ່າ ມີປະຊາຊົນ ຄົນໃດ ລົ້ມປ່ວຍ ຈົນເຖິງຂັ້ນ ເສັຍຊີວິດ ຄືກັນກັບປີ ຜ່ານມາເທື່ອ ແລະ ບໍ່ມີ ປະຊາຊົນຜູ້ໃດ ມີອາການ     ເປັນໄຂ້ໜັກ ຈົນຕ້ອງມາຮັກສາຕົວ ຢູ່ໂຮງພຍາບານ. ຕາມທີ່ເຫັນ ສ່ວນໃຫຍ່ ຜູ້ທີ່ຕິດເຊື້ອໄຂ້ຫວັດ ອາການບໍ່ຮ້າຍແຮງ ມີພຽງອາການໄອ ແລະ ນໍ້າມູກໄຫລ, ຊຶ່ງກິນຢາ ຢູ່ບ້ານ ກໍເຊົາແລ້ວ. ຕັ້ງແຕ່ມື້ວານ ມາຫາມື້ນີ້ ອາກາດ ກໍດີຂຶ້ນ, ເຣີ້ມມີແດດ ອອກມາໜ່ອຍນຶ່ງ ແຕ່ກໍຍັງ ບໍ່ສາມາດໄວ້ວາງໃຈ ສະພາບອາກາດໄດ້.