ສາທາຣະນະສຸຂເຕືອນ ຊ່ວຍກັນກໍາຈັດຍຸງລາຍ

ໄຂ້ເລືອດອອກ ຫລື ໄຂ້ຍຸງລາຍ ບໍ່ແມ່ນ ສະເພາະ ແຕ່ ແຂວງ ຈໍາປາສັກ, ແຕ່ລະປີ ມີຄົນເຈັບ ແລະ ເສັຍຊີວິດ ຍ້ອນພຍາດ ດັ່ງກ່າວ ເປັນຈໍານວນ ຫລາຍ ສົມຄວນ, ຊຶ່ງການ ແຜ່ເຊື້ອ ພຍາດ ດັ່ງກ່າວ ຈະປາກົດ ມີຢູ່ ຕລອດປີ. ແຕ່ພຍາດນັ້ນ ຮ້າຍແຮງ ທີ່ສຸດ ໃນຊ່ວງ ຣະດູຝົນ ຍ້ອນຍຸງລາຍ ທີ່ເປັນ ພາຫະນະ ນໍາເຊື້ອ ມີການ ແຜ່ພັນ ຫລາຍ, ອີງຕາມ ຣາຍງານ ຈາກ ນະຄອນຫລວງ ວຽງຈັນ ໃນມື້ວັນທີ 18 ກໍຣະກະດາ ນີ້.

ເມື່ອບໍ່ດົນ ມານີ້, ດຣ. ຄໍາໂພ ຈະເຣີນວົງ, ຫົວໜ້າ ຜແນກ ສາທາຣະນະສຸຂ, ແຂວງ ຈໍາປາສັກ ກ່າວຕໍ່ ຜູ້ສື່ຂ່າວ ທ້ອງຖິ່ນ ວ່າ:

ໄຂ້ເລືອດອອກ ຫລື ໄຂ້ຍຸງລາຍ ແມ່ນອີກ ບັນຫາ ນຶ່ງ ທີ່ທາງ ສາທາຣະນະສຸຂ ແຂວງ ຖືເປັນ ວຽກງານ ສໍາຄັນ ໃນການ ຄວບຄຸມ ໃຫ້ຫລຸດລົງ. ແຕ່ລະປີ ຈະມີ ຄົນເຈັບ ແລະ ເສັຍຊີວິດ ຍ້ອນພຍາດ ດັ່ງກ່າວ ຫລາຍ ພໍສົມຄວນ ແລະ ອາການ ຂອງພຍາດ ກໍມີການ ປ່ຽນແປງ ນັບມື້ ຮ້າຍແຮງ ຂຶ້ນ. ໃນລະຍະ ຜ່ານມາ, ເຖິງແມ່ນວ່າ ປະຊາຊົນ ສ່ວນຫລາຍ ມີຄວາມ ຮັບຮູ້ ເຂົ້າໃຈ ເຖິງ ສາເຫດ ທີ່ພາໃຫ້ ເປັນ ໄຂ້ເລືອດອອກ, ແຕ່ຂະເຈົ້າ ຜັດບໍ່ເອົາ ໃຈໃສ່ ໃນການ ປ້ອງກັນ, ເປັນຕົ້ນ ກໍາຈັດ ການ ແຜ່ຂຍາຍ ຂອງຍຸງລາຍ ຄື ການກໍາຈັດ ໜອນນໍ້າ, ທໍາລາຍ ແຫລ່ງເພາະພັນ ຂອງຍຸງ, ນອນກາງມຸ້ງ ແລະ ອື່ນໆ.

ດຣ. ຄໍາໂພ ກ່າວຕື່ມ ອີກວ່າ ທາງແຂວງ ໄດ້ວາງ ມາຕການ ຄວບຄຸມ ພຍາດ ດັ່ງກ່າວ ໃຫ້ມີ ປະສິດທິພາບ ແລະ ສ້າງຄວາມ ເຂົ້າໃຈ ໃຫ້ບັນດາ ເມືອງ, ກຸ່ມບ້ານ ແລະ ສໍານັກງານ ອົງການ ຕ່າງໆ ມີຄວາມ ເຂົ້າໃຈ ແລະ ຮູ້ນໍາເອົາ ເນື້ອໃນ ຈິດໃຈ ດັ່ງກ່າວ, ລົງໄປ ເຜີຍແຜ່ ສູ່ຮາກຖານ ທ້ອງຖິ່ນ ແລະ ທຸກຄອບຄົວ, ແລະ ຮ່ວມກັນ ຈັດຕັ້ງ ປະຕິບັດ ໃຫ້ເກີດຜົນ ເປັນຈິງ, ສ້າງໃຫ້ ປະຊາຊົນ ຮູ້ປ່ຽນແປງ ພຶດຕິກັມ ໃນການ ດໍາຣົງ ຊີວິດ ແລະ ເອົາໃຈໃສ່ ເຄື່ອນໄຫວ ທໍາລາຍ ແຫລ່ງແຜ່ພັນ ຂອງຍຸງລາຍ ໂດຍສ້າງ ຂະບວນການ ທໍາຄວາມ ສະອາດ ສິ່ງແວດລ້ອມ, ເຮືອນຊານ, ກໍາຈັດ ພາຊະນະ ທີ່ບັນຈຸ ແລະ ກັກຂັງ ນໍ້າໄວ້ ໃຫ້ໄດ້ 100% ຂອງຄົວເຮືອນ.