ການນໍາເຂົ້າ ຢາຂ້າຫຍ້າ-ຂ້າໜູ

ໃນ ກອງປະຊຸມ ສໄມສາມັນ ຄັ້ງທີ 2 ຂອງ ສະພາ ແຫ່ງຊາດ ຊຸດທີ 7 ໃນມື້ ວັນທີ 8 ທັນວາ 2011, ຮອງ ສາສດາຈານ ດຣ ຄໍາເຫລັກ ໄຊດາຣາ ສະມາຊິກ ສະພາ ແຂວງ ຫລວງນໍ້າທາ ໄດ້ຮຽກຮ້ອງ ໃຫ້ ຣັຖບານ ເລີກລົ້ມ ການນໍາເຂົ້າ ຢາຂ້າຫຍ້າ ແລະ ຢາ ຂ້າໜູ ຍ້ອນເຫັນວ່າ ສານເຄມີ ດັ່ງກ່າວ ບໍ່ມີປໂຍດ ມີແຕ່ສົ່ງ ຜົນເສັຍ. ດັ່ງທ່ານ ໄດ້ເວົ້າ ໃນຕອນ ນຶ່ງວ່າ:

"ສະເພາະ ຈຸດນີ້ ສະເພາະ ການນໍາເອົາ ຢາຂ້າຫຍ້າ ກັບ ຢາຂ້າໜູ ເຂົ້າມາ ນີ້ ຢາກໃຫ້ ຕັດອອກ ເພາະວ່າ ມັນບໍ່ມີ ຄວາມຈຳເປັນ ຫລາຍ ໃນຊ່ວງ ພັຍນໍ້າຖ້ວມ ໂຕນີ້ ເພາະວ່າ ຜົນທີ່ໄດ້ ນີ້ ມັນໜ້ອຍ ກວ່າ ຜົນ ກະທົບ ຫລາຍ".

ທ່ານ ເວົ້າຕໍ່ວ່າ ຜົນເສັຍ ຂອງການ ນໍາເອົາ ຢາຂ້າຫຍ້າ ແລະ ຢາຂ້າໜູ ເຂົ້າມາ ແມ່ນເຮັດ ໃຫ້ຊາວ ກະສິກອນ ໃຊ້ຢ່າງ ຫລວງຫລາຍ ແລະ ບໍ່ຖືກ ຫລັກການ ຈົນເຮັດໃຫ້ ມີຜູ້ເສັຍ ຊີວິດ ຍ້ອນ ລະຫວ່າງ ປີ 2006 ຫາ 2008. ຍ້ອນຄວາມ ມັກງ່າຍ ຊາວກະສິກອນ ສີດຢາ ຂ້າຫຍ້າ ແລະ ຂ້າໜູ ໂດຍບໍ່ໄດ້ ນຸ່ງຫົ່ມ ເຄື່ອງ ປ້ອງກັນໂຕ. ນອກຈາກນັ້ນ ເມື່ອສີດ ແລ້ວໃໝ່ໆ ຍັງປ່ອຍໃຫ້ ເດັກນ້ອຍ ໄປແລ່ນຫລິ້ນ ແຕະຕ້ອງ ສານເຄມີ ຈົນເກີດ ເປັນພະຍາດ ຕ່າງໆ ຕາມມາ.

ປັດຈຸບັນ ຍັງມີ ການລັກ ນໍາເຂົ້າ ສານເຄມີ ກະສິກັມ ຊນິດຕ່າງໆ ຫລາຍຢູ່ ເຖິງວ່າ ທາງການ ໄດ້ສັ່ງຫ້າມ ແລ້ວກໍຕາມ. ເຈົ້າໜ້າທີ່ ຜແນກ ຊັພຍາກອນນໍ້າ ແລະ ສິ່ງແວດລ້ອມ ປະຈໍາແຂວງ ຫລວງນໍ້າທາ ຜູ້ນຶ່ງ ເວົ້າກ່ຽວກັບ ເຣື້ອງນີ້ວ່າ:

"ບາງຄົນ ຍັງລັກເອົາ ເຂົ້າມາ ຕາມເຂດ ຊາຍແດນ ເຖິງວ່າ ຈະມີການ ຕິດຕາມ ກວດກາ ກະຍັງບໍ່ ລະອຽດ ໂດຍສະເພາະ ຢູ່ຕາມ ຊາຍແດນ ເຮົາບໍ່ ສາມາດ ມີເຈົ້າໜ້າທີ່ ໄປປະຈໍາ ຢູ່ທຸກບ່ອນ ໄດ້".

ເຖິງຢ່າງໃດ ກໍຕາມ ການໃຊ້ ສານເຄມີ ກະສິກັມ ຊນິດຕ່າງໆ ສົ່ງຜົນ ກະທົບ ໂດຍກົງ ຕໍ່ ທັມມະຊາດ, ສິ່ງແວດລ້ອມ, ແລະ ຊັພຍາກອນນໍ້າ ສະນັ້ນ ຣັຖບານ ຈຶ່ງຄວນ ທວນຄືນ ເຖິງຜົນເສັຍ ດັ່ງກ່າວ ມານີ້.