ນັກຂ່າວຈົບອົບຮົມ ພລັງງານ

ທ່ານວິທູນ ເພີ້ມພົງ ສາຈະເຣີນ ຜູ້ອຳນວຍການ ເຄືອຂ່າຍ ພລັງງານ ເພື່ອ ນິເວດວິທຍາ ໃນລຸ່ມ ແມ່ນ້ຳຂອງ ຕົວແທນ ຜູ້ຈັດການ ອົບຮົມ ຜູ້ສື່ຂ່າວ ພລັງງານ ລຸ່ມນ້ຳຂອງ ຣະຫວ່າງ ວັນທີ່ 17-20 ມົກຣາ 2012 ຫວັງວ່າ ນັກຂ່າວ ທີ່ເຂົ້າຮ່ວມ ຈະສາມາດ ນຳເອົາຄວາມຮູ້ ຈາກການອົບຮົມ ໄປພັທນາ ວຽກຂ່າວ ດ້ານພລັງງານ ໃນປະເທດ ໄດ້:

“ປໂຍດ ຂອງນັກຂ່າວ ທີ່ໄດ້ມາຮ່ວມ ຈະໄດ້ຮັບ ກໍຄື ຖ້າເຂົາຈະຕ້ອງ ໄປເຮັດຂ່າວ ໃນບາງປະເດັນ ທີ່ມັນມີຜົນ ຂ້າມພົມແດນ ເຂົາຈະຮ່ວມມື ຊ່ວຍເຫລືອກັນ ເພາະວ່າໃນ ເວລານີ້ ປະເດັນ ຂອງຂ່າວ ໂດຍສະເພາະ ບັນຫາທີ່ ກ່ຽວຂ້ອງ ກັບເຣື້ອງດ້ານ ໄຟຟ້າ ມັນບໍ່ໄດ້ ຢູ່ທີ່ປະເທດ ດຽວແລ້ວ ມັນທີຜົນ ຕໍ່ເນື່ອງ ຊຶ່ງກັນ ແລະກັນ”.

ທ່ານເວົ້າ ຕໍ່ໄປວ່າ ຈຸດມຸ້ງໝາຍ ຂອງການຈັດ ການອົບຮົມ ເທື່ອນີ້ ແມ່ນເພື່ອໃຫ້ ນັກຂ່າວ ສາຍພລັງງານ ຈາກປະເທດ ລຸ່ມ ແມ່ນ້ຳຂອງ 30 ຄົນ ຈາກ 6 ປະເທດ ອັນປະກອບ ດ້ວຍ ລາວ ໄທ ວຽດນາມ ພະມ້າ ກຳພູຊາ ແລະ ຈີນ ນັ້ນມີຄວາມ ເຂົ້າໃຈທີ່ ຖືກຕ້ອງ ແລະ ສອດຄ່ອງກັນ ກ່ຽວກັບ ພລັງງານ ໃນລຸ່ມນ້ຳຂອງ ບໍ່ວ່າຈະເປັນ ໂຄງການ ກໍ່ສ້າງເຂື່ອນ ການ ບໍຣິຫານນ້ຳ ຫລືແມ້ນແຕ່ ການສ້າງ ໂຮງໄຟຟ້າ ປະພດອື່ນໆ ເນື່ອງຈາກ ໃນຫລາຍມື້ ຜ່ານມາ ບັນດາ ນັກຂ່າວ ໄດ້ຟັງຂໍ້ມູນ ຈາກຜູ້ສ້ຽວຊານ ໄທບ້ານ ທີ່ໄດ້ຮັບ ຜົນສະທ້ອນ ຫລືແມ້ແຕ່ ຜູ້ໃຫ້ທຶນ ສນັບສນູນ ໂຄງການ ຜລິຕໄຟຟ້າ ໃນລຸ່ມ ແມ່ນ້ຳຂອງ. ນອກຈາກນັ້ນ ທີ່ສຳຄັນ ທີ່ສຸດ ນັກຂ່າວໄດ້ສ້າງ ເຄືອຂ່າຍ ຣະຫວ່າງ ນັກຂ່າວ ພລັງງານ ຮ່ວມເຖິງ ນັກວິຊາການ ແລະ ນັກເຄື່ອນໄຫວ ເພື່ອເປັນປໂຍດ ໃນການ ແລກປ່ຽນຂໍ້ມູນ ແລະ ການຂຽນຂ່າວ ໃນອະນາຄົດ.

ທ່ານຍັງໄດ້ ເວົ້າຕື່ມວ່າ ການອົບຮົມ ແບບດຽວກັນນີ້ ອາດຈັດຂຶ້ນອີກ ໃນ 3 ປີ ຂ້າງໜ້າ ເພື່ອເປັນເວທີ ໃຫ້ນັກຂ່າວ ນັກວິຊາການ ນັກເຄື່ອນໄຫວ ຮວມທັງ ຜູ້ທີ່ສົນໃຈ ສາມາດແລກປ່ຽນ ຄວາມຄິດເຫັນ ຂໍ້ມູນ ແລະ ສ້າງເຄືອຂ່າຍ ເພື່ອໃຫ້ ສາມາດນຳ ຄວາມຮູ້ ແລະ ຄວາມເຂົ້າໃຈ ຈາກການ ຈັດການ ຊຸມນຸມ ເທື່ອນີ້ ໄປໃຊ້ໃນການ ພັທນາ ວຽກງານ ດ້ານພລັງງານ ຂອງແຕ່ລະ ປະເທດ ໃນ ອະນາຄົດ.