ການໃຊ້ຄວາມຮຸນແຮງ ກັບເດັກນ້ອຍໃນເອເຊັຍ

ການໃຊ້ຄວາມ ຮຸນແຮງ ຕໍ່ຮ່າງກາຍ ຂອງເດັກນ້ອຍ ຢູ່ຂົງເຂດ ເອເຊັຽ ຕາເວັນອອກ ແລະ ເອເຊັຍ ປາຊີຟິກ ເຮັດໃຫ້ເກີດ ຄວາມເສັຍຫາຍ ທີ່ຍາວນານ ໃນຊີວິດ ແລະ ອະນາຄົດ ຂອງພວກເຂົາເຈົ້າ. ຕາມການຣາຍງານ ຂອງກອງທຶນ ເພື່ອເດັກນ້ອຍ ຂອງ ສະຫະປະຊາຊາດ UNICEF ທີ່ຈະເຜີຍແພ່ ໃນມື້ນີ້.

ຣາຍງານ ທີ່ມີຫົວຂໍ້ວ່າ ການໃຊ້ຄວາມຮຸນແຮງ ຕໍ່ຮ່າງກາຍ ຂອງເດັກນ້ອຍ: ຄວາມຍືດເຍື້ອ ແພ່ຂຍາຍ ຂອງອຸປຕິເຫດ ແລະ ຜົນທີ່ຕາມມາ ຢູ່ເອເຊັຍ ຕາເວັນອອກ ແລະປາຊີຟິກ ນັ້ນ ເປັນຄັ້ງທໍາອິດ ທີ່ໄດ້ມີການ ວິເຄາະ ຢ່າງກວ້າງຂວາງ ໂດຍການສຶກສາ ຂອງນັກຊ່ຽວຊານ ແລະ ບັນດິດ ຫລາຍທ່ານ ກ່ຽວກັບ ການທາລຸນ ເດັກນ້ອຍ ຢູ່ໃນຂົງເຂດນີ້.

ການສຶກສາ ທີ່ວ່ານີ້ ກວມເອົາ ຣະຍະເວລາ ແຕ່ເດືອນ ມົກກະຣາ ປີ 2000 ເຖິງເດືອນ ພຶສຈະກາ ປີ 2010. ມີການປະເມີນວ່າ ຄວາມຖີ່ ຂອງການທາລຸນ ຮ່າງກາຍ ເດັກນ້ອຍ ແມ່ນແຕກຕ່າງກັນ ໃນແຕ່ລະປະເທດ ແລະໃນການ ສຶກສາ ແຕ່ລະເທື່ອ. ໃນຣາຍງານນັ້ນ ພົບວ່າ ແມ່ນແຕ່ ກໍຣະນີ ດີທີ່ສຸດ ກໍຍັງມີເດັກນ້ອຍ 1 ຄົນ ໃນຈໍານວນ 10 ຄົນ ຖືກ ທາຣຸນຮ່າງກາຍ ຂນະທີ່ກໍຣະນີ ຂີ້ຮ້າຍທີ່ສຸດ ແມ່ນມີເດັກນ້ອຍ ຖືກທາຣຸນ ຢ່າງທໍຣະມານ ເຖິງປະມານ 30.3%. ການທາຣຸນ ຮ່າງກາຍ ຢ່າງຮຸນແຮງ ທີ່ວ່ານັ້ນ ມີທັງການເອົາ ໄມ້ຕີ ກໍາປັ້ນຊັດ ຈົນເຮັດໃຫ້ ເດັກນ້ອຍບາດເຈັບ. ຄວາມເສັຍຫາຍ ຂອງເດັກນ້ອຍ ທີ່ວ່ານັ້ນ ເກີດຈາກທັງຖືກ ທາຣຸນທາງເພສ ແລະ ການທາຣຸນ ຮ່າງກາຍ ຊຶ່ງເປັນບັນຫາ ທີ່ຮ້າຍແຮງ ທີ່ສຸດ ຢູ່ຕລອດມາ.