ເຂຕເສຖກິຈພິເສດ ບໍ່ເຕັນມີໝີເຖື່ອນ

ທາງກາຣລາວ ຕຣຽມ ປະສານງານ ກັບ ທາງກາຣ ແຂວງ ຫລວງນໍ້າທາ ເພື່ອນໍາຫາ ຜູ້ລັກລອບ ນໍາເອົາໝີ ເຂົ້າມາລ້ຽງ ແບບຜິດ ກົດໝາຍ.
ຫວາດ ສີມູນ
2011.05.16
F-bears ອົງກາຣ ເອກກະຊົນ ຂອງ ສິງຄະໂປ ຈະໃຫ້ການ ຊ່ວຍເຫລືອ ສ້າງສູນບໍາບັດ ໝີ
flickr.com

ກົດຟັງສຽງ

ເນື່ອງຈາກວ່າ ມີກາຣ ລັກລອບ ນຳເອົາໝີ ຈາກ ວຽຕນາມ ເຂົ້າມາລ້ຽງ ໃນເຂຕເມືອງ ບໍ່ເຕັນ ແຂວງ ຫລວງນ້ຳທາ ເພື່ອຜລິຕ ບີໝີ ເພື່ອຂາຍ, ທີ່ເຊື່ອວ່າ ມີຫລາຍ ພໍສົມຄວນ ໃນຣະຍະ ຜ່ານມາ, ທັ້ງໆທີ່ ຮູ້ວ່າ ມັນຜິດກົດໝາຍ.

ທາງກາຣລາວ ກໍຫາ ວິທີທາງ ແກ້ໄຂ ຈຶ່ງໄດ້ ມີກາຣ ປະສານງານ ກັບ ທາງກາຣ ເມືອງບໍ່ເຕັນ ເພື່ອນໍາຫາ ຜູ້ກະທຳຜິດ ມາດຳເນີນ ຄະດີ ຕາມກົດໝາຍ. ດັ່ງເຈົ້າໜ້າທີ່ ແຜນກ ອະນຸຮັກ ສັຕປ່າ ກະຊວງ ກະສິກັມ ແລະ ປ່າໄມ້ ນະຄອນຫລວງ ວຽງຈັນ ໄດ້ກ່າວວ່າ:

“ເຈົ້າຂອງ ຟາຣ໌ມ ຄິດວ່າ ເປັນຄົນວຽຕ ຫລືວ່າ ຄົນຈີນ ກໍບໍ່ທັນຮູ້ ຂໍ້ມູລ ແຕ່ວ່າ ຣັຖບາລລາວ ກຳລັງ ເອົາຂໍ້ມູລ ຈາກທີ່ນັ້ນ ຕ້ອງຫາຕົວ ຜູ້ກະທຳຜິດ ມາດຳເນີນ ຄະດີ ຕາມຣະບຽບ ກົດໝາຍ ຂອງລາວ ແຕ່ວ່າຢູ່ທີ່ ບໍ່ເຕັນ ປະທານ ຄາສິໂນ ຍິນດີ ໃຫ້ດຳເນີນ ກາຣໄດ້ ແຕ່ວ່າເຂົາ ກໍບໍ່ທັນ ຮູ້ວ່າ ແມ່ນໃຜ ເປັນເຈົ້າຂອງ ເໝືອນກັນ ຫລືວ່າເຂົາ ຈະປິດລັບ ກໍບໍ່ຮູ້ ນຳເຂົາ”.

ພ້ອມດຽວກັນນີ້ ທ່ານກໍວ່າ ຜູ້ທີ່ເຝົ້າ ຟາຣ໌ມ ລ້ຽງໝີ ກໍຢືນຢັນ ວ່າບໍ່ຮູ້ ຜູ້ເປັນ ເຈົ້າຂອງ ແລະ ກໍບໍ່ຮູ້ວ່າ ໝີນັ້ນ ນຳມາຈາກ ໃສແທ້ ເພາະມີ ໜ້າທີ່ພຽງ ຮັກສາ ຟາຣ໌ມ ເທົ່ານັ້ນ ຊຶ່ງກໍເປັນ ຟາຣ໌ມ ລ້ຽງໝີ ທີ່ຢູ່ໃນ ເມືອງ ບໍ່ເຕັນ ທີ່ເປັນເຂຕ ເສຖກິຈ ພິຈເສດ ຂອງຈີນ ແລະ ເວລາທີ່ ຣັຖບາລລາວ ຕ້ອງກາຣ ເຂົ້າໄປ ດຳເນີນກາຣ ບໍ່ວ່າໃນ ກໍຣະນີ ໃດໆນັ້ນ ຈະຕ້ອງໄດ້ຮັບ ອະນຸຍາຕ ຈາກ ຣັຖບາລຈີນ ເສັຽກ່ອນ.

ທາງກາຣ ສປປລາວ ຕ້ອງກາຣ ທີ່ຈະນຳ ເອົາໝີ ທີ່ຖືກ ທໍຣະມານ ຢູ່ຕາມ ຟາຣ໌ມລ້ຽງ ຕ່າງໆນັ້ນ ມາບຳບັຕ ຮັກສາ ຢູ່ສູນ ອະນຸຮັກໝີ ທີ່ໄດ້ຮັບທຶນ ກາຣຊ່ວຍເຫລືອ ຈາກອົງກາຣ ເອກຊົນ ຂອງ ສິງຄະໂປ. ດັ່ງທີ່ທ່ານ ໃຫ້ກາຣຊີ້ແຈງ ອີກວ່າ:

“ຫລັງຈາກ ອະນຸມັຕ ຈາກ ຣັຖບາລລາວ ໃຫ້ດຳເນີນ ໄປຈັບເອົາ ໝີມາ ເພື່ອລ້ຽງໄວ້ ແຕ່ວ່າລາວ ຍັງບໍ່ທັນມີ ສູນ ລ້ຽງໝີ ຈະໄດ້ຮັບ ກາຣຊ່ວຍເຫລືອ ຈາກ ສິງຄະໂປ ດຽວນີ້ທາງ ບໍ່ເຕັນ ເຂົາເຫັນດີ ໃຫ້ເຄື່ອນຍ້າຍ ໝີ ແຕ່ວ່າພວກເຮົາ ຍັງບໍ່ທັນມີ ສູນ ອະນຸຮັກ ໝີ ກໍເລີຽ ເຄື່ອນຍ້າຍ ມາບໍ່ໄດ້”.

ເຈົ້າໜ້າທີ່ ລາວ ທ່ານນີ້ ໄດ້ກ່າວເນັ້ນວ່າ ກາຣລ້ຽງໝີ ທີ່ເປັນ ສັຕປ່າ ທີ່ໄດ້ຮັບ ກາຣຄຸ້ມຄອງ ແລ້ວນັ້ນ ກໍຈະຕ້ອງ ໄດ້ຮັບ ອະນຸຍາຕ ຈາກທາງ ຣັຖບາລ ເສັຽກ່ອນ. ສະນັ້ນ ກາຣທີ່ ລັກລອບ ນຳເອົາໝີ ເຂົ້າມາລ້ຽງ ຢູ່ໃນ ຟາຣ໌ມ ເມືອງບໍ່ເຕັນ ກໍຍິ່ງເປັນ ກາຣດຳເນີນ ທຸຣະກິຈ ທີ່ຜິດຕໍ່ ກົດໝາຍ ຄຸ້ມຄອງ ສັຕປ່າ ໃນເມືອງລາວ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.