ຄົນງານເຖື່ອນໃນລາວ

ຣັຖບານລາວ ຖືກຕ້ອງຕິວ່າ ຂາດຄວາມສາມາດ ໃນການຄວບຄຸມ ຄົນງານ ຜິດກົດໝາຍ ທີ່ມາຈາກ ວຽດນາມ ແລະ ຈີນ.
ໂພໄຊສວັດ
2011.04.14
F-Foreign-laborer ຄົນງານທີ່ເຮັດວຽກຕາມເຂດເສຖກິດພິເສດແຂວງບໍ່ແກ້ວສ່ວນໃຫຍ່ ຈະເປັນຄົນງານທີ່ລົງມາຈາກພາກໃຕ້ຂອງຈີນນັບແຕ່ຄົນງານກໍ່ສ້າງ ຈົນເຖີງຂັ້ນບໍຣິຫານ
RFA

ກົດຟັງສຽງ

ປັດຈຸບັນນີ້ຊາວຕ່າງປະເທດທີ່ມາປະກອບອາຊີບຕັ້ງຮ້ານຄ້າຂາຍຫລືຮ້ານບໍຣິການ ປະເພດຕ່າງໆຮວມທັງການຮັບຈ້າງຢ່າງຜິດກົດໝາຍໃນລາວມີຈໍານວນເພີ້ມຂຶ້ນ ທັ້ງໆທີ່ຣັຖບານລາວອ້າງມາຕລອດວ່າໄດ້ພຍາຍາມແກ້ໄຂໃຫ້ຫລຸດໜ້ອຍລົງ.

ກະຊວງແຮງງານແລະສວັດດີການສັງຄົມໄດ້ເປີດເຜີຍວ່າປັດຈຸບັນມີຊາວຕ່າງດ້າວ ທີ່ອາສັຍຢູ່ສປປລາວແບບຜິດກົດໝາຍປະມານ2ແສນຄົນຊຶ່ງມີສຽງຈົ່ມວ່າກຸ່ມຄົນ ເຫລົ່ານີ້ໄດ້ເຂົ້າມາຍາດແຍ່ງບ່ອນທໍາມາຫາກິນແລະອາຊີບການງານທີ່ສງວນໄວ້ ໃຫ້ປະຊາຊົນລາວຕາມກົດໝາຍວ່າດ້ວຍແຮງງານ.

ຜົນເສັຍຫາຍທີ່ຕາມມາກໍຄືຄົນລາວຈໍານວນຫລາຍບໍ່ມີວຽກເຮັດງານທໍາແລະເຮັດ ໃຫ້ສັງຄົມຂາດຄວາມເປັນລະບຽບຮຽບຮ້ອຍ.ເຫດຜົນທີ່ບໍ່ສາມາດແກ້ໄຂບັນຫາ ດັ່ງກ່າວໃຫ້ລຸລ່ວງໄປໄດ້ກໍເພາະວ່າກົດໝາຍແຮງງານແລະລະບຽບການກ່ຽວຂ້ອງ ຕ່າງໆຂອງສປປລາວຍັງບໍ່ເຂັ້ມງວດແລະມີປະສິດທິພາບພຽງພໍ.

ອັນນຶ່ງຍ້ອນວ່າທາງຣັຖບານຍັງມີຄວາມລະມັດລະວັງຕໍ່ຄວາມສໍາພັນມິຕພາບຂອງ ພົລເມືອງຂອງປະເທດທີ່ເຂົ້າມາອາສັຍໃນລາວຊື່ງເປັນວຽດນາມແລະຈີນ.

ສໍາລັບພົລເມືອງຈາກປະເທດອື່ນໆໂດຍສະເພາະແມ່ນຄົນຕ່າງປະເທດເຊື້ອສາຍ ລາວທີ່ກັບມາທ່ອງທ່ຽວຫລືຢ້ຽມຢາມຍາດຕິພີ່ນ້ອງຢູ່ບ້ານເກີດເມືອງນອນຂອງຕົນ ຊໍ້າພັດຕົກເປັນເປົ້າໝາຍຖືກຕິດຕາມຢ່າງໃກ້ຊິດຈາກເຈົ້າໜ້າທີ່ຂອງລາວ.

ອີງຕາມມະຕິຕົກລົງຂອງຣັຖບານກ່ຽວກັບທິດທາງແລະວິທີແກ້ໄຂບັນຫານີ້-ເຫັນ ວ່າສປປລາວຈະໃຊ້ມາຕການຄຸ້ມຄອງຊາວຕ່າງປະເທດທີ່ອາສັຍຢູ່ລາວແບບບໍ່     ຖືກຕ້ອງຕາມກົດໝາຍຢ່າງເຂັ້ມງວດ,ແຕ່ຈົນເຖິງປັດຈຸບັນນີ້ຈໍານວນຄົນຕ່າງປະ ເທດທີ່ຍາດແຍ່ງຜົນປໂຍດຂອງພົລເມືອງລາວຢ່າງບໍ່ຖືກຕ້ອງຕາມກົດໝາຍຍິ່ງ ທະວີຄູນຂຶ້ນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.