ອຸປກອນການກະເສຕໄທ ຈະຂຍາຍກິຈການຫາລາວ

ບໍລິສັດ ໂຮງງານ ກະສິກອນ ແລະ ອຸປກອນ ການກະເສຕໄທ ຫລື KF&E ຈະຂຍາຍ ກິຈການ ເຊົ່າເຄື່ອງຈັກ ການກະເສຕ ໃນລາວ ເພື່ອໄວ້ ບໍຣິການ ໃຫ້ນັກລົງທຶນ ຊາວໄທຢູ່ລາວ ທີ່ມີຈໍານວນ ຫຼາຍຂຶ້ນ.
ໂພໄຊສວັດ
2012.05.17

ປະທານ ບໍຣິຫານ ບໍຣິສັດ KF&E ທ່ານ ສາສວັດ ວິຣະປຣີຢາ ກ່າວວ່າ ການເອົາທ່າທີ ຂອງທາງບໍຣິສັດ ກໍເພື່ອກະຕຽມ ແນໃສ່ ປະຊາຄົມ ອາຊຽນ ທີ່ຈະເລີ້ມໃນປີ 2015.

ທ່ານກ່າວວ່າ ບໍຣິສັດຈາກໄທຫລາຍ ບໍລິສັດ ໄດ້ເຂົ້າມາລົງທຶນ ໃນລາວ ຍ້ອນວ່າ ມີແຮງງານ ທີ່ຖືກກວ່າຢູ່ໄທ ແລະຫລາຍບໍຣິສັດ ໄດ້ຮັບ ສໍາປະທານ ໃນການລົງທຶນ ຕ່າງໆ.

ທ່ານກ່າວຕໍ່ໄປວ່າ ປີກາຍນີ້ ບໍລິສັດ KF&E ໄດ້ປ່ອຍໃຫ້ ບໍຣິສັດ ກໍ່ສ້າງໄທ ທີ່ໄປກໍ່ສ້າງ ໂຄງການ ຕ່າງໆ ໃນລາວ ເຊົ່າເຄື່ອງຈັກ ຈໍານວນຫລາຍ ແລະມີແຜນການ ຈະຂຍາຍອອກໄປອີກ ໃນປີນີ້ ແລະທາງບໍຣິສັດ ມີຄວາມ ເຊື່ອໝັ້ນວ່າ ຈະສາມາດ ບັນລຸເປົ້າໝາຍໄດ້ 10 ຕື້ບາດ ພາຍໃນປີນີ້ ແລະຫວັງວ່າຈະໄດ້ເປັນ ຜູ້ນໍາຂອງຕລາດ ພາຍໃນ 2 ປີ ຂ້າງໜ້ານີ້.

ທ່ານ ສາສວັດ ອະທິບາຍວ່າ ທາງບໍຣິສັດ ໄດ້ຟື້ນຟູ ຈາກວິກິດການ ເຫດນໍ້າຖ້ວມ ເມື່ອປີກາຍນີ້ ແລະພາຍໃນໄຕຣມາດ ທໍາອິດຂອງປີນີ້ ໄດ້ປ່ອຍເຄື່ອງຈັກ ໃຫ້ເຊົ່າ 92 ສ່ວນຮ້ອຍ ມີມູນຄ່າທັງໝົດ 8.6 ຕື້ບາດ ຊຶ່ງການໃຫ້ ກູ້ຢືມເງິນ ເພື່ອເຊົ່າເຄື່ອງຈັກ ສ່ວນໃຫຍ່ ມາຈາກ ບໍຣິສັດ ຂນາດນ້ອຍ ແລະຂນາດກາງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.