ຄົນຕ່າງດ້າວເຂົ້າມາລາວ ເພີ້ມຂື້ນທຸກມື້

ຄົນລາວ ທ່ານນື່ງ ທີ່ ແຂວງອຸດົມໄຊ ເວົ້າວ່າ ທຸກມື້ນີ້ ມີຄົນຕ່າງຊາດ ເຂົ້າມາລາວ ເປັນຈຳນວນ ຫລວງຫລາຍ ແລະ ໃນຫລາຍຮູບແບບ ສ່ວນໃຫຍ່ ແມ່ນເຂົ້າມາ ຊອກຫາ ຜົລປະໂຫຍດ ສຳລັບ ຂະເຈົ້າເອງ ຈື່ງເຮັດໃຫ້ ຊາວລາວສ່ວນຫລາຍ ບໍ່ພໍໃຈ ໂດຍສະເພາະ ພໍ່ຄ້າແມ່ຄ້າ ແລະ ກັມມະກອນ ເພາະຄົນຕ່າງດ້າງ ພາກັນມາ ຍາດອາຊີບ ຂະເຈົ້າ. ໃນບັນຫານີ້ ຍັງບໍ່ຖືກ ແກ້ໄຂຈັກເທື່ອ ຍ້ອນຣັຖບານ ບໍ່ຈິງຈັງ ຫຼືກວດກາ ເພື່ອແກ້ໄຂ. ຄົນຜູ້ນີ້ເວົ້າວ່າ:

"ຢ້ານສຸດ ທຸກມື້ນີ້ ເຮົາກໍເຫັນ ຫລາຍປະເທດ ເຂົາເຂົ້າມາ ຈະເອີ້ນວ່າ ຊ່ອຍເຫລືອ ສ້າງສາ ພັທນາ ປະເທດຊາດ ແຕ່ເນື້ອແທ້ ເຮົາກໍບໍ່ຮູ້ຈິດໃຈ ຂະເຈົ້າວ່າເນື້ອແທ້ ມັນເປັນ ແນວໃດແທ້ ເຂົາເຂົ້າມາ ພ້ອມແລ້ວ ຄົນເຂົາກໍເຂົ້າມາ ເດີນໄປເດີນມາ ແລ້ວກໍມີບັນຫາ ປ້ອງກັນເລື້ອງນີ້ ເຮົາກໍບໍ່ສູ່ເຮັດ ໄດ້ດີປານໃດ".

ເລົາເວົ້າ ຕໍ່ໄປວ່າ ຄົນຕ່າງດ້າວ ທີ່ເຂົ້າມາລາວ ສ່ວນໃຫຍ່ ແມ່ນຄົນຈີນ ແລະ ວຽດນາມ ສຳລັບຄົນຈີນ ນັ້ນ ຣັຖບານຈີນ ອາດມີ ນະໂຍບາຍ ສົ່ງຄົນ ຂະເຈົ້າອອກ ໄປຢູ່ຕ່າງປະເທດ ແລະ ຄົນຈີນ ທີ່ມາຢູ່ລາວ ນັ້ນ ກໍບໍ່ສາມາດ ເວົ້າໄດ້ວ່າ ຄົນເຫລົ່ານີ້ ຕ້ອງການຫຍັງ ຈາກລາວ ອາດເຂົ້າມາເພື່ອ ຢູ່ອາສັຍ ຫລື ເຮັດການຄ້າ ຊຶ່ງທາງ ຣັຖບານລາວ ເອງ ກໍເບີ່ງຄືວ່າ ສນັບສນູນ ການເຂົ້າມາ ຂອງຈີນ. ເລົາເວົ້າເພີ້ມອີກວ່າ:

"ຈຳນວນ ທີ່ມັນອອກ ຈາກບ້ານແລ້ວມັນ ບໍ່ຢາກກັບບ້ານ ມັນຢາກຝັງຮາກ ຢູ່ນີ້ ຄັນຖ້າມາ ຢູ່ແລ້ວ ເຂົາກໍຄ່ອຍຫລາຍຂື້ນ ພົລເມືອງລາວ ມີແຕ່ 6-7 ລ້ານຄົນ ຕໍ່ໄປເຮົາ ກໍຈະກາຍເປັນ ຄົນສ່ວນນ້ອຍ ໂອກາດທີ່ເຮົາ ຈະພັທນາປະເທດ ເຮົາໃຫ້ກາຍເປັນ ປະເທດ ທີ່ເຂັ້ມແຂງ ໃນຕົວ ພວກເຮົາ ມັນກໍຝືດ ຕາມເຮົາຄິດ ແຕ່ບໍ່ຮູ້ຂັ້ນເທີງ ເຂົາຊີ່ຄິດ ແນວໃດ ກໍບໍ່ເຂົ້າໃຈ.

ສ່ວນຕົວແລ້ວ ເລົາວ່າ ບັນຫາການເຂົ້າມາ ປະເທດລາວ ຂອງຄົນຕ່າງຊາດ ເປັນບັນຫາ ທີ່ຫລໍ່ແຫລມ ແລະ ຣັຖບານລາວ ກໍເຫັນດີນຳ ໂດຍຄິດເຖິງ ຜົນເສັຽຫາຍ ຂອງ ປະຊາຊົນ ຜູ້ທີ່ບໍ່ມີ ວຽກເຮັດ ງານທຳ.