ລາວ-ເກົາຫຼີເໜືອ ເປັນປະເທດເພື່ອນມິດ

ໃນຣະຍະ ທີ່ມີຂ່າວ ກ່ຽວກັບ ການເສັຍ ຊີວິດ ຂອງ ທ່ານ ກິມຈົງອິນ ອະດີດ ຜູ້ນໍາ ເກົາຫລີເໜືອ ແຕ່ມື້ວັນເສົາ, ຈົນມາເຖິງ ວັນຈັນ ກໍຍັງ ບໍ່ທັນມີ ຂ່າວ ກ່ຽວກັບ ສານເສົ້າສລົດໃຈ ຈາກ ທາງການ ສປປລາວ ໄປຍັງ ຄນະຜູ້ນໍາ ເກົາຫຼີເໜືອ ຫຼື ຄອບຄົວ ຂອງທ່ານ ກິມຈົງອິນ ນັ້ນເທື່ອ ເຖິງແມ່ນວ່າ ຜູ້ນໍາ ພັກ ປະຊາຊົນ ປະຕິວັດ ລາວ ຖືເກົາຫຼີເໜືອ ເປັນປະເທດ ເພື່ອນມິດ ຍຸທສາດ ສັງຄົມນິຍົມ ນໍາກັນ ແລະ ຖືວ່າ ທ. ກິມຈົງອິນ ເປັນຜູ້ນໍາ ທີ່ ສລາດສ່ອງໃສ ຮັກສາ ແນວທາງ ການ ປະຕິວັດ ສ້າງ ສັງຄົມ ນິຍົມ ແລະ ທ້ອນໂຮມ ປະເທດ ຊຶ່ງ ທ່ານ ກິມອິນຊຸງ ຜູ້ເປັນພໍ່ ເປັນຄົນ ລິເລີ່ມ.

ເຖິງແນວໃດ ກໍຕາມ ມີການ ຄາດກັນວ່າ ໃນສານ ຂອງ ຜູ້ນໍາ ສປປລາວ ທີ່ສົ່ງໄປ ໃນເວລາ ຕໍ່ມາ ເຖິງຄນະ ຜູ້ນໍາ ຂອງ ເກົາຫລີເໜືອ ແລະ ຄວບຄົວ ຂອງ ທ່ານ ກິມຈົງອິນ ນອກຈາກ ຈະສະແດງ ຄວາມ ເສົ້າ ສລົດໃຈ ແລະ ແບ່ງເບົາ ຄວາມເສົ້າໂສກ ແລ້ວ ກໍອາດຈະ ເວົ້າເຖິງ ຄວາມເຊື່ອໝັ້ນ ໃນການ ນໍາພາ ຂອງ ພັກແຮງງານ ເກົາຫລີເໜືອ ຕໍ່ໄປ ແລະ ໃນການ ເພີ່ມທະວີ ສາຽພົວພັນ ມິຕພາບ ແລະ ການຮ່ວມມື ດັ່ງທີ່ ເຄີຍມີມາ ຣະຫວ່າງ 2 ພັກ, 2 ຣັດ ແລະ ປະຊາຊົນ ລາວ-ເກົາຫລີເໜືອ ຕໍ່ໄປ.

ເມື່ອທ້າຍເດືອນ ກັນຍາ ທີ່ ຜ່ານມາ ທ່ານ ຈູມມະລີ ໄຊຍະສອນ ເລຂາທິການ ໃຫຍ່ ຂອງພັກ ໄດ້ ໄປຢ້ຽມຢາມ ເກົາຫລີເໜືອ ຊຶ່ງ ໃນນັ້ນ ທ່ານ ກໍໄດ້ ຕີຣາຄາສູງ ໃນການ ນໍາພາ ຂອງພັກ ອັນມີ ທ່ານ ກິມຈົງອິນ ເປັນຜູ້ນໍາ ແລະ ຜົນສໍາເຣັດ ທີ່ ປະຊາຊົນ ເກົາຫລີ ຍາດມາໄດ້.

ໃນທ້າຍ ປີ 2008 ຣະຍະ ທີ່ ທ່ານ ບົວສອນ ບຸບຜາວັນ ເປັນ ນາຍົກ ຣັຖມົນຕຣີ ໄດ້ມີການ ລົງນາມ ໃນຂໍ້ຕົກລົງ ກັບ ຝ່າຍເກົາຫລີ ກ່ຽວກັບ ການຮ່ວມມື ທາງດ້ານ ເສຖກິດ ການຄ້າ ວິທຍາສາດ ເທັກໂນໂລຢີ ແລະ ມີການສ້າງຕັ້ງ ຄນະກັມມະການ ຮ່ວມມື ນໍາກັນ, ແຕ່ ປາກົດວ່າ ໃນພາກ ປະຕິບັດ ບໍ່ເຫັນວ່າ ຈະມີສິ່ງໃດ ທີ່ເປັນຕຸກ ເປັນເຕົາ ເກີດຂຶ້ນ ຍ້ອນວ່າ ທັງ 2 ປະເທດນີ້ ທຸກຍາກ ແລະ ປະຊາຊົນ ກໍຂາດເຂີນ.

ເກົາຫລີເໜືອ ໃຫ້ທຶນ ການສຶກສານ ຈໍານວນນຶ່ງ ແລະ ຫລໍ່ຮູບ ທ່ານ ໄກສອນ ພົມວິຫານ ຊຶ່ງ ຄນະຜູ້ແທນ ເກົາຫລີເໜືອ ວຽດນາມ ແລະ ກູບາ ມັກໄປຢ້ຽມ.