ແມ່ຍິງ-ເດັກນ້ອຍໃນລາວ ຄວນຖືກປົກປ້ອງ

ໃນວັນທີ 27 ພຶສຈິກາ ຜ່ານມາ ອົງການຕ່າງໆ ທີ່ເຮັດວຽກ ກ່ຽວກັບ ແມ່ຍິິງ ໃນລາວ ໄດ້ຮ່ວມກັນ ສຳມະນາ ພາຍໃຕ້ຫົວຂໍ້ ຍຸຕິຄວາມຮຸນແຮງ ຕໍ່ແມ່ຍີງ ແລະ ເດັກນ້ອຍ. ໃນທີ່ປະຊຸມ ດຣ. ຄຳລຽນ ພົນເສນາ ຜູ້ຊ່ອຍຣັຖມົນຕຣີ ກະຊວງແຜນການ ແລະ ການລົງທຶນ ໄດ້ກ່າວ ໃນຖານະ ຮອງປະທານ ຄະນະກັມມະທິການ ຄວາມກ້າວຫນ້າ ຂອງແມ່ຍິງ ແລະ ເດັກນ້ອຍ ວ່າ ຄວາມຮຸນແຮງ ຕໍ່ແມ່ຍິງ ແລະ ເດັກນ້ອຍ ເປັນປາກົດການ ຫຍໍ້ທໍ້ຂັ້ນຮ້າຍແຮງ ອີກແບບນື່ງ ທີ່ເກີດຂື້ນກັບ ແມ່ຍິງ ໃນຫລາຍປະເທດ. ເຈົ້າຫນ້າທີ່ ສາກົນ ທ່ານນື່ງ ຜູ້ທີ່ໄດ້ເຂົ້າຮ່ວມ ການສຳມະນາ ເວົ້າວ່າ:

"ມາຮອດ ປັດຈຸບັນ ປີທີ່ແລ້ວ ມາຮອດປີນີ້ ຂະເຈົ້າຈະເຮັດ ເປັນຄ້າຍໆ ຂະບວນການ ຄ້າມະນຸດ ແບບຂ້າມແດນ ຄືຢູ່ຝັ່ງລາບ ກໍຈະເປັນ ຄົນລາວ ແລ້ວພໍສົ່ງໄປຮອດ ຝັ່ງໄທ ນາຍຫນ້າ ກໍຈະເປັນຄົນໄທ ມາຮັບຕໍ່ ແຕ່ປັດຈຸບັນ ນີ້ສ່ວນຫລາຍ ກໍຈະເປັນ ຄົນລາວ ດ້ວຍກັນນີ້ແຫລະ ທີ່ຢູ່ໃນບ້ານ ເຂົາຮຽກວ່າ ບ້ານດຽວກັນ ໄປເຮັດວຽກ ຢູ່ໄທ ກໍເອີ້ນວ່າ ເຂົ້າໄປຢູ່ໃນ ຂະບວນການ".

ນາງກ່າວ ຕໍ່ໄປວ່າ ໃນປີ 2012 ການຄ້າມະນຸດ ໂດຍສະເພາະ ແມ່ຍິງ ກໍກວດພົບ ເຫັນເລື້ອຍໆ ສ່ວນໃຫຍ່ ຢູ່ຕາມຊາຍແດນ ທີ່ເຈົ້າຫນ້າທີ່ໄທ ສົ່ງກັບຄືນມາໃຫ້ ຫລັງຈາກ ກວດພົບວ່າ ກຸ່ມດັ່ງກ່າວ ຖືກຫລອກລວງໄປ ເຮັດວຽກຢູ່ໄທ ແຕ່ການ ຈັບກຸມ ຜູ້ກະທຳຜິດ ຫລື ນາຍຫນ້ານັ້ນ ຍັງມີຫນ້ອຍຢູ່.

ນາງວ່າ ເຫດການ ຄວາມຮຸນແຮງ ພາຍໃນຄອບຄົວ ກໍຍັງມີຫລາຍ ຢູ່ໃນລາວ ຕາມເຂດ ຊົນນະບົດ ບາງບ້ານ ກໍຍັງໃຊ້ ແຮງງານເດັກນ້ອຍ ແລະ ການທຳຮ້າຍ ຮ່າງກາຍ ແມ່ຍິິງ ກໍຍັງມີຢູ່ ບັນຫາດັ່ງກ່າວ ຕ້ອງໃຫ້ຄວາມຮູ້ ແກ່ສັງຄົມ ໂດຍສະເພາະ ແມ່ຍິງ ໃນລາວ ໃຫ້ຫລາຍຂື້ນ.

ການທຳຮ້າຍ ຮ່າງກາຍ ແມ່ຍິງ ບໍ່ແມ່ນເຣື້ອງ ປົກກະຕິ ຜູ້ທີ່ເຫັນ ເຫດການ ຄວນແຈ້ງຕໍ່ ເຈົ້າຫນ້າທີ່ ທາງການ ເພື່ອແກ້ໄຂ ແລະ ທາງການລາວ ຄວນ ໃຫ້ຄວາມສົນໃຈ ໃນບັນຫາ ດັ່ງກ່າວ ຫລາຍກວ່ານີ້.