ຕອບຈົດໝາຍ: ວັນທີ 16 ກັນຍາ 2009
ໃນສັປດານີ້, ພວກເຮົາ ກໍໄດ້ຮັບ ຈົດໝາຍ ຂອງທ່ານຜູ້ຟັງ ຫລາຍທ່ານ ດ້ວຍກັນ, ແຕ່ຂ້າພະເຈົ້າ, ຈະຂໍໂຈະ ຂອງຫລາຍໆທ່ານໄວ້ ເນື່ອງຈາກວ່າ ມີຈົດໝາຍ ຂອງທ່ານ ຜູ້ຟັງ ທ່ານນຶ່ງ ສົ່ງມາຈາກ ສປປລາວ ທີ່ມີເນື້ອໃນຍາວ ແລະ ສໍາຄັນ ພໍສົມຄວນ, ແຕ່ຜູ້ຂຽນ ບໍ່ໄດ້ບອກຊື່ ແຕ່ຢ່າງໃດ. ຕິດຕາມມາດ້ວຍ ຜົນງານເພງ ຂອງທ່ານ ຄໍາຫຼ້າ ໜໍ່ແກ້ວ ມາໃນເພງ ”ພັທນາກອນ”
-
ຈະເຣີນສຸກ
2009-09-17 -
-
-
Your browser doesn’t support HTML5 audio
ຜູ້ຟັງທ່ານນີ້ ຂຽນມາແບບຣາຍງານ ເພື່ອເລົ່າສູ່ຟັງ ກ່ຽວກັບ ການກໍ່ສ້າງ ມະຫາວິທະຍາລັຍ ສຸພານຸວົງ, ແຂວງຫລວງພຣະບາງ ທີ່ບໍ່ໄດ້ມາຕຖານ ແລະ ການແຕ່ງຕັ້ງ ຕໍາແໜ່ງ ແບບຫລິ້ນພັກຫລິ້ນພວກ.
ທ່ານເຣີ້ມຫົວຂໍ້ ໃນຈົດໝາຍ ວ່າ: ປາກົດການ ຫຍໍ້ທໍ້ ທີ່ຄົນລາວ ຄວນຕິດຕາມ
ເນື່ອງໃນ ວັນຄົບຮອບ 100 ປີ ວັນຄ້າຍວັນເກີດ ຂອງອະດີດ ປະທານ ສຸພານຸວົງ ນີ້, ຂ້າພະເຈົ້າ ຂໍເລົ່າ ປາກົດການ ຫຍໍ້ທໍ້ ທີ່ ເກີດຂຶ້ນ ຢູ່ມະຫາວິທະຍາລັຍ ສຸພານຸວົງ ໃຫ້ປະຊາຊົນລາວ ໄດ້ຮັບຮູ້ນໍາ ຈະເປັນການດີ.
ໂຄງການສ້າງຕັ້ງ ມະຫາວິທະຍາລັຍ ສຸພານຸວົງ ມີວົງເງິນກູ້ຢືມ ຈາກເກົາຫລີໃຕ້ 20,500,000 ດອນລາສະຫະຣັຖ ແລະ ເງິນຣັຖບານ ສົມທົບ ອີກ 5,000,000 ດອນລາສະຫະຣັຖ.
I ເງື່ອນໄຂ ທີ່ຄົນທົ່ວໄປຮູ້ ຄື:
ກ. ເງິນກູ້ຢືມ ໃຫ້ເອົາມາສ້າງ ອາຄານຮຽນ ແລະ ຊື້ວັດຖຸ ອຸປກອນ ການຮຽນ-ການສອນ
ຂ. ເງິນສົມທົບ ຂອງຣັຖບານ ໃຫ້ເອົາມາສ້າງ ຣະບົບນ້ຳປະປາ ແລະ ໄຟຟ້າ
· ເຈົ້າຂອງ ໂຄງການ ແມ່ນ ກະຊວງ ສຶກສາທິການ
· ຜູ້ອຳນວຍການ ໂຄງການ ຄື ທ່ານ ດຣ. ກອງສີ ແສງມະນີ
· ຜູ້ຈັດການ ໂຄງການ ຄື ທ່ານອາຈານ ຄຳຈັນ ແສງສຸລິຍາ
· ບໍຣິສັດ ທີ່ປຶກສາ ດ້ານການພັທນາ ວິຊາການ ໃຫ້ມະຫາວິທະຍາລັຍ ສຸພານຸວົງ ແມ່ນ ບໍຣິສັດ Synergy Co. Lt.
· ບໍຣິສັດ ຮັບເໝົາກໍ່ສ້າງ ຂອງເກົາຫລີ ແມ່ນ ບໍຣິສັດ PosDATA construction
II ການປະມູນ ໂຄງການ
ສອງບໍຣິສັດ ຂອງເກົາຫລີ ຂ້າງເທິງ ໄດ້ກຳນົດເງື່ອນໄຂ ການປະມູນ ເວົ້າວ່າ ບໍຣິສັດລາວ ທີ່ປະມູນໄດ້ ນັ້ນ ຕ້ອງມີມາຕຖານ ຣະດັບສາກົນ…..
III ຜົນ ຂອງການປະມູນ.
ເກົາຫລີ ບໍ່ຍອມຮັບ ບໍຣິສັດ ທີ່ທາງການລາວ ສເນີໃຫ້ ເປັນຜູ້ຊະນະ ການປະມູນ ເນື່ອງຈາກ ເປັນບໍຣິສັດ ທີ່ບໍ່ໄດ້ ມາຕຖານ.
ທ່ານຮູ້ບໍ່ວ່າ ທາງການລາວ ຕອບເກົາຫລີວ່າ ແນວໃດ?
ຣັຖບານລາວ ບອກສັ້ນໆວ່າ: ຖ້າເກົາຫລີ ບໍ່ຮັບ ບໍຣິສັດນີ້ແລ້ວ ຣັຖບານລາວ ຈະບໍ່ອະນຸມັດ ໃຫ້ ໂຄງການນີ້ ເດີນໜ້າໄດ້. ເມື່ອຖືກຂູ່ ຄື ແນວນັ້ນ ເກົາຫລີ ຕ້ອງຍອມ.
IV ຜົນ ຂອງການກໍ່ສ້າງ:
- ຕາມຫລັກການ ກໍ່ສ້າງແລ້ວ ຕຶກທີ່ຍາວກວ່າ 25 ແມັດ ຂຶ້ນໄປ ຕ້ອງມີ Joint extension ແຕ່ການກໍ່ສ້າງ ມະຫາວິທະຍາລັຍ ສຸພານຸວົງ ບໍ່ມີ
- ຣົຖ 10 ລໍ້ ຕ້ອງສາມາດ ເຂົ້າເຖີງ ຫໍພັກ ຢ່າງງ່າຍດາຍ ເພື່ອປ້ອງກັນ ກໍຣະນີ ເກີດໄຟໄໝ້ ຣົຖດັບເພີງ ຈຶ່ງຊ່ອຍໄດ້ ແຕ່ ຫໍພັກ ມ. ສຸພານຸວົງ ນັ້ນ ຣົຖເຂົ້າບໍ່ໄດ້
- ຫໍພັກ ຕ້ອງມີຫົວກ໊ອກ ຂນາດໃຫຍ່ ໄວ້ສຳລັບ ຣົຖດັບເພີງ ຕື່ມນ້ຳ ແຕ່ ຫໍພັກ ຂອງ ມ. ສຸພານຸວົງ ບໍ່ມີ
- ຕາມທັມມະດາແລ້ວ ຫໍພັກ ນັກຮຽນ ທີ່ມີຄວາມສູງ 3 ຊັ້ນ ຕ້ອງມີ ຂັ້ນໃດ ໜີພັຍ ແລະ ຕົວຂັ້ນໃດ ທີ່ໃຊ້ທຽວ ທຸກມື້ນັ້ນ ຕ້ອງມີຄວາມກວ້າງ ຢ່າງໜ້ອຍ 3 ແມັດ ເພື່ອໃຫ້ໜີທັນ ໃນກໍຣະນີ ໄຟໄໝ້ ແລະ ເກີດເຫຕສຸກເສີນ ຕ່າງໆ ແຕ່ ຂັ້ນໃດ ຕຶກຫໍພັກ ນັກສຶກສາ ມ. ສຸພານຸວົງນັ້ນ ກວ້າງພຽງ 1.2 ແມັດ ແລະ ບໍ່ມີຂັ້ນໃດ ໜີໄຟ, ດັ່ງນັ້ນ ຖ້າມີໄຟໄໝ້ ຫໍພັກ ເກີດຂຶ້ນນັ້ນ ມີຫວັງ ລູກຫລານ ພີ່ນ້ອງຊາວເໜືອ ທີ່ນອນຫໍພັກ ຈະຖືກໄຟໄໝ້.
- ຕຶກ ຄວນມີຖານ ສູງກວ່າ ໜ້າດີນ ແຕ່ ຕຶກຕ່າງໆ ຂອງມະຫາວິທະຍາລັຍ ສ່ວນຫລາຍ ມີຣະດັບ ເທົ່າກັບ ໜ້າດີນ ດັ່ງນັ້ນ ຝົນຕົກເມື່ອໃດ ກໍຈະມີນໍ້າຖ້ວມ ເມື່ອນັ້ນ.
- ຕຶກ ຂອງຄະນະບໍຣິຫານ ການທ່ອງທ່ຽວ ແຕກເປັນແຖວຍາວ ກ່ອນການມອບຮັບ
- ຣະບົບ ນ້ຳປະປາ ທີ່ໃຊ້ເງິນໄປ ສາມລ້ານກວ່າໂດລາ ສະຫະຣັຖ ໃຊ້ການບໍ່ໄດ້. ດຽວນີ້ ມະຫາວິທະຍາລັຍ ໃຊ້ນ້ຳບາດານເອົາ
- ຈຸດອັນຕະລາຍ ທີ່ສຸດ ຄືການໃຊ້ສາຍໄຟຟ້າ ຜິດປະເພດ: ຣະບົບ ໄຟຟ້າ ຂອງ ມະຫາວິທະຍາລັຍ ສຸພານຸວົງ ຖືກອອກແບບ ເປັນຣະບົບ “ສາຍໄຟຟ້າ ໃຕ້ດີນ”. ເປືອກຫຸ້ມ ສາຍໄຟຟ້າ ແຮງສູງ ໃຕ້ດິນ ຈະຖືກ ອອກແບບມາໃຫ້ ມີຄວາມຕ້ານໄຟຟ້າສູງ ເປັນພິເສດ ເພື່ອປ້ອງກັນ ໄຟຟ້າຊັອດ, ສ່ວນສາຍໄຟຟ້າ ແຮງສູງ ທີ່ໃຊ້ ຢູ່ເທິງ ອາກາດນັ້ນ ມີບາງຊນິດ ເປັນສາຍ ບໍ່ມີເປືອກຢາງຫຸ້ມ ຫລື ບາງຊນິດ ມີເປືອກ ຢາງຫຸ້ມ ແຕ່ເປືອກຢາງນັ້ນ ບໍ່ໄດ້ມີ ການອອກແບບ ໃຫ້ມີຄວາມຕ້ານສູງ ແຕ່ປະການໃດ. ບັນຫາ ຄື ບໍຣິສັດ ກໍ່ສ້າງ ເອົາສາຍໄຟຟ້າແຮງສູງ ຊນິດ ທີ່ອອກແບບ ມາໃຊ້ຢູ່ເທິງອາກາດນັ້ນ ໄປຝັງດີນ, ດັ່ງນັ້ນ, ໂອກາດ ທີ່ຈະເກີດມີໄຟຟ້າ ແຮງສູງ ຊັອດນັ້ນ ມີຫລາຍ.
- ໃນລະຍະ ໃກ້ມີການມອບຮັບນັ້ນ ປາກົດວ່າ ມີໂຈນ ເຂົ້າໄປລັກ Labtop Computer ຂອງ ອາຈານ ຄຳຈັນ, ຊຶ່ງເປັນຄອມພິວເຕີ ທີ່ເກັບຂໍ້ມູນ ທັງໝົດ ໃນການກໍ່ສ້າງ ມ. ສຸພານຸວົງ.
- ທ່ານ ອາຈານ ຄຳຈັນ ແສງສຸລິຍະ ທ່ານນີ້ ໄດ້ເລື່ອນຂຶ້ນມາ ດຳລົງ ຕຳແໜ່ງ ເປັນຮອງອະທິການບໍດີ ມະຫາວິທະຍາລັຍ ໂດຍບໍ່ໄດ້ຜ່ານ ມະຕິ ຂອງຄະນະ ຣັຖມົນຕຣີ ກະຊວງສຶກສາທິການ ດ້ວຍ (ທ່ານ ສາສດາຈານ ດຣ. ສົມກົດ ມັງໜໍ່ເມກ ສເນີ ຊື່ ອາຈານ ຄຳຈັນ ແສງສຸລິຍະ ໃຫ້ເປັນ ຮອງອະທິການບໍດີ ມ. ສຸພານຸວົງ ໄປໃຫ້ຈັດຕັ້ງ ສູນກາງ ໂດຍບໍ່ຜ່ານ ການຄົ້ນຄ້ວາ ຂອງຄະນະພັກ ແລະ ຄະນະ ຣັຖມົນຕຣີ ກະຊວງ ສຶກສາທິການ.
ການມອບຮັບໂຄງການ:
ທິມງານ ຈາກສູນກາງ ໄປກິນເຂົ້າ ສາມັກຄີ ກັບບໍຣິສັດ ກໍ່ສ້າງ ທັງຫລາຍ ແລ້ວກໍມາເດີນ ທົ່ວ ມະຫາວິທະຍາລັຍ ພໍເປັນພິທີ ຈາກນັ້ນ ກໍເຊັນຮັບ ຢ່າງມ່ວນຊື່ນ.
ຫວ່າງບໍ່ດົນມານີ້ ທາງກວດກາ ພັກ-ຣັຖ ຂຶ້ນໄປ ປັບປຸງ ໂຄງການການຈັດຕັ້ງ ມ. ສຸພານຸວົງ ແລ້ວໄປໄດ້ຍິນ ຂ່າວ ສິ່ງທີ່ໄດ້ກ່າວມາ ຂ້າງເທິງນັ້ນ. ຈາກນັ້ນ ຄະນະ ກວດກາ ພັກ-ຣັຖ ກໍນຳເຣື້ອງ ສເນີ ຕໍ່ຂັ້ນເທີງ ພິຈາລະນາ.
ບັນຫາ ກໍຄື:
ມີການງັດຂໍ້ກັນ ຣະຫວ່າງ ທ່ານຣັຖມົນຕຣີ ວ່າການ ກະຊວງສຶກສາທິການ, ທ່ານ ສາສດາຈານ ດຣ. ສົມກົດ ມັງໜໍ່ເມກ ກັບ ຄະນະກວດກາ ພັກ-ຣັຖ. ປະເດັນ ທີ່ກຳລັງງັດຂໍ້ກັນ ມີດັ່ງນີ້:
· ທ່ານສົມກົດ ສເນີໃຫ້ມີ ການປັບປຸງ ໂຄງຮ່າງ ການຈັດຕັ້ງ ຂອງມະຫາວິທະຍາລັຍ ສຸພານຸວົງ ໂດຍ ບໍ່ໃຫ້ມີ ການກວດກາ ບັນຫາ ທີ່ໄດ້ກ່າວມາ ຂ້າງເທີງ ແລະ ສເນີ ໃຫ້ຮັກສາ ທ່ານ ດຣ. ຄຳຜາຍ ສີສວັນ ເປັນອະທິການບໍດີ ຄືເກົ່າ ບໍ່ມີການປ່ຽນແປງ, ສ່ວນທ່ານ ອາຈານ ຄຳຈັນ, ຊຶ່ງປັດຈຸບັນ ດຳລົງ ຕຳແໜ່ງ ເປັນຮອງອະທິການບໍດີ ມ. ສຸພານຸວົງ ນັ້ນ ໃຫ້ຍ້າຍ ກັບມາ ກະຊວງສຶກສາ.
· ສ່ວນທາງກວດກາ ພັກ-ຣັຖ ນັ້ນ ສເນີ ໃຫ້ມີ ການກວດກາ ປາກົດການ ທີ່ເກີດຂຶ້ນ ທັງໝົດ ໃຫ້ຮູ້ວ່າ ບັນຫາເກີດຂຶ້ນ ກັບໃຜ ຈາກນັ້ນ ຈຶ່ງຮູ້ປັບປຸງ ການຈັດຕັ້ງ ແລະ ຈຶ່ງຮູ້ວ່າ ໃຜຄວນຢູ່ ໃຜຄວນໄປ.
ສຳລັບ ຣະບົບ ການຄານອຳນາດ ຂອງລາວ ທີ່ໃຊ້ກັນຢູ່ ໃນປັດຈຸບັນນີ້ນັ້ນ, ຕໍາແໜ່ງ ທາງຣັຖ ບໍ່ສຳຄັນເທົ່າກັບຕຳແໜ່ງ ທາງພັກ, ເພາະສະນັ້ນ ຖ້າຜູ້ໃດ ມີຕຳແໜ່ງ ທາງພັກສູງກວ່າແລ້ວ ມັກເປັນຜູ້ຊະນະ ຢູ່ສເມີ. ນອກຈາກນັ້ນ ພັກ-ພວກ ກໍເປັນກຳລັງສຳຄັນ ທີ່ຊ່ອຍໄດ້ດີ ໃນສັງຄົມລາວ ປັດຈຸບັນ. ຖ້າໃຊ້ສອງມາຕຖານນີ້ ມາຕັດສິນ ທ່ານຜູ້ຟັງ ຄົງສາມາດ ເຫັນຜູ້ຊະນະ ຜູ້ແພ້ ໄດ້ດັ່ງນີ້:
ວິເຄາະ ດ້ານຕຳແໜ່ງ:
ທ່ານສົມກົດ ມັງໜໍ່ເມກ, ຊຶ່ງຫລິ້ນບົດ ເປັນຜູ້ປົກປ້ອງ ພັກພວກ ທີ່ມີສ່ວນພົວພັນ ກັບທ່ານ
ຄື (ທ່ານອາຈານ ຄຳຈັນ ແສງມະນີ ເປັນສ່ຽວຮັກສ່ຽວແພງ ແລະ ຢູ່ກິນນຳກັນ ມາຕັ້ງແຕ່ສມັຍ ເປັນນັກຮຽນ ມັທຍົມຕົ້ນ ຢູ່ຊຽງຂວາງ ແລະ ຢູ່ວຽດນາມ, ທ່ານດຣ. ຄຳຜາຍ ສີສວັນ ເປັນພໍ່ດອງ, ສ່ວນທ່ານ ຮອງອະທິການບໍດີ ຝ່າຍວິຊາການ, ທ່ານອາຈານ ວິໄຊ ຈັນມືດ ເປັນນ້ອງຮັກ) ມີຕຳແໜ່ງ ທາງຣັຖ, ເປັນຣັຖມົນຕຣີ ວ່າການ, ສ່ວນຕຳແໜ່ງ ທາງພັກ ແມ່ນ ຄະນະ ກັມການ ສູນການພັກ.
ສ່ວນຄະນະກວດກາ ພັກ-ຣັຖ ຈາກສູນກາງນັ້ນ ເປັນພະນັກງານ ທັມມະດາ.
ທ່ານສົມກົດ ມີໝູ່ ເປັນບຸກຄົນສຳຄັນ ຢູ່ຈັດຕັ້ງສູນກາງ ຊຶ່ງເປັນອົງການ ຈັດຕັ້ງ ທີ່ຢູ່ໃນລາວນັ້ນ ຖືໄດ້ວ່າ ມີໄມ້ຊີ້ເປັນຊີ້ຕາຍ. ຊີ້ໃຫ້ ທ່ານຄຳຈັນ ແສງສຸລິຍະ ຂຶ້ນດຳລົງ ຕຳແໜ່ງ ຮອງອະທິການບໍດີ ມ. ສຸພານຸວົງ ກໍໄດ້.
ມາເບິ່ງ ຝ່າຍ ຂອງກວດກາ ພັກ-ຣັຖ. ທິມງານນີ້ ເປັນພະນັກງານ ວິຊາການ ຂັ້ນຫົວໜ້າ ຜແນກ ເທົ່ານັ້ນ ບໍ່ມີອຳນາດ ວາສນາຫຍັງ ພໍທີ່ຈະໄປຕໍ່ກອນ ກັບ ທ່ານສົມກົດ.
ຕາມກຳລັງ ຂ້າງເທີງ ເຫັນຊັດເຈນແລ້ວ ວ່າ ທີມງານ ຈາກກວດກາ ພັກ-ຣັຖ ບໍ່ມີທາງ ທີ່ຈະງັດຂໍ້ໄດ້. ດັ່ງນັ້ນ ຈຶ່ງໄດ້ແຕ່ ພາວະນາ ຂໍໃຫ້ດວງວິນຍານ ຂອງທ່ານປະທານ ສຸພານຸວົງ ຈົ່ງດົນບັນດານໃຈ ໃຫ້ກົມການເມືອງ ຫັນມາເບິ່ງ ບັນຫາຊ່ອຍ, ຖ້າບໍ່ດັ່ງນັ້ນ ມີຫວັງ ເຄາະກຳ ທັງໝົດນີ້ ຈະຕົກ ໄປໃສ່ລູກຫລານ ຂອງປະຊາຊົນ ຊາວເໜືອ ຢ່າງແນ່ນອນ.
ກົດໝາຍລາວ ຈະຄຸມ ຮອດແຕ່ຫົວໜ້າກົມ ລົງໄປ ດັ່ງນັ້ນ ເມື່ອຣັຖມົນຕຣີ ທັງເປັນ ເລຂາພັກ ກະຊວງ, ເປັນກັມການ ສູນກາງພັກແລ້ວ ຖືວ່າ ເປັນບຸກຄົນເໜືອກົດໝາຍ ແລ້ວ ຈຶ່ງມີພຽງແຕ່ ສະມາຊິກ ກົມການເມືອງ ສູນກາງພັກ ເທົ່ານັ້ນ ທີ່ແຕະຕ້ອງໄດ້.
ນັ້ນ ກໍແມ່ນຈົດໝາຍ ຂອງທ່ານ ຜູ້ຟັງ ທ່ານນຶ່ງ ຈາກ ສປປລາວ ທີ່ໄດ້ສົ່ງມາຮ່ວມ ຣາຍການ ຂອງພວກເຮົາ, ທາງວິທຍຸ ເອເຊັຍເສຣີ ກໍຂອບໃຈ ນໍາທ່ານຫລາຍໆ ທີ່ໄດ້ສະຣະເວລາ ຮີບໂຮມ ຂໍ້ມູນ ແລະ ຂຽນຈົດໝາຍ ມາໃຫ້ພວກເຮົາ ໄດ້ອ່ານ ໃຫ້ພີ່ນ້ອງຊາວລາວ ຮັບຟັງກັນ. ທ່ານ ຜູ້ຟັງ ທີ່ເຄົາຣົບ ຂໍ້ຄວາມໃນຈົດໝາຍ ທີ່ສົ່ງມາໃຫ້ ພວກເຮົານັ້ນ, ພວກເຮົາ ກໍມີໜ້າທີ່ ອ່ານອອກອາກາດ ໃຫ້ທຸກໆທ່ານ ໄດ້ຮັບຟັງກັນ, ສ່ວນຈະມີຄວາມຈິງ ໜ້ອຍຫລາຍ ຊໍາໃດນັ້ນ ໃຫ້ທ່ານ ຜູ້ຟັງນໍາໄປຄິດ ແລະ ພິຈາລະນາ ຢ່າງສົມເຫດສົມຜົນ. ຫລື ທ່ານຜູ້ໃດ ມີຄວາມເຫັນ ຫລື ມີຂໍ້ມູນ ແຕກຕ່າງ ຈາກທີ່ເວົ້າມານັ້ນແລ້ວ, ທາງວິທຍຸ ເອເຊັຍເສຣີ ກໍຍິນດີ ຈະນໍາມາ ອອກອາກາດ ໃຫ້ເຊັ່ນກັນ.
ເພື່ອໃຫ້ເຂົ້າກັບ ບັນຍາກາດ ຕອບຈົດໝາຍ ໃນມື້ນີ້, ຂ້າພະເຈົ້າ ໄດ້ຄັດເລືອກ ເອົາຜົນງານເພງ ຂອງທ່ານ ຄໍາຫລ້າ ໜໍ່ແກ້ວ, ມາເປີດໃນຣາຍການຕອບຈົດໝາຍ, ມາໃນເພງ ທີ່ມີຊື່ວ່າ ”ພັທນາກອນ” ແລະ ຫວັງວ່າ ຄົງຖືກອົກຖືກໃຈ ຫລາຍໆທ່ານ ທີ່ຟັງຣາຍການ ຂອງພວກເຮົາ.
ມາຮອດນີ້ ເວລາ ຂອງຣາຍການ ຕອບຈົດໝາຍ ກໍໄດ້ໝົດລົງ ພໍດີ, ເຊີນທ່ານ ຕິດຕາມຟັງ ຣາຍການ ຕອບຈົດໝາຍໄດ້ ໃນສັປດາໜ້າ. ສະບາຍດີ…