ຕອບຈົດໝາຍ: ວັນທີ 27 ພຶສພາ 2010

ໃນຣາຍການຕອບ ຈົດໝາຍ ປະຈໍາ ສັປດານີ້ ທ່ານຈະໄດ້ຟັງ ຈົດໝາຍ ຂອງທ່ານ ລູກລາວໃຕ໊ ຈົດໝາຍ ຈາກ (ລຸງເກົ່າ USA) ແລະຈົດໝາຍ ຈາກ ອາຈາສົມບູນ. ຕິດຕາມດ້ວຍ ເພງລາວ ເຮັດຈັ່ງເພີ່ນ ຢ່າເຮັດຈັ່ງເພີ່ນ ຈາກທ່ານ ພົມມະ ພີມມະສອນ
ໄມຊູລີ
2010-05-27
ອີແມວລ໌
ຄໍາເຫັນ
Share
ພິມ

ທ່ານຜູ້ຟັງ ມື້ນີ້ກໍມີ ມີຈົດໝາຍ ແຟນຣາຍການ ຫລາຍສະບັບ ຂຽນເຂົ້າມາ ສະນັ້ນ Maysoly ຈະບໍ່ເວົ້າໃຫ້ ມັນຍຶດມັນຍາວ ຂໍເຊີນທຸກໆທ່ານ  ເຂົ້າສູ່ຣາຍການ ເລີຍ ທຳອິດນີ້ ຂໍອ່ານຈົດໝາຍ  ຂອງ ຍາລຸງ ເກົ່າ USA ຕາມທີ່ໄດ້ ສັນຍາໄວ້ ເມື່ອວັນພຣະຫັດ ທີ່ຜ່ານມາ ສະບັບນີ້ ເພີນໄດ້ເລົ່າເຣືອງ ປະສົບການໄປ ຢາມບ້ານສູ່ຟັງ ດັ່ງນີ້: ລຸງໄດ້ອອກກີນ ບຳນານ ເມື່ອປີ 2007 ແລະກໍມີໂອກາດ ໄປຢາມບ້ານ ສາມເດືອນ ເມື່ອໄປຮອດ ພີ່ນ້ອງລູກຫລານ ກໍໃຫ້ການຕ້ອນຮັບ ເປັນຢ່າງດີ ສ່ວນພີ່ນ້ອງຂອງ ລຸງທຸກໆຄົນ ກໍນັບວ່າມີ ຖານະດີພໍ ສົມຄວນ ແຕ່ກໍໜ້າເສົ້າໃຈ ທີ່ຍັງເຫັນ ພີ່ນ້ອງຄົນລາວເຮົາ ຫລາຍແສນຄົນ ຍັງທຸກຍາກຂາດເຂີນ ຫາອັນຈະນຸ່ງ ຫົ່ມ ຫຼືເຂົ້າກີນກໍຍາກ ການສຶກສາຮໍ່າຮຽນ ກໍບໍ່ທົ່ວບໍ່ເຖີງ ໂດຍສະເພາະ ກໍແມ່ນ ພໍ່ແມ່ພີ່ນ້ອງ ທີ່ຢູ່ຕາມຊົນບົດ ເພາະລຸງໄດ້ໄປ ເລາະລຽບ ແຕ່ເໜືອຕລອດໃຕ້ ຂອງເມືອງລາວ ຊື່ງໃຊ້ເວລາ ທັງໝົດ ສາມເດືອນເຕັມໆ ແລະໃນຣະຫວ່າງ ໄປຫັ້ນມານີ້ ບາງທີລຸງກໍເຫັນ ນັກທ່ອງທ່ຽວຕ່າງ ປະເທດ ບາງຄົນ ເອົາເງີນໃບ 1 dollar ແຈກໃຫ້ເດັກນ້ອຍ ຜູ້ໜ້າອິດູ ລຸງເອງຄຶດຢາກ ຈະໃຫ້ຄືກັນ ແຕ່ຢ້ານທາງ ອຳນາດທ້ອງຖີ່ນ ຫາເຣື້ອງໃສ່ວ່າ ໄປປຸກຣະດົມ ມວນຊົນຂອງເພີ່ນ ກໍເລີຍບໍ່ກ້າ ຖ້າແມ່ນ ອະເມຣິກັນ ຜົມແດງດັງໂມ ບໍ່ເປັນຫຍັງ ແຕ່ຖ້າແມ່ນ ອະເມຣິກັນ ຜົມດຳດັງແໝບ ໃຫ້ຣະວັງໄວ້ໂລດ ເພາະຫລານ ຊາຍຂອງລຸງ ໄດ້ເຕືອນແຕ່ ຕົ້ນກ່ອນອອກເດີນ ທາງວ່າຫ້າມເວົ້າ ເຣື້ອງການເມືອງ ຫ້າມຕິຕຽນ ພັກແລະຣັຖ ລຸງກໍເລີຍ ກາຍເປັນຄົນກຶກ ໂດຍປະຣິຍາຍ ຕັ້ງແຕ່ເໜືອ ຕລອດໃຕ໊ ຕອນລຸງ ໄປພັກເຊົາ ຢູ່ເຮືອນ ຫລານຊາຍ ທຸກໆວັນສຸກ ຕອນແລງ ເພີ່ນຈະປະຊຸມກັນ ລຸງບໍ່ກ້າຖາມວ່າ ແມ່ນເພີ່ນ ປະຊຸມເຣື້ອງ ຫຍັງກັນແທ້ ຈົນຮອດ ມື້ສຸດທ້າຍ ກ່ອນຈະກັບ USA ລຸງກໍເລີຍຖາມ ຫລານຊາຍວ່າ ເປັນຫຍັງ ເພີ່ນຍັງມີ ການປະຊຸມ ຢູ່ຄືເກົ່າ ຫລານຊາຍຕອບວ່າ ປະຊຸມໃຫ້ທຸກຄົນ ເປັນຫູເປັນຕາ ໃຫ້ພັກຣັຖ ເພາະດຽວນີ້ມີ ລາວນອກ ຜູ້ບໍ່ຫວັງດີ ເຂົ້າມາສ້າງ ຄວາມປັ່ນປ່ວນ ໃນລາວ ເມື່ອໄດ້ຍີນເຊັ່ນນັ້ນ ໃນຄືນນັ້ນ ລຸງກໍນອນ ບໍ່ຫລັບທັງຄືນ ເຣື້ອງທີ່ເລົ່າ ທັງໝົດນີ້ ແມ່ນເຣື້ອງຈີງ  ລຸງຄິດວ່າ ຄົງຈະເປັນຄັ້ງ ທຳອິດ ແລະ ຄັ້ງສຸດທ້າຍ ທີ່ໄປຢາມເມືອງລາວ ວ່າຊັ້ນ...  Maysoly ຂໍຂອບໃຈ ນຳຍາລູງ ເກົ່າ USA ທີ່ເລົ່າເຣື້ອງ ການທ່ອງທ່ຽວ ເມືອງລາວສູ່ຟັງ ຕອນທຳອິດ ກໍຄິດອິສາ ທີ່ໄປທ່ຽວລາວ ຮອດສາມເດືອນ ແຕ່ຟັງໄປໆ ກໍຄິດເປັນຫ່ວງນຳ ຢ່າງໃດ ຍາລຸງກໍໂຊກດີແລ້ວ ທີ່ໄດ້ໄປເຫັນ ໜ້າພີ່ນ້ອງປ້ອງປາຍ ໂອກາດໜ້າ ເຊີນຂຽນ ຈົດໝາຍ ເຂົ້າມາຮ່ວມກັບ ຣາຍການຂອງ ພວກເຮົາອິກ.

ຈົດໝາຍສະບັບ ຕໍ່ໄປ ຂຽນຈາກ ອາຈານ ສົມບູນ ໃນຈົດໝາຍ ບອກວ່າ ໄດ້ຕິດຕາມ ຟັງຂ່າວຈາກ ສະຖານີ ວິທຍຸເອເຊັຍເສຣີ ເປັນປະຈຳ ສຽງໃສ ຟັງໄດ້ຊັດເຈນ ແລະວ່າ ສ່ວນຫລາຍມັກຟັງ ຂ່າວທົ່ວໂລກ ຢາກຂໍໃຫ້ ພວກທ່ານ ນຳສເນີຂ່າວ ປະເພດນີ້ ຫລາຍໆແດ່ວ່າຊັ້ນ … ຂໍຂອບໃຈນຳ ອາຈານສົມບູນ ທີ່ຕິດຕາມ ຣາຍການ ຂອງວິທຍຸເອເຊັຍ ເສຣີ ແລະຂອບໃຈທີ່ ສົ່ງກາບກອນມາໃຫ້ ສ່ວນເພງ ຊຽງຂວາງແດນງາມ ຂອງ ທ່ານ ກ.ວິເສດທີ່ ຂໍມານັ້ນ Maysoly ຂໍຕິດໜີ້ໄວ້ກ່ອນ ໂອກາດໜ້າ ຈະນຳມາຈັດໃຫ້ ເພາະເມືອສັປດາ ກ່ອນໆ ກໍຈັດອອກອາກາດ ໃຫ້ຟັງແລ້ວ ຫວັງວ່າ ອາຈານຄົງບໍ່ ວ່າໃຫ້ຕິເນາະ …

ຈົດໝາຍ ສະບັບສຸດທ້າຍ ໃນມື້ນີ້ ຂຽນຈາກ ທ່ານ ລູກລາວໃຕ້ ເມືອງ San Diego ຣັຖ California ກ່ອນອື່ນ ຂໍຂອບໃຈທີ່ ທ່ານ ສະລະເວລາ ອັນມີຄ່າຂຽນ ຈົດໝາຍສະບັບ ນີ້ເຂົ້າມາຮ່ວມ ຣາຍການອີກ ເພື່ອຍ້ຳເຖີງເນື້ອ ຫາສາຣະ ໃນຈົດໝາຍສະບັບ ລົງວັນທີ່ 4-26-10 ຂອງທ່ານ ຊື່ງ Maysoly ຄິດວ່າ ບໍ່ຈຳເປັນ ຈະຕ້ອງອ່ານ ຄຳເວົ້າ ໃນຈົດໝາຍ ສະບັບນີ້ອີກ ເປັນເທື່ອທີ່ສອງ ເພາະໄດ້ອ່ານອອກ ອາກາດໄປແລ້ວ ໃນຣາຍການ ເມື່ອວັນພຣະຫັດ ທີ່ຜ່ານມາຖ້າ ລູກລາວໃຕ້ ບໍ່ໄດ້ ຕິດຕາມຟັງ Maysoly ກໍຂໍເຊີນ ທ່ານ ກັບໄປຟັງໄດ້ ໃນ Web Site ຂອງ RFA ຕາມທີ່ຢູ່ດັ່ງນີ້ www.rfa.org/Lao ຫລັງຈາກນັ້ນ ທາງເບື້ອງຂວາມື ທ່ານຈະເຫັນ ປູ່ມທີວ່າ (ສຽງບັນທືກໄວ້) ທ່ານບໍ່ຈຳເປັນຕ້ອງ click ໃສ່ບ່ອນສຽງບັນທຶກ ເພາະເປັນຣາຍການ 1 ຊົ່ວໂມງ ໃຫ້ທ່ານ click ໃສ່ແຖວໜັງສື (ສາຣະຄະດີ) click ໃສ່ ຣາຍການ ຕອບຈົດໝາຍ ວັນທີ່ 20 ເດືອນພຶສພາ ກໍເປັນອັນວ່າ ຟັງໄດ້ເລີຍ …

ທ່ານ ຜູ້ຟັງທີ່ເຄົາຣົບ ເພງທ້າຍຣາຍການ ໃນມື້ນີ້ ວິທຍຸເອເຊັຍ ພູມໃຈສເນີ ບົດເພງ  ຂອງທ່ານ ພົມມະ ພີມມະສອນ ມາໃນເພງທີ່ມີຊື່ວ່າ ເຮັດຈັ່ງເພີ່ນ ຢ່າເຮັດຈັ່ງເພີ່ນ ເພງນີ້ ມີຄວາມໝາຍ ແລະ ສະທ້ອນສັງຄົມລາວ ທຸກວັນນີ້ ແນວໃດນັ້ນ ຂໍເຊີນທ່ານ ຕິດຕາມ ຮັບຟັງໄດ້ເລີຍ...

ທ່ານຜູ້ຟັງ ມາຮອດນີ້ ເວລາແຫ່ງ ຣາຍການ ຕອບຈົດໝາຍ ກໍໝົດລົງພຽງ ເທົ່ານີ້ ຂໍເຊີນທ່ານ ຕິດຕາມຮັບຟັງ ໄດ້ໃໝ່ໃນວັນ ພຣະຫັດໜ້າ … ສບາຍດີ

ເຕັມຫນ້າ