གྲྭ་འཇམ་དཔལ་དབང་ཕྱུག་ལགས་གར་སོང་ཆ་མེད།

འབྲས་སྤུངས་དགོན་པའི་གྲྭ་འཇམ་དཔལ་དབང་ཕྱུག་ལགས་༢༠༠༨ལོར་འཛིན་བཟུང་གིས་ད་དུང་ཡང་གར་ཡོད་ཤེས་རྟོགས་ཐུབ་མི་འདུག

2012.12.25
གྲྭ་འཇམ་དཔལ་དབང་ཕྱུག་ལགས་གར་སོང་ཆ་མེད། གར་སོང་ཤེས་རྟོགས་མེད་པའི་གྲྭ་འཇམ་དཔལ་དབང་ཕྱུག་ལགས།
བོད་ནས་བཏང་འབྱོར།

༄༅།    །༢༠༠༨ཟླ་༣ཚེས་༡༠ནས་བཟུང་བོད་འབྲས་སྤུངས་དགོན་པའི་དགེ་འདུན་པ་ཚོས་ཞི་བའི་སྐད་འབོད་བྱས་པ་སོགས་ལ་བརྟེན།    དགོན་པར་རྒྱ་དམག་གིས་བསྐོར་ཏེ་དགེ་འདུན་པ་རྣམས་དགོན་པའི་ཕྱི་ལ་མ་བཏང་བ་དང་།    ཕྱི་མི་ནང་ལ་མ་བཏང་རྐྱེན་ཀྱིས་ཟ་མ་སོགས་རྫོགས་ནས་དཀའ་ངལ་སྣ་ཚོགས་འཕྲད་བཅུག་ནས་དམ་བསྒྲགས་ཤུགས་ཆེན་པོར་བྱས་ཡོད་པ་དང་། སྐབས་དེར་འབྲས་སྤུངས་དགོན་པ་ནས་དགེ་འདུན་པ་ཕོན་ཆེ་གང་བྱུང་འཛིན་བཟུང་གིས་ཉེས་རྡུང་ཚད་ལས་འདས་པ་བཏང་སྟེ།    དགོན་པ་ནས་བཙོན་ཁང་ཁག་དང༌།
སོ་སོའི་ཕ་ཡུལ་དུ་བཙན་ཤེད་ཀྱིས་ཕྱིར་སློག་བཏང་བའི་གནས་ཚུལ་ཐོན་ཡོད་པ་ལྟར།
འབྲས་སྤུངས་དགོན་པའི་དགེ་འདུན་པ་ཁག་ཅིག་ལོ་ཚད་བཟོས་ཟིན་པའི་བཙོན་པ་མང་པོ་ཞིག་གཞིས་རྩེ་ས་ཁུལ་ཉ་རི་བཙོན་ཁང་དང༌།
ལྷ་སའི་ཆུ་ཤུལ་བཙོན་ཁང་ནང་བཙོན་འཇུག་བྱེད་བཞིན་ཡོད་པ་ལྟར། ནང་མི་སྤུན་མཆེད་དང་ཉེ་འབྲེལ་ཚོས་ཐབས་ཤེས་གང་ཡོང་གིས་རྩད་ཞིབ་བྱས་ཀྱང་གོང་གསལ་དུས་ཚོད་དེའི་ནང་འཛིན་བཟུང་དུ་ཚུད་པའི་དགེ་འདུན་པ་གཉིས་ད་ལྟ་གར་ཡོད་ཤེས་རྟོགས་མེད་པར་གྱུར་ཡོད་པའི་ནང་འབྲས་སྤུངས་དགོན་པའི་དགེ་བསྐོས་འཇམ་དཔལ་དབང་ཕྱུགས་ལགས་རྒྱ་གཞུང་གིས་༢༠༠༨ལོའི་ཕྱི་ཟླ་༤ཚེས་༡༡ཉིན་ཁོང་འཛིན་བཟུང་སྐབས་རྒྱ་གཞུང་གིས་ཁོང་314དོན་རྐྱེན་གྱི་གཙོ་བོ་ཡིན་པས་དྲིལ་བསྒྲགས་བྱ་རྒྱུ་ཡིན་སྐོར་བརྗོད་དེ་དགོན་པའི་ནང་འཛིན་བཟུང་བཙན་ཁྲིད་བྱས་ཡོད་འདུག  ཁོང་འཛིན་བཟུང་བྱས་དགོས་དོན་ནི་314ཡི་དོན་རྐྱེན་མ་བྱུང་སྔོན་ནས་འབྲས་སྤུངས་སུ་རྒྱ་གཞུང་ལ་ངོ་རྒོལ་སྦྱར་ཡིག་སྦྱར་བ་སོགས་གནས་ཚུལ་མང་དག་བྱུང་བར་བརྟེན།    རྒྱ་གཞུང་གིས་ཁོང་ལ་དགེ་འདུན་པ་རྣམས་ལ་ སློབ་གསོ་བརྒྱབས་ཏེ་རྒྱལ་ཁབ་ལ་ངོ་རྒོལ་མི་ཡོང་བར་བཀག་འགོག་བྱ་དགོས་ལུགས་སོགས་བཙན་བཀའ་བཏང་བར་བརྟེན་ཁོང་གིས་རྒྱ་གཞུང་གིས་ཁ་ལ་མ་ཉན་པར་འཛིན་བཟུང་བྱས་པ་རེད་འདུག
རྗེས་སུ་རྒྱ་གཞུང་གིས་ཁོང་ལ་ཉེས་པ་གང་ཡང་མ་རག་པར་བརྟེན་དཔལ་འབྱོར་ལ་ཁ་གཡར་ཏེ་ཉེས་མེད་ཉེས་འཛུགས་འོག་ཁོང་ཚེ་བཙོན་ཡིན་པ་དང་ཚེ་གང་ཆབ་སྲིད་ཀྱི་དབང་ཆ་འཕྲོག་པ་ཡིན་ཞེས་དགོན་པའི་ནང་ཁྱབ་བསྒྲགས་བྱས་པ་ཙམ་ལས་བཙོན་ཁང་གང་དུ་བཀག་ཉར་བྱས་ཡོད་མེད་ནང་མི་དང་དགོན་པའི་གྲྭ་པ།    དེ་མིན་འབྲེལ་ཡོད་ཁག་ཚང་མས་བརྩད་གཅོད་བྱས་ཀྱང་ཞིབ་ཕྲའི་གནས་སྟངས་ད་དུང་ཡང་རྩ་བ་ནས་མ་ཤེས་པར་གར་སོང་ཆ་མེད་དུ་གྱུར་འདུག
གར་སོང་ཆ་མེད་མེད་དུ་གྱུར་བའི་ཁྲོད་ནས་གཅིག་ནི།    འབྲས་སྤུངས་ཀྱི་དཔེ་ཁྲིད་དགེ་རྒན་གྲྭ་དཀོན་མཆོག་ཉི་མ་ལགས་རེད། །

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎