ས་བྱི་ཞི་རྒོལ་སྐབས་འཛིན་བཟུང་བྱས་བའི་མགོན་པོ་ཚེ་ཁོ་ལགས་བཙོན་གྲོལ་བྱུང་འདུག

ཕྱི་ལོ་༢༠༠༨ ས་བྱི་ཞི་རྒོལ་ཆེན་མོའི་རྗེས་རྒྱ་ནག་གིས་འཛིན་བཟུང་བཙོན་འཇུག་བྱས་བའི་མགོན་པོ་ཚེ་ཁོ་ལགས་བཙོན་གྲོལ་བྱུང་འདུག
དེ་ཡང་བོད་ནས་འདི་ག་རླུང་འཕྲིན་ཁང་དུ་གནས་ཚུལ་འབྱོར་བ་ལྟར་ན། ཕྱི་ལོ་༢༠༠༨ ལོར་བོད་ནང་བྱུང་བའི་ས་བྱི་ཞི་རྒོལ་ཆེན་མོའི་རྗེས་རྒྱ་ནག་གཞུང་གིས་མདོ་སྨད་མདོ་ལྷོ་རྨ་ཆུ་ནས་འཛིན་བཟུང་གིས་བཙོན་འཇུག་ཁྲིམས་ཐག་བཅད་པའི་མགོན་པོ་ཚེ་ཁོ་ལགས་༢༠༡༨ ཟླ་༨ པའི་ཚེས་༡༣ ཉིན་བཙོན་གྲོལ་བྱུང་ནས་ཕ་ཡུལ་ལ་འབྱོར་ཡོད་འདུག་ལ་ད་ལྟ་དགུང་ལོ་༣༩་ཡིན་འདུག
འབྲེལ་ཡོད་བོད་མི་ཞིག་གིས་མགོན་པོ་ཚེ་ཁོ་ལགས་ལ་རྒྱ་ནག་གིས་མི་ལོ་བཅུ་བཞི་ཡི་ཁྲིམས་ཐག་བཅད་ཡོད་ཀྱང་བཙོན་དུས་མ་ཚང་སྔོན་དུས་ཚོད་སྔ་སྣུར་གྱིས་མངོན་གསལ་མེད་པའི་ཐོག་ནས་གློད་གྲོལ་བཏང་ཡོད་པ་རེད་ཅེས་དང་། དེར་བརྟེན་ཕ་ཡུལ་འབྱོར་བ་མི་མང་པོས་ཤེས་མེད་པ་དང་། རྒྱ་ནག་གི་འབྲེལ་ཡོད་ཚན་པས་ཁོང་གི་ནང་མིར་མི་ཚོགས་འཛོམས་ནས་ཕེབས་བསུ་སོགས་བྱེད་མི་ཆོག་པའི་བཙན་བཀའ་བཏང་ཡོད་འདུག་ལ་གནས་སྟངས་འདིའི་འོག་ཁོང་གི་སྐུ་གཟུགས་ཀྱི་གནས་སྟངས་ཇི་འདྲ་ཡོད་མེད་དང་དེ་མིན་གྱི་གནས་ཚུལ་ཁག་ཞིབ་ཕྲ་ཤེས་རྟོགས་དཀའ་བ་ཡིན་པ་བརྗོད་ཡོད་པ་རེད།
ཚེ་ཁོ་ལགས་ ༢༠༠༨ ཟླ་༡༠ ཚེས་༡༦ ཉིན་རྨ་ཆུ་རྫོང་ནས་ས་བྱི་ཞི་རྒོལ་ཆེན་མོ་དང་འབྲེལ་བ་ཡོད་པའི་ནག་ཉེས་འོག་འཛིན་བཟུང་བྱས་ཤིང་།  ཁོང་དང་མཉམ་དུ་རྡོ་རྗེ་དང་། ཚེ་ཁོ། བློ་གྲོས་སོགས་བོད་མི་ཁག་གཅིག་ཡོད་པ་དེ་དག་ལ་བཙོན་འཇུག་ཁྲིམས་ཐག་བཅད་སྐབས། མགོན་པོ་ཚེ་ཁོ་ལགས་རྨ་ཆུ་ས་གནས་སུ་བྱུང་བའི་ས་བྱི་ཞི་རྒོལ་ཆེན་མོའི་སྣེ་ཁྲིད་པ་ཡིན་པའི་ཉེས་མིང་བཙུགས་ནས་མི་ལོ་བཅུ་བཞི་ཡི་བཙོན་འཇུག་ཁྲིམས་ཐག་བཅད་པ་དང་། ཕྱི་ཟླ་ ༨ ཚེས་ ༡༣ ཉིན་གློད་གྲོལ་མ་བྱུང་བར་ཁྱོན་བསྡོམས་ལོ་བཅུ་དང་ཕྱེད་ཀ་ཙམ་ལན་ཀྲོའུ་ཕྱོགས་ཀྱི་བཙོན་ཁང་ཞིག་གི་ནང་བཙོན་འཇུག་བྱས་ཡོད་པ་རེད།  ཁོང་ནི་མདོ་སྨད་མདོ་ལྷོ་རྨ་ཆུ་ཕྱོགས་ནས་ཡིན་པ་རེད།

གསར་འགོད་པ་ཀླུ་འབུམ།