བོད་སྐད་སྡེ་ཚན།

རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་དང་བསྟུན་བོད་ནང་གི་གནས་སྟངས་ཐད་ཟུར་ཚོགས་གནང་འདུག

Thu, 22 Jun 2023 16:45:00 -0400

དེ་ཡང་སུད་སིའི་གྲོང་ཁྱེར་ཇི་ནི་ཝའི་(Geneva)་ནང་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་༥༣པ་འཚོགས་བཞིན་པ་དང་བསྟུན། རྒྱལ་ཚོགས་ཀྱི་ཚོགས་ཁང་ཞིག་ཏུ་འདས་བའི་མི་ལོ་༧༥དང་བོད་ནང་གི་གནས་སྟངས་ཞེས་པའི་བརྗོད་གཞིའི་ཐོག ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་ཟུར་ཚོགས་ཤིག་ཚོགས་གནང་བ་དང་། སྐབས་དེར་མཉམ་འབྲེལ་རྒྱལ་ཚོགས་ཀྱིས་གཏན་འབེབས་གནང་བའི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་སྒྲོག་སྦྱང་དང་མཉམ། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཚོགས་འདུར་བོད་པའི་སྐུ་ཚབ་ཀྱི་ངོ་བོའི་ཐོག་ནས་སུད་སི་བོད་ཀྱི་སྐུ་ཚབ་དོན་གཅོད་ཁང་གི་འབྲེལ་ཡོད་ཞུ་གཏུགས་གནང་མཁན་སྐལ་ལྡན་མཚོ་མོ་ལགས་དང་། ཁུལ་དེར་བཞུགས་མཁན་ཆབ་སྲིད་བཙོན་ཟུར་ཕུན་ཚོགས་ཉི་སྒྲོན་ལགས། དེ་དང་ཕྱོགས་མཚུངས་བོད་དོན་ཞུ་གཏུགས་འབྲེལ་མཐུད་ལས་རོགས་(Gloria Montgomery)་བཅས་ཀྱིས་བོད་ནང་ད་ལྟའི་ཛ་དྲག་གི་གནས་སྟངས་སྐོར་ངོ་སྤྲོད་གནང་བ་མ་ཟད། བོད་ཀྱི་ཆབ་སྲིད་བཙོན་ཟུར་གྲགས་ཅན་ཕུན་ཚོགས་ཉི་སྒྲོན་ལགས་ཀྱིས་བོད་ནང་གི་དངོས་ཡོད་གནས་སྟངས་དང་། ལྷག་དོན་ཁོང་རང་ཉིད་དེ་སྔ་རྒྱ་ནག་གཞུང་གིས་འཛིན་བཟུང་བཙོན་འཇུག་གི་མནར་གཅོད་མྱངས་བའི་དངོས་བྱུང་གནས་ཚུལ་ཁག་སྙན་སེང་ཞུས་ཡོད་པ་སྐལ་ལྡན་མཚོ་མོ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་ངོ་སྤྲོད་གནང་བྱུང་།
བོད་དང་འབྲེལ་བའི་ཟུར་ཚོགས་དེ་ནི། འདི་ཚེས་༢༡ཉིན་(Society for Threatened people)་ཞེས་པའི་འགྲོ་བ་མིའི་ཐོབ་ཐང་སྲུང་སྐྱོབ་ཚོགས་པ་དང་སུད་སི་བོད་ཀྱི་སྐུ་ཚབ་དོན་ཁང་གཉིས་ཀྱིས་གོ་སྒྲིག་གནང་བ་དང་། དེའི་ཐོག་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་པ་ཁག་གི་ཚོགས་མི་དང་གཞུང་ཚབ་མི་སྣ་སོགས་ཚོགས་བཅར་བ་མང་དག་ཅིག་མཉམ་ཞུགས་གནང་ཡོད་འདུག
ཇི་ནི་ཝར་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་གི་ལྷན་ཚོགས་ཐེངས་༥༣པ་དེ་བཞིན་ཟླ་བ་འདིའི་ཚེས་༡༩ནས་ཟླ་༧པའི་ཚེས་༡༤བར་ཚོགས་ཀྱི་ཡོད་པ་རེད།

གསར་འགོད་པ། རིག་འཛིན་ཆོས་སྒྲོན།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཀླུ་འབུམ།

རྒྱ་ནག་གི་གདེང་ཚོད་ལྡན་པའི་ཕྱི་འབྲེལ་ཐབས་བྱུས་དེ་རྒྱལ་སྤྱིའི་ནང་ལག་བསྟར་བྱེད་ཕྱོགས་སྐོར།

Thu, 22 Jun 2023 16:01:13 -0400

བོད་དང་རྒྱལ་སྤྱིའི་གནས་བབ་ཅེས་པའི་ལེ་ཚན་ནང་། རྒྱ་ནག་གཞུང་གིས་ Wolf-Warrior ཞེས་གདེང་ཚོད་ལྡན་པའི་ཕྱི་འབྲེལ་ཐབས་བྱུས་དེ་རྒྱལ་སྤྱིའི་ནང་ལག་བསྟར་ཇི་ལྟར་བྱེད་བཞིན་ཡོད་པའི་སྐོར་བོད་རང་དབང་སློབ་ཕྲུག་ཚོགས་པའི་ལས་འཆར་ངེས་སྟོན་པ་འཆི་མེད་ལྷ་མོ་ལགས་དང་ལྷན་བསྟན་འཛིན་བདེ་སྐྱིད་ལགས་ཀྱིས་གླེང་མོལ་གནང་ཞུས་པར་གསན་རོགས་ཞུ།།
གསར་འགོད་པ། བསྟན་འཛིན་བདེ་སྐྱིད།
རྩོམ་སྒྲིག་པ། བཀྲིས་དབང་ཕྱུག
དྲ་ཐོག་སྤེལ་མཁན། རྟ་མགྲིན་དབང་ཕྱུག

རྒྱ་ནག་ནི་འཇར་མན་ནང་གསང་མྱུལ་གྱི་ལས་དོན་སྤེལ་མཁན་གཙོ་བོའི་གྲས་སུ་ཐེར་འདོན་བྱས་འདུག

Thu, 22 Jun 2023 15:35:00 -0400

ཕྱི་ཟླ་༦པའི་ཚེས་༢༠ཉིན་རྒྱ་ནག་གི་སྲིད་བློན་གསར་པ་འཇར་མན་ནང་འཚམས་གཟིགས་སུ་འབྱོར་ཏེ་འཇར་མན་གྱི་སྲིད་བློན་དང་མཇལ་འཕྲད་གནང་པའི་ཉིན་མོར། འཇར་མན་བདེ་སྲུང་ལས་དོན་ཁང་གི་ལོ་འཁོར་སྙན་ཐོ་ཞིག་བཏོན་པའི་ནང་། རྒྱ་ནག་ནི་འཇར་མན་ནང་གསང་མྱུལ་གྱི་ལས་དོན་སྤེལ་མཁན་གཙོ་བོའི་གྲས་ཡིན་པ་ཐེར་འདོན་བྱས་འདུག
འཇར་མན་གཞུང་གིས་ཚེས་༢༠ཉིན་ཕྱིར་བསྒྲགས་བྱས་པའི་འཇར་མན་བདེ་སྲུང་ལས་དོན་ཁང་གི་ལོ་འཁོར་སྙན་ཐོའི་ནང་། རྒྱ་ནག་ནི་འཇར་མན་ནང་ཆབ་སྲིད་དང་དཔལ་འབྱོར། དམངས་ཁྲོད་བཅས་ཀྱི་ཐོབ་ཐང་དང་འབྲེལ་བའི་གནད་དོན་ཐད་ནས་གསང་མྱུལ་གྱི་ལས་དོན་སྤེལ་མཁན་གཙོ་བའི་གྲས་སུ་ཐེར་འདོན་བྱས་འདུག་ཅིང་། སྙན་ཐོ་འདི་ནི་འཇར་མན་གྱི་སྲིད་བློན་(Olaf Scholz)་དང་རྒྱ་ནག་གི་སྲིད་བློན་གསར་པ་ལིས་ཆང་རྣམ་གཉིས་ཕྱི་ཟླ་༦ཚེས་༢༠ཉིན་འཇར་མན་གྱི་རྒྱལ་ས་སྦར་ལིན་དུ་མཇལ་འཕྲད་གནང་པའི་ཉིན་མོ་དེ་རང་དུ་བཏོན་ཡོད་པ་རེད། རྒྱ་ནག་གི་སྲིད་བློན་གསར་པ་ལིས་ཆང་གི་འཇར་མན་གྱི་བལྟ་བསྐོར་འདི་ནི་ཁོང་སྲིད་བློན་གྱི་ལས་འཁུར་བླངས་རྗེས་ཀྱི་ཕྱི་རྒྱལ་ཡུལ་གྲུའི་ལྟ་སྐོར་ཐོག་མ་དེ་ཡིན་པ་རེད། འཇར་མན་གྱི་སྲིད་བློན་(Olaf Schoz)་སྔ་ལོ་ཕྱི་ཟླ་༡༡པའི་ནང་རྒྱ་ནག་ཏུ་བལྟ་སྐོར་དུ་ཕེབས་ཤིང་། དེ་ནི་རྒྱ་ནག་གཞུང་གིས་ཏོག་དབྱིབས་ནད་ཡམས་ཀྱི་བཀག་རྒྱ་ཕྱིར་བསྡུ་བྱས་རྗེས་ནུབ་ཕྱོགས་མང་གཙོའི་ཡུལ་གྲུའི་དཔོན་རིགས་རྒྱ་ནག་ནང་བལྟ་སྐོར་གནང་མཁན་ཐོག་མ་དེ་ཡང་ཆགས་ཡོད་པ་རེད།
ཕྱི་ཚེས་༢༠ཉིན་འཇར་མན་གྱི་སྲིད་བློན་(Olaf Scholz)་ཡིས་གཙོས་པའི་མཐོ་རིམ་དཔོན་རིགས་ཚོས་རྒྱ་ནག་གི་སྲིད་བློན་གསར་པ་(Li Qiang)་གིས་སྣེ་ཁྲིད་པའི་རྒྱ་ནག་གི་དཔོན་རིགས་དགུ་དང་ཐུག་འཕྲད་སྐབས། རྒྱལ་ཁབ་གཉིས་ཀྱི་འབྲེལ་ལམ་ཡར་རྒྱས་སོགས་ཀྱི་ཐད་ནས་གྲོས་མོལ་བྱས་ཡོད་འདུག་ལ། རྒྱལ་ཁབ་གཉིས་ཀྱི་དཔོན་རིགས་ཐུག་འཕྲད་རྗེས་འཇར་མན་གྱི་སྲིད་བློན་(Olaf Scholz)་དང་རྒྱ་ནག་གི་སྲིད་བློན་(Li Qiang)་གཉིས་ཀྱིས་མཉམ་འབྲེལ་གསར་འགོད་གསལ་བསྒྲགས་ཤིག་ཀྱང་སྤེལ་ཡོད་པ་རེད། འོན་ཀྱང་ཁོང་གཉིས་ནས་སྔོན་ཚུད་ནས་གྲ་སྒྲིག་ཡོད་པའི་སྒྲགས་གཏམ་ཕྱིར་བསྒྲགས་བྱས་མ་གཏོགས་དེར་འདུས་ཀྱི་གསར་འགོད་པ་ཚོར་དྲི་བ་བྱེད་པའི་གོ་སྐབས་སྤྲད་མེད་པ་དེ་ནི། འདི་སྔོན་སྔ་འཇར་མན་ནང་བྱུང་མྱོང་མེད་པའི་སྣང་ཚུལ་ཞིག་རེད་ཅེས་གསར་འགོད་པ་གྲགས་ཅན་ཁག་ཅིག་གིས་སྤྱི་ཚོགས་དྲ་རྒྱ་(Twitter)་ཐོག་གནས་ཚུལ་བཀོད་སྤེལ་བྱས་འདུག
འཇར་མན་གྱི་སྲིད་བློན་(Olaf Scholz)་ཡིས་གསར་འགོད་ལྷན་ཚོགས་ཐོག་སྤེལ་བའི་གཏམ་བཤད་ཀྱི་ནང་། འགྲོ་བ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ནི་ང་ཚོ་མི་རེ་ངོ་རེས་བརྩི་སྲུང་བྱེད་དགོས་པའི་འོས་འགན་ཡིན་སྐོར་གསུངས་པ་ལས་བོད་དང་། ཡུ་གུར། ཐེ་ཝན། ཧོང་ཀོང་བཅས་ཀྱི་གནད་དོན་གླེང་མེད་པ་(Berlin)་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གི་གཙོ་འཛིན་(Kai Muller)་ཡིས་འགྲེལ་བརྗོད་གནང་འདུག
བརྒྱུད་ལམ་ཁག་ནང་གནས་ཚུལ་བཀོད་པ་ལྟར་ན། འཇར་མན་གྱི་སྲིད་བློན་དང་རྒྱ་ནག་གི་སྲིད་བློན་གཉིས་ཐུག་འཕྲད་བྱས་པའི་སྐབས་སུ། འཇར་མན་སྲིད་བློན་ལས་ཁུངས་ཀྱི་ཕྱི་རོལ་དུ་སྟོད་གོས་དམར་པོ་གྱོན་པའི་རྒྱ་ནག་དམར་ཤོག་ཚོགས་པར་རྒྱབ་སྐྱོར་བྱེད་མཁན་ཚོས་དགའ་བསུ་བྱས་ཡོད་པ་དེ་དག་གྲས་ཀྱི་མི་མང་ཆེ་བ་ན་གཞོན་སློབ་མ་ཡིན་སྲིད་པ་དང་། ཡང་བོད་མི་དང་། ཡུ་གུར། ཐེ་ཝན། དེ་བཞིན་ཧོང་ཀོང་དང་རྒྱ་རིགས་དམངས་གཙོ་དོན་གཉེར་བ་རྒྱ་ནག་གཞུང་ལ་ངོ་རྒོལ་སྐད་འབོད་བྱེད་མཁན་དེ་དག་ས་ཐག་རིང་ཞིང་མི་མངོན་པ་ཆེན་པོ་མེད་པའི་ས་ཁུལ་ཞིག་ཏུ་ངོ་རྒོལ་བྱེད་ཆོག་པའི་མཆོག་ཆན་སྤྲད་ཡོད་འདུག

གསར་འགོད་པ། བསོད་ནམས་ལྷ་མོ།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། སྐལ་ལྡན་བློ་གྲོས།
དྲྭ་ཐོག་སྤེལ་མཁན། ཀླུ་འབུམ།

བོད་པའི་དེང་དུས་ཀྱི་རྩོམ་དང་རྩོམ་རིགས་ལ་ཕན་ཐོགས་ཡོང་བའི་རེ་བ་ཡོད་ཅེས་གསུངས་བ།

Thu, 22 Jun 2023 14:01:50 -0400

བོད་རིགས་དབྱིན་ཡིག་ཐོག་རྩོམ་པ་པོ་ཁག་ཅིག་གི་རྩོམ་ཡིག་དང་གཞན་ཡང་བོད་ཡིག་ནས་དབྱིན་བསྒྱུར་གནང་བ་བཅས་ཕྱོགས་བསྡུས་གནང་བའི་དཔེ་དེབ་གསར་པ་ཞིག་དབུ་འབྱེད་གནང་རྒྱུ་ཡིན་པ་དང་། དཔེ་དེབ་ཕྱོགས་སྒྲིག་གནང་མཁན་བསྟན་འཛིན་བདེ་སྐྱིད་ལགས་ཀྱིས་དཔེ་དེབ་དེ་ནི་གོ་ལ་ཡོངས་ཀྱི་རྩོམ་རིག་ལ་ཕན་ཐོགས་རྒྱ་ཆེ་ཡོང་ངེས་ཡིན་པ་གསུངས་ཡོད་པའི་སྐོར་འདི་ག་གསར་འགོད་པ་བསྟན་འཛིན་བདེ་སྐྱིད་ལགས་ཀྱིས་གླེང་གློང་ཞུས་པར་གསན་རོགས་ཞུ།།
གསར་འགོད་པ། བསྟན་འཛིན་བདེ་སྐྱིད།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་སྤེལ་མཁན། རྟ་མགྲིན་དབང་ཕྱུག

ཁེ་ན་ཌའི་རྒྱལ་ཡོངས་སུ་བོད་དོན་རྐང་འཁོར་སྐོར་བསྐྱོད་ཀྱི་དགོས་དོན་དང་དམིགས་ཡུལ་སྐོར་ངོ་སྤྲོད་གནང་བ།

Thu, 22 Jun 2023 12:59:25 -0400

ཁེ་ན་ཌའི་Toronto གྲོང་ཁྱེར་དུ་གནས་བཞུགས་བོད་དོན་འཐབ་རྩོད་པ་སངས་རྒྱས་སྐྱབས་ལགས་ནས་ཉེ་སྔོན་ཕྱི་ཟླ་༥པའི་ཚེས་༡༧ཉིན་ནས་བཟུང་ཁེ་ན་ཌའི་རྒྱལ་ཡོངས་སུ་བོད་དོན་ཆེད་རྐང་འཁོར་སྐོར་བསྐྱོད་ཀྱི་འགོ་འཛུགས་གནས་ཡོད་ཅིང་། ཐེངས་འདིའི་མི་རབས་གསར་པའི་ལེ་ཚན་ནང་སངས་རྒྱས་སྐྱབས་ལགས་སུ་ལས་འགུལ་གྱི་ད་ལྟའི་གནས་བབ་དང་ལམ་བར་དུ་བོད་དོན་དྲིལ་བསྒྲགས་དེ་བཞིན་ལས་འགུལ་གྱི་དགོས་འདུན་དང་དམིགས་ཡུལ་བཅས་ཀྱི་སྐོར། འདི་གའི་ལས་བྱེད་དོན་རྣམ་རྒྱལ་ལགས་ཀྱིས་ཁོང་ལ་གནས་འདྲི་ཞུས་པར་གསན་རོགས་ཞུ༎
གསར་འགོད་པ། དོན་གྲུབ་རྣམ་རྒྱལ།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲ་ཐོག་སྤེལ་མཁན། རྟ་མགྲིན་དབང་ཕྱུག

རྒྱ་ནག་གཞུང་གིས་ཝ་མོ་རྔོན་པ་ཞེས་ཕྱི་སྡོད་གནད་ཡོད་མི་སྣ་རྒྱ་ནག་ཏུ་ཕྱིར་ལོག་ཐབས་དང་འགུག་ཐབས་བྱེད་བཞིན་འདུག

Thu, 22 Jun 2023 11:40:00 -0400

དེ་ཡང་ཨ་མི་རི་ཀའི་གྲོང་ཁྱེར་ནིའུ་ཡོག་གི་(Brooklyn)་ས་གནས་ཁྲིམས་ཁང་གིས་ཁུལ་དེའི་ཉེན་རྟོག་པ་ཟུར་པ་(Michael McMahon)་དང་། གཞན་རྒྱ་མི་གཉིས་ཀྱིས་རྒྱ་ནག་གཞུང་དང་མཉམ་འབྲེལ་གྱི་ཐོག་ནས། ནིའུ་ཇར་སིའི་གྲོང་ཁྱེར་ནང་གནས་སྡོད་བྱེད་མཁན་རྒྱ་རིགས་(Xu Jin)་དང་། ཁོང་གི་བཟའ་ཟླ་(Liu Fang)་གཉིས་ཕྱིར་རྒྱ་ནག་ཏུ་ལོག་ཡོང་ཐབས་སུ་རྣམ་པ་འདྲ་མིན་གྱི་ཐོག་ནས་འགུག་ཐབས་དང་གནོན་ཤུགས་སྤྲད་ཡོད་པ་དང་། དེ་ནི་རྒྱ་ནག་གཞུང་གི་(Operation Fox Hunt)་ཞེས་མཉམ་དུ་ཝ་མོ་རྔོན་ཞེས་དགོས་ངེས་ཅན་གྱི་མི་སྣ་འཚོལ་ཞིབ་བྱེད་རྒྱུའི་ལས་འགུལ་གི་འཆར་གཞི་ཡིན་པ་དང་། དེ་ནི་གཙོ་བོ་ཕྱི་ཕྱོགས་སུ་གནས་སྡོད་རྒྱ་ནག་གཞུང་དང་ལྟ་སྤྱོད་མི་མཐུན་མཁན་དང་། ཡང་ན་རྒྱ་ནག་ནང་ནག་ཉེས་ཕོག་པའི་མི་སྣ་འཚོལ་ཞིབ་དང་འབྲེལ་རྒྱ་ནག་ལ་ཕྱིར་ལོག་ཡོང་ཐབས་ཀྱི་ལམ་ནས་ཉེས་ཆད་འགེལ་རྒྱུའི་སྲིད་བྱུས་ཞིག་ཡིན་པ་གནས་ཚུལ་སྤེལ་འདུག་ལ། ཨ་རིའི་ས་གནས་ཁྲིམས་ཁང་ནས་ཉེན་རྟོག་པ་ཟུར་པ་དེ་དང་གཞན་རྒྱ་རིགས་དེ་གཉིས་བཅས་ལ་ནག་ཉེས་ཡོད་པ་ར་འཕྲོད་གནང་ཡོད་འདུག
གོང་དུ་ཞུས་པའི་བཟའ་འཚོ་གཉིས་ཀྱི་ཕ་ལོ་ན་༨༣ཡིན་པ་ཁོང་ཕྱི་ལོ་༢༠༡༧ལོར་རྒྱ་ནག་གིས་ཨ་རིར་ཆེད་མངགས་བཏང་ཏེ་ཁོང་གི་བུ་ཕྱིར་རྒྱ་ནག་ཏི་ཁྲིད་ཡོང་ཐབས་བྱེད་བཅུག་ཡོད་འདུག་པ་མ་ཟད། ཕ་དེས་ཀྱང་བུར་རྒྱ་ནག་ལ་ལོག་དགོས་བའི་ཨུ་ཚུགས་ལུགས་ཨུ་ཚུགས་རྒྱབ་པ་བཅས་ཁོང་གཉིས་དང་ནང་མི་ཉེ་འབྲེལ་ཚོར་རྒྱུན་རིང་པོ་ཞིག་ལ་བསུན་གཙེར་དང་སྡིགས་ར་སྐུལ་བ་སོགས་ཀྱི་དཀའ་ངལ་འཕྲད་ཡོད་ལུགས་ཁྲིམས་ཁང་ནང་ཞུ་གཏུགས་སྐབས་འགྲེལ་བརྗོད་བྱས་ཡོད་འདུག
ས་གནས་ཁྲིམས་ཁང་གིས་ཁྲིམས་བཤེར་སྐབས་ཁྲིམས་རྩོད་པ་(Meredith Arfa)་ ཡིས། གནད་དོན་འདི་ནི་རྒྱ་ནག་གཞུང་གིས་ཁོང་གཉིས་རྒྱ་ནག་ལ་ཕྱིར་ལོག་རྒྱུར་ཡུན་རིང་བསུན་གཙེར་དང་སྡིགས་ར་སྐུལ་བའི་ངན་བྱུས་ཞིག་རེད་ཅེས་རྩོད་ལེན་བྱས་ཡོད་པ་(The Washington Post)་གསར་ཁང་གིས་ལུང་འདྲེན་བྱས་འདུག
རྒྱ་ནག་གཞུང་གིས་དེ་སྔ་གོང་བརྗོད་རྒྱ་མི་(Xu Jin)་རྒྱ་ནག་གཞུང་གི་ལས་བྱེད་ཡིན་པའི་སྐབས་ཨ་སྒོར་ས་ཡ་༣༠ཙམ་རྐུ་འཁྱེར་བྱས་ཡོད་ལུགས་ཀྱི་ཉེས་འཛུགས་བྱས་མྱོང་ཡོད་འདུག

ཁྲག་རྩ་འགག་པ་ནས་ཐོན་པའི་ནད་རིགས་ཀྱི་ཉེན་ཁ་དང་འགོག་ཐབས།

Thu, 22 Jun 2023 11:24:31 -0400

ད་རིང་གི་གཏམ་གླེང་ལེ་ཚན་ནང་ང་ཚོ་བོད་པའི་སྤྱི་ཚོགས་ནང་དུས་རྒྱུན་འཕྲོད་བསྟེན་སྐོར་གླེང་སྐབས་གྲིབ་སྐྱོན་གྱི་ནད་ཕོག་པའི་གནས་ཚུལ་མང་པོ་ཐོས་རྒྱུ་ཡོད་ལ། དེ་ཡང་ཁྲག་རྩ་དང་འབྲེལ་བ་ཆགས་ཤིང་། ཁྲག་རྩའི་འཁོར་རྒྱུག་ཡག་པོ་མེད་ན་སྲོག་ལ་ཉེན་ཁ་ཡང་འཕྲད་ཀྱི་ཡོད། ཁྲག་རྩ་འགག་པ་ནས་ཐོན་པའི་ནད་རིགས་ཀྱི་ཉེན་ཁ་དང་སྔོན་འགོག་སྐོར་ལ་ཟས་བཅུད་རིག་པའི་ཆེད་ལས་པ་དང་ལྷན་དུ་སྒྲོལ་དཀར་ལགས་ཀྱིས་བཀའ་མོལ་ཞུས་པ་ཞིག་གསན་རོགས་གནང་།།
གསར་འགོད་པ། སྒྲོལ་དཀར།
དྲ་ཐོག་སྤེལ་མཁན། སྒྲོལ་དཀར།

ཨོ་སི་ཁྲི་ར་ལི་ཡ་རྒྱ་གར་གྱི་རིག་གཞུང་ལྟེ་གནས་ཁང་དུ་སྲིད་སྐྱོང་སྤེན་པ་ཚེ་རིང་མཆོག་ནས། རྒྱ་གར་དང་བོད་ཀྱི་གནའ་དེང་འབྲེལ་བའི་སྐོར་གསུང་བཤད་གནང་ཡོད་པ།

Thu, 22 Jun 2023 06:32:00 -0400

སྤྱི་ཟླ་༦པའི་ཚེས་༢༢ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨོ་སི་ཁྲི་རཱ་ལི་ཡའི་གྲོང་ཁྱེར་Melbourneམེལ་སྦོན་དུ་རྟེན་གཞི་ཆགས་པ། ཨོ་སི་ཁྲི་ར་ལི་ཡའི་Australia India Instituteརྒྱ་གར་གྱི་རིག་གཞུང་ལྟེ་གནས་ཁང་གིས་གོ་སྒྲིག་མགྲོན་འབོད་བྱས་པ་བཞིན། ལྟེ་གནས་ཁང་དེར་སྲིད་སྐྱོང་སྤེན་པ་ཚེ་རིང་མཆོག་ནས་རྒྱ་གར་དང་བོད་ཀྱི་གནའ་དེང་འབྲེལ་སྐོར་ལ་གསུང་བཤད་གནང་ཡོད་ཅིང་། ལྟེ་གནས་ཁང་གི་འགན་འཛིན་དང་ཨོ་སི་ཁྲི་ར་ལི་ཡའི་གྲོས་ཚོགས་འཐུས་མི་ཟུར་པ་Lisa་Singhལི་ཟ་སིངྒ་ལགས་ནས། སྲིད་སྐྱོང་མཆོག་གིས་རྒྱ་གར་དང་བོད་ཀྱི་དུས་ཡུན་རིང་མོའི་ལོ་རྒྱུས་ཀྱི་འབྲེལ་བ་ཙམ་མ་ཟད། བོད་མིའི་རང་དབང་འཐབ་རྩོད་ཀྱི་སྐོར་ལའང་གསུང་བཤད་གནང་བ་འགྲེལ་བརྗོད་གནང་གི་འདུག

སྲིད་སྐྱོང་མཆོག་ནས་རྒྱ་གར་བོད་པའི་ལོ་རྒྱུས་ཀྱི་འབྲེལ་བ་ཙམ་མ་ཟད། བོད་མིས་རང་དབང་འཐབ་རྩོད་ཀྱི་གནས་སྟངས་ཀྱང་འགྲེལ་བཤད་བསྐྱོན་སོང་བ་དེས། དེ་ལ་ཆེད་བཅར་གནང་མཁན་མང་པོ་ཞིག་གི་བོད་དོན་གོ་རྟོགས་སད་པར་ཕན་ཐོགས་འབྱུང་རྒྱུར་ཐེ་ཚོམ་མི་དགོས་པ་ཞིག་དང་། ཁོང་གིས་དབུ་མའི་ལམ་གྱི་སྐོར་དང་དབུ་མའི་ལམ་དེ་རྒྱ་ནག་གཞུང་གིས་དང་ལེན་མ་བྱས་པ། རྒྱ་གཞུང་གིས་དང་ལེན་མི་བྱེད་དོན་གྱི་ཧང་ཟོམ་ཅི་ཡིན་སོགས་གསལ་སྟོན་གནང་བ་འགྲེལ་བརྗོད་གནང་སོང་ཞིང་། མོ་རང་གིས་སྲིད་སྐྱོང་མཆོག་གི་གསུང་བཤད་གོ་སྒྲིག་གནང་དོན་ནི། རྒྱ་གར་དང་བོད་ཀྱི་འབྲེལ་བ་ནི་ཧ་ཅང་གཏིང་ཟབ་དང་དམིགས་བསལ་ཅིག་ཡིན་པ་འགྲེལ་བརྗོད་གནང་དོན་རྒྱ་གར་དང་བོད་ཀྱི་འབྲེལ་བ་ནི་གཏིང་ཟབ་པའི་ལོ་རྒྱུས་ཀྱི་འབྲེལ་བ་ཞིག་ཡིན་པར་མཐོང་གི་ཡོད་ལ། སྲིད་སྐྱོང་མཆོག་ནས་དེ་རིང་ང་ཚོར་རྒྱ་གར་ནས་ནང་ཆོས་བོད་དུ་དར་བ་དང་ཕན་ཚུན་རྒྱལ་མཚམས་འདབས་འབྲེལ་ཡིན་པ་སོགས་ཀྱིས། བོད་དང་རྒྱ་གར་བར་གནའ་སྔ་མོ་ནས་འབྲེལ་ལམ་གཏིང་ཟབ་ཡོད་པ་མ་ཟད། ཁྱད་པར་དུ་སྤྱི་ལོ་༡༩༥༩ལོ་ནས་རྒྱ་གར་གྱི་སྲིད་བློན་ནེཧ་རུ་མཆོག་ནས་༧གོང་ས་མཆོག་དང་བོད་མི་ཚོ་རྒྱ་གར་ནང་བཞུགས་བཅུག་པ་དེ། རྒྱ་གར་གྱི་སྲིད་བློན་རིམ་པའི་སྐབས་རྒྱུན་བསྐྱང་བཞིན་པའི་ཁར། བོད་མི་ཚོས་རྒྱ་གར་ནང་སོ་སོའི་ཆོས་དང་རིག་གཞུང་། སྐད་ཡིག་བཅས་སྦྱང་སྤྱོད་སྤེལ་གསུམ་བྱེད་ཐུབ་པ་སོགས་ཀྱི་ཆ་ནས་ཀྱང་འབྲེལ་བ་ཧ་ཅང་དམིགས་བསལ་ཅིག་ཡིན་པར་གསལ་སྟོན་གནང་བ་འགྲེལ་བརྗོད་གནང་སོང་།

གཞན་ཡང་ལི་ཟ་སིངྒ་ལགས་ནས་སྲིད་སྐྱོང་མཆོག་གིས་ཨོ་སི་ཁྲི་ར་ལི་ཡའི་ནང་གཟིགས་སྐོར་གནང་བ་དེས། བོད་ཀྱི་ཆོས་དང་རིག་གཞུང་སྲུང་སྐྱོབ་དང་བོད་དོན་ལ་ཕན་ཐོགས་ཆེན་པོ་ཡོད་པར་མཐོང་བ་འགྲེལ་བརྗོད་གནང་གི་འདུག བོད་མིའི་རང་དབང་འཐབ་རྩོད་ཀྱི་དབུ་མའི་ལམ་དེར་ནུབ་ཕྱོགས་སུ་རྒྱབ་སྐྱོར་ཆེན་པོ་ཡོད་པར་མཐོང་གི་འདུག་ལ། སྲིད་སྐྱོང་མཆོག་ནས་ཨོ་སི་ཁྲི་ར་ལི་ཡའི་ནང་གཟིགས་སྐོར་གནང་བ་དེས། བོད་དོན་དང་བོད་ཀྱི་ཆོས་རིག་དང་ངོ་བོ་སྲུང་སྐྱོབ་བཅས་འགྲོ་བཞིན་པར་ཕན་ཁྱད་ཆེན་པོ་ཡོད་པར་མཐོང་གི་ཡོད་པ་ནི། དཔེར་ན་ཁ་སང་སྲིད་སྐྱོང་མཆོག་ནས་ཨོ་སི་ཁྲི་ར་ལི་ཡའི་རྒྱལ་ཡོངས་གསར་སྤེལ་མཐུན་ཚོགས་སུ་གསུང་བཤད་གནང་བ་དེ་རྒྱལ་ཡོངས་སུ་རྒྱང་སྲིང་གནང་གི་ཡོད་པས་ཧ་ཅང་གལ་ཆེན་པོ་རེད་ཅེས་འགྲེལ་བརྗོད་གནང་གི་འདུག

སྲིད་སྐྱོང་སྤེན་པ་ཚེ་རིང་མཆོག་བདུན་ཕྲག་སྔ་མ་ནས་ཨོ་སི་ཁྲི་ར་ལི་ཡར་ཕྱོགས་ཕེབས་དང་འབྲེལ། ཨོ་སི་ཁྲི་ར་ལི་ཡའི་གྲོས་ཚོགས་སུ་ཕེབས་བསུ་ཆེ་བསྟོད་གནང་བ་དང་། གྲོས་ཚོགས་གོང་འོག་གི་བོད་དོན་རྒྱབ་སྐྱོར་གནང་མཁན་གྱི་གྲོས་ཚོགས་འཐུས་མི་ཚོར་ཐུག་འཕྲད་གནང་བའི་ཐོག། ཨོ་སི་ཁྲི་ར་ལི་ཡའི་རྒྱལ་ཡོངས་གསར་འགོད་མཐུན་ཚོགས་ཀྱི་སྟེང་བོད་དེ་འཛམ་གླིང་གི་ཁོར་ཡུག་དང་ས་ཁམས་ཆབ་སྲིད་ཐད་གལ་གནད་ཆགས་སྐོར་སོགས་ཀྱང་གསུང་བཤད་གནང་ཡོད་པ་རེད།

གསར་འགོད་པ། བློ་བྷེ།
རྩོམ་སྒྲིག་པ། བསྟན་འཛིན་འཕགས་སྒྲོན།
དྲྭ་ཐོག་སྤེལ་མཁན། བསྟན་འཛིན་འཕགས་སྒྲོན།

མོན་ཡུལ་བསྟན་དོན་རིག་གཞུང་གཅེས་སྐྱོང་ལྷན་ཚོགས།

Wed, 21 Jun 2023 20:40:41 -0400

ཐེངས་འདིའི་ཧི་མ་ལ་ཡའི་མི་རིགས་དང་རིག་གཞུང་ཞེས་པའི་ལེ་ཚན་ནང་ རྒྱ་གར་བྱང་ཤར་ཨ་རུ་ཎཱ་ཅལ་མངའ་སྡེའམ་མོན་རྟ་དབང་ནང་རྟེན་གཞི་གནང་བའི་མོན་ཡུལ་བསྟན་དོན་རིག་གཞུང་གཅེས་སྐྱོང་ལྷན་ཚོགས་སྐོར་ལྷན་ཚོགས་དེའི་ཚོགས་གཙོ་མཁན་ཟུར་དགེ་བཤེས་ངག་དབང་ནོར་བུ་ལགས་ལ་འདི་གའི་གསར་འགོད་པ་སེངྒེ་བསོད་ནམས་ལྷ་མོ་ལགས་ཀྱིས་གནས་འདྲི་ཞུས་ནས་གནས་ཚུལ་ཕྱོགས་བསྒྲིགས་ཞུས་པ་ཞིག་གསན་རོགས་གནང་།

གསར་འགོད་པ། སེངྒེ་རི་བསོད་ནམས་ལྷ་མོ།

རྩོམ་སྒྲིག་པ། རིག་ལྡན་སྒྲོལ་མ།

དྲྭ་ཐོག་སྤེལ་མཁན། པ་སངས་དོན་ལྡན།

༧སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གི་ཡང་སྲིད་མཆོག་སྤྲུལ་རིན་པོ་ཆེ་མཆོག་ལ་དྭགས་སུ་ཕེབས་པ།

Wed, 21 Jun 2023 19:09:28 -0400

སྔ་འགྱུར་རྙིང་མའི་དབུ་འཛིན་དྲུག་པ་༧སྐྱབས་རྗེ་སྟག་ལུང་རྩེ་སྤྲུལ་རིན་པོ་ཆེ་མཆོག་གི་ཡང་སྲིད་མཆོག་སྤྲུལ་རིན་པོ་ཆེ་འཇིགས་བྲལ་པདྨ་བཤད་སྒྲུབ་བསྟན་པའི་རྒྱལ་མཚན་དཔལ་བཟང་པོ་མཆོག་ལ་དྭགས་ས་གནས་སུ་ཐེངས་དང་པོ་ཞབས་སོར་འཁོད་པར་ལ་དྭགས་གཞུང་དམངས་གཉིས་ནས་རིན་པོ་ཆེ་མཆོག་ལ་དགའ་བསུའི་ཕེབས་བསུ་གཟབ་རྒྱས་ཞུས་སོང་།

གསར་འགོད་པ། འཕྲིན་ལས་ཆོས་སྒྲོན།

རྩོམ་སྒྲིག་པ། རིག་ལྡན་སྒྲོལ་མ།

དྲྭ་ཐོག་སྤེལ་མཁན། པ་སངས་དོན་ལྡན།

ཨ་རིའི་ནང་ཆོས་འབྲེལ་སྐོར་བསྐྱོད།

Wed, 21 Jun 2023 18:57:39 -0400

སེར་སྨད་གྲྭ་ཚང་གི་དགེ་འདུན་པ་གང་རུང་ལ་སྨན་བཅོས་རིན་པ་རྒྱ་གར་སྒོར་མོ་འབུམ་༥མན་ཆད་དགོན་པ་རང་གི་གཏོང་རྒྱུའི་ཐབས་ཤེས་གནང་གི་ཡོད་པ་དང་། གཙོ་བོ་ལས་དོན་དེའི་ཆེད་དུ་གསོན་རྩ་མ་དངུལ་བསྡུ་རུབ་གནང་གི་ཡོད་སྟབས། ད་ལེན་སེར་སྨད་གནས་བརྟེན་རིན་པོ་ཆེ་ཨ་རིའི་ནང་ཟླ་བ་༢ཙམ་གྱི་རིང་སྐོར་བསྐྱོད་ཀྱི་གསུང་ཆོས་གནང་བ་སོགས་བྱུང་འདུག གསུང་ཆོས་སྐབས་སུ་དད་ལྡན་ཆོས་ཞུ་བ་མང་ཆེ་བ་ཝེཏ་ནཱམ་ནང་པའི་དད་ལྡན་པ་ཚོ་ཡིན་ཞིང་། རིན་པོ་ཆེ་ཁོང་གིས་ད་ལེན་ཕྱོགས་ཡོངས་ཀྱི་ཆོས་འབྲེལ་དང་ཞལ་འདེབས་ཡག་པོ་བྱུང་སོང་ཅེས་གསུངས་གི་འདུག དེ་རིང་ཁ་བའི་གྲོས་ཪྭ་ལེ་ཚན་ནང་སེར་སྨད་གནས་བརྟན་རིན་པོ་ཆེ་མཆོག་དང་ཁོང་གི་སྐད་བསྒྱུར་གཉིས་དང་ལྷན་ཨ་རིའི་ནང་ཆོས་འབྲེལ་སྐོར་བསྐྱོད་དང་འབྲེལ་བའི་སྐོར་རྩོམ་སྒྲིག་འགན་འཛིན་རྡོ་རྗེ་དགྲ་འདུལ་གྱིས་བཅའ་འདྲི་བྱེད་པ་ཉན་རོགས་ཞུ།

གསར་འགོད་པ། རྡོ་རྗེ་དགྲ་འདུལ།

རྩོམ་སྒྲིག་པ། རྡོ་རྗེ་དགྲ་འདུལ།

དྲྭ་ཐོག་སྤེལ་མཁན། པ་སངས་དོན་ལྡན།

ཁེ་ཎ་ཌའི་གྲོས་ཚོགས་འོག་མས་སྙན་ཐོ་བཏོན་ནས་བོད་ནང་གི་ཛ་དྲག་གི་གནས་སྟངས་ཐེར་འདོན་གནང་འདུག

Wed, 21 Jun 2023 16:40:00 -0400

ཁེ་ཎ་ཌའི་གྲོས་ཚོགས་འོག་མའི་རྒྱལ་སྤྱིའི་འགྲོ་བ་མིའི་ཐོབ་ཐང་ཚོགས་ཆུང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྤྱི་དང་། ལྷག་དོན་རྒྱ་ནག་གཞུང་གིས་བོད་ནང་གཏན་འཇགས་སློབ་གྲྭའི་ལམ་ལུགས་ལག་བསྟར་བྱས་ནས་བོད་ཀྱི་ཆོས་དང་རིག་གཞུང་། སྐད་ཡིག་བཅས་བོད་མི་རིགས་ཀྱི་ངོ་བོ་རྩ་མེད་བཟོ་ཐབས་བྱེད་བཞིན་པ་སོགས་ཛ་དྲག་གི་གནས་ཚུལ་འཁོད་པའི་སྙན་ཐོ་ཞིག བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་༧ཀུན་གཟིགས་པཎ་ཆེན་རིན་པོ་ཆེ་སྐུ་གོང་མའི་ཡང་སྲིད་དུ་ངོས་འཛིན་མཛད་པ་དགེ་འདུན་ཆོས་ཀྱི་ཉི་མ་མཆོག་གར་སོང་ཆ་མེད་དུ་གྱུར་ནས་ད་ལོ་ལོ་ངོ་༢༨འཁོར་བའི་དུས་ཚིགས་ཏེ་ཕྱི་ཟླ་༦ཚེས་༡༦ཉིན་འདོན་སྤེལ་གནང་འདུག
༢༠༢༣་ལོའི་ལོ་འཁོར་སྙན་ཐོ་དེ་སྤེལ་བ་བརྒྱུད། ཁེ་ཎ་ཌ་གཞུང་གི་ངོས་ནས་བོད་ནང་གི་ཛ་དྲག་གི་གནས་སྟངས་ཐོག་ངེས་པར་དུ་གནང་དགོས་པའི་དགོས་འདུན་དོན་ཚན་༡༨བཏོན་ཡོད་པའི་ནང་། བོད་མིས་འཛིན་བཞིན་པའི་གཉིས་ཕན་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱ་གཉིས་དབར་འབྲེལ་མོལ་བསྐྱར་གསོ་ཡོང་རྒྱུར་རྒྱབ་སྐྱོར་གནང་དགོས་པ་དང་། བོད་དོན་དམིགས་བསལ་འབྲེལ་མཐུད་པ་ཞིག་བསྐོ་བཞག་དགོས་པ། ཁེ་ཎ་ཌའི་མཉམ་འབྲེལ་རྒྱལ་ཚོགས་ཀྱི་སྐུ་ཚབ་སོགས་བརྒྱུད་ནས་བོད་ནང་རྒྱལ་སྤྱིའི་བྱིས་པའི་ཐོབ་ཐང་གི་ཁྲིམས་གཞི་ཁག་རྒྱ་གཞུང་གིས་བརྩི་མེད་རྡོག་རོལ་གཏོང་བཞིན་པའི་གནད་དོན་ཁག་ཐེར་འདོན་དགོས་པ། བོད་ནང་གཏན་འཇགས་སློབ་གྲྭའི་སྲིད་ཇུས་ལག་བསྟར་བྱེད་མཁན་རྒྱ་ནག་གི་དཔོན་རིགས་ཚོའི་ཐོག་དཔལ་འབྱོར་ཉེས་ཆད་འགེལ་དགོས་པ་སོགས་ཀྱི་དགོས་འདུན་བཏོན་གནང་འདུག
སྙན་ཐོ་དེའི་ནང་རྒྱ་ནག་གཞུང་གིས་བོད་ནང་དྲག་པོའི་བཙན་འཛུལ་བྱས་པའི་རྐྱེན་གྱིས་ཕྱི་ལོ་ ༡༩༥༡ ལོ་ནས་བཟུང་བོད་མི་རྣམས་ཀྱིས་ད་བར་བོད་ཀྱི་ཐུན་མོང་མ་ཡིན་པའི་ཆོས་དང་རིག་གཞུང་བཅས་པ་མི་ཉམས་རྒྱུན་འཛིན་གནང་ཡོད། འོན་ཀྱང་འདས་པའི་ལོ་ཤས་ནས་བཟུང་། རྒྱ་ནག་གཞུང་གིས་བོད་དེ་རྒྱ་ནག་ཅན་དུ་བསྒྱུར་རྒྱུའི་སྲིད་ཇུས་ལག་བསྟར་བྱེད་བཞིན་པ་སོགས་འགྲེལ་བརྗོད་གནང་བ་དང་སྦྲགས། ཁེ་ཎ་ཌ་གཞུང་གི་ངོས་ནས་མང་གཙོའི་གཞུང་འཛིན་གཞན་ཁག་དང་མཉམ་དུ་རྒྱ་གཞུང་གིས་བོད་ནང་ལག་བསྟར་བྱེད་བཞིན་པའི་སྲིད་ཇུས་ཐད་ལངས་ཕྱོགས་བརྟན་པོ་འཛིན་དགོས་སྐོར་གསུངས་པ་མ་ཟད། རྒྱ་ནག་གཞུང་གིས་བོད་ཀྱི་ས་གནས་ཁག་ནང་གི་སྒེར་བཙུགས་སློབ་གྲྭ་ཁག་སྒོ་རྒྱབ་བཅུག་པ་དང་མཉམ། བོད་ནང་གཏན་འཇགས་སློབ་གྲྭའི་ལམ་ལུགས་ལག་བསྟར་བྱས་ནས་གཞི་རིམ་འོག་མའི་སློབ་ཕྲུག་གཙོས་བོད་ཕྲུག་རྣམས་ཕ་མ་དང་ཁ་བྲལ་ཐག་རིང་བའི་གཏན་འཇགས་སློབ་གྲྭར་བཅུག་ནས་རྒྱ་ནག་གི་སློབ་གསོ་སྤྲོད་བཞིན་ཡོད་ཅིང་། བོད་ཕྲུག་དེ་དག་བོད་ཀྱི་ཆོས་དང་རིག་གཞུང་། སྐད་ཡིག བོད་མི་རིགས་ཀྱི་ངོ་བོ་བཅས་བར་འབྲེལ་ཐག་བཅད་ནས་རྒྱ་རིགས་ལ་བསྒྱུར་ཐབས་བྱེད་བཞིན་པ་སོགས་ཐེར་འདོན་གནང་འདུག
ད་དུང་སྙན་ཐོ་དེའི་ནང་། བཙན་བྱོལ་བོད་མིའི་སྤྱི་ཚོགས་ཁྲོད་བོད་ཀྱི་ཆོས་དང་རིག་གཞུང་སྲུང་སྐྱོབ་ཀྱི་ལས་གཞི་དང་འབྲེལ་ཡོད་ཚོགས་པ་སྒྲིག་འཛུགས་ཁག་ལ་རྒྱབ་སྐྱོར་གནང་དགོས་པ་དང་། བོད་ནང་གི་དངོས་ཡོད་བདེན་པའི་གནས་སྟངས་རྒྱུས་ལོན་ཆེད་རྟོག་ཞིབ་ལས་གཞི་ཁག་ལ་རྒྱབ་སྐྱོར་གནང་དགོས་པ། བོད་མིའི་ཐོབ་ཐང་སྲུང་སྐྱོབ་གནང་མཁན་ཚོར་རྒྱབ་སྐྱོར་གནང་དགོས་པ། དེ་བཞིན་༧ཀུན་གཟིགས་པཎ་རིན་པོ་ཆེ་མཆོག་གི་སྐུའི་འཁྲུངས་སྐར་དུས་ཆེན་ཉིན་གཞུང་འབྲེལ་གྱི་བསྒྲགས་གཏམ་སྤེལ་ནས་༧པན་ཆེན་དགེ་འདུན་ཆོས་ཀྱི་ཉི་མ་མཆོག་གིས་གནས་སྟངས་གསལ་པོ་བཟོ་དགོས་བ་རྒྱ་ནག་གཞུང་ལ་གནོན་ཤུགས་སྤྲོད་དགོས་པ་སོགས་ཀྱི་དགོས་འདུན་བཏོན་གནང་འདུག

དེའི་སྔོན་ཟླ་བ་འདིའི་ཕྱི་ཚེས་ ༡༤ ནས་ ༡༦ བར་བྱང་ཨ་རིའི་བོད་ཀྱི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཁེ་ཎ་ཌའི་ནང་ཕེབས་ནས། ཡུལ་དེའི་ཆབ་སྲིད་ཚོགས་པའི་དབུ་ཁྲིད་(Yves-Francois Blanchett)་ལགས་ཀྱི་གཙོ་སྐྱོང་འོག་(Bloc Quebecois)་ཞེས་པའི་ཇུས་སྟོན་ཚོགས་ཆུང་ཐོག་གཏམ་བཤད་གནང་སྟེ་ད་ལྟའི་བོད་ནང་གི་ཛ་དྲག་གནས་སྟངས་དང་། བོད་མིའི་སྒྲིག་འཛུགས་ཀྱི་དམིགས་ཡུལ་དང་སྲིད་བྱུས་ངོ་སྤྲོད་གནང་པ་མ་ཟད། ཁེ་ཎ་ཌའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་(Arif Virani)ལགས་དང་། ཚོགས་གཞོན་(Garnett Genuis)་ལགས། དེ་བཞིན་ (James Maloney)་ལགས་སོགས་གཙོས་ཁེ་ཎ་ཌའི་གྲོས་ཚོགས་འཐུས་མི་དང་གཞུང་འབྲེལ་མི་སྣ་ཁག་ཅིག་དང་མཇལ་མོལ་གནང་སྟེ། བོད་ནང་གི་གནས་སྟངས་སྤྱི་དང་། དེ་འབྲེལ་བོད་རྒྱ་འབྲེལ་མོལ་ཐད་རྒྱབ་སྐྱོར་ཁྲིམས་འཆར་དང་འབྲེལ་བའི་ལས་དོན་མཇུག་སྐྱོང་ཡོང་ཐབས་དང་། ཁེ་ཎ་ཌ་གཞུང་ངོས་ནས་བོད་མིའི་སྒྲིག་འཛུགས་དང་བཙན་བྱོལ་བོད་མིར་རྒྱབ་སྐྱོར་ཚད་མཐོར་གཏོང་ཐབས་སྐོར་སོགས་གྲོས་མོལ་གནང་ཡོད་འདུག

གསར་འགོད་པ། སེང་གེ་རི་བསོད་ནམས་ལྷ་མོ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།

རྒྱ་གར་གྱི་སྲིད་བློན་མོ་དྷིས་མཆོག་གིས་ཨ་རིའི་ནང་ཉིན་གྲངས་བཞིའི་རིང་འཚམས་གཟིགས་གནང་བཞིན་འདུག

Wed, 21 Jun 2023 16:00:00 -0400

རྒྱ་གར་གྱི་སྲིད་བློན་ན་རན་རྡར་མོ་དྷིས་(Narendra Modi)མཆོག་ཨ་མི་རི་ཀའི་ནང་ཉིན་གྲངས་བཞིའི་རིང་གི་གཞུང་འབྲེལ་འཚམས་གཟིགས་ཆེད་ཕེབས་འབྱོར་བྱུང་ཡོད་པ་དང་། ཕྱི་ཚེས་༢༡རེས་གཟའ་ལྷག་པའི་ཉིན་ཨ་རིའི་གྲོང་ཁྱེར་ནིའུ་ཡོག་ནང་ཡོད་པའི་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཉེ་འགྲམ་ཐང་ཆེན་དུ་(Yoga)་ཞེས་རྩ་རླུང་སྒོམ་སྦྱོང་གི་འདུ་འཛོམས་ལ་མཉམ་ཞུགས་གནང་ནས་རྒྱལ་སྤྱིའི་རྩ་རླུང་སྒོམ་སྦྱོང་གི་ཉིན་མོར་རྒྱབ་སྐྱོར་གནང་བ་དང་མཉམ་ཨ་མི་རི་ཀའི་ནང་གི་འཚམས་གཟིགས་འགོ་འཛུགས་གནང་ཡོད་པ་རེད། འདུ་འཛོམས་དེའི་སྐབས་བོད་དོན་རྒྱབ་སྐྱོར་བ་དང་ཨ་རིའི་གློག་བརྙན་འཁྲབ་སྟོན་པ་གྲགས་ཅན་(Richard Gere)་ལགས་མཉམ་ཞུགས་གནང་འདུག

སྲིད་བློན་(Narendra Modi)་མཆོག་གིས་འདི་ཚེས་༢༡ནས་༢༤བར་གྱི་ཉིན་གྲངས་བཞིའི་རིང་ཨ་རིའི་ནང་འཚམས་གཟིགས་གནང་རྒྱུའི་མཛད་འཆར་གཙོ་བོའི་ཁོངས་སུ། ཨ་མི་རི་ཀའི་གྲོས་ཚོགས་ནང་མགྲོན་འབོད་གནང་བ་ལྟར་གྲོས་ཚོགས་གོང་འོག་ཚང་འཛོམས་སར་གཏམ་བཤད་གནང་རྒྱུ་ཡིན་པ་དང་། དེ་ནི་ཨ་རིའི་གྲོས་ཚོགས་ནང་གཏམ་བཤད་གནང་རྒྱུ་ཐེངས་གཉིས་པ་དེ་ཆགས་རྒྱུ་ཡིན་འདུག་ལ། ད་བར་རྒྱ་གར་གྱི་སྲིད་བློན་ཞིག་གིས་ཨ་རིའི་གྲོས་ཚོགས་ཚང་འཛོམས་སར་གསུངས་བཤད་ཐེངས་གཉིས་གནང་མཁན་གྱི་སྲིད་བློན་དང་པོ་དེ་ཆགས་རྒྱུ་ཡིན་པ་རེད། ཚེས་༢༢ ཉིན་སྲིད་བློན་མཆོག་ཕོ་བྲང་དཀར་པོའི་ནང་ཕེབས་ནས་ཨ་རིའི་སྲིད་འཛིན་འཇཱོ་སྦཡེ་ཌེན་(Joe Biden)་དང་མཇལ་འཕྲད་གནང་གི་ཡོད་པ་དང་། སྐབས་དེར་ཨ་རིའི་རྒྱལ་སའི་མངའ་ཁུལ་གྱི་ས་གནས་བོད་མི་ཚོས་ཕོ་བྲང་དཀར་པོའི་མདུན་དུ་རྒྱ་གར་གྱི་སྲིད་བློན་མཆོག་ལ་ཕེབས་བསུ་བྱེད་འཆར་འདུག
སྲིད་བློན་མོ་དྷི་མཆོག་ཨ་རིར་ཕེབས་ཐོན་མ་གནང་བའི་གོང་སྤྱི་བསྒྲགས་ཞིག་སྤེལ་བའི་ནང་། ད་རེས་ཨ་རིར་འཚམས་གཟིགས་བརྒྱུད་ང་ཚོ་མང་གཙོའི་རྒྱལ་ཁབ་གཉིས་བར་གྱི་འབྲེལ་ལམ་ཡག་པོ་བཟོ་ཐབས་གལ་ཆེན་ལ་བརྩི་རྒྱུ་དང་། ཨ་རིའི་ནང་གི་ཚོང་དོན་ཚན་པ་ཁག་ཅིག་གི་འགན་འཛིན་དང་མཇལ་འཕྲད་ཀྱིས་འཕྲུལ་ལས་དང་ཚོང་འབྲེལ་ཡར་རྒྱས་གཏོང་ཐབས་སུ་བཀའ་བསྡུར་གནང་འཆར་ཡོད་ཅེས་གསུངས་ཡོད་པ་ལྟར། ཚེས་༢༡ཉིན་སྲིད་བློན་མཆོག་གིས་(Tesla)་མོ་ཀྲ་བཟོ་ཚོང་ལས་ཁང་གི་སྦྱིན་བདག་གཙོ་བོ་(Elon Musk)་དང་། དེ་བཞིན་ཨ་རིའི་བོད་ཁང་གསར་འཛུགས་གནང་མཁན་གྲས་བོད་ཀྱི་ནང་བསྟན་རིག་པའི་མཁས་དབང་སློབ་དཔོན་(Robert Thurman)་ལགས་བཅས་དང་མཇལ་འཕྲད་གནང་འདུག

སྲིད་བློན་(Modi)་མཆོག་གིས་དེ་སྔ་ཕྱི་ལོ་༢༠༡༤ལོར་སྲིད་བློན་གྱི་ལས་འཁུར་ཞུས་པ་ནས་བཟུང་། ད་བར་ཨ་རིའི་ནང་ཐེངས་མང་པོ་ཕེབས་མྱོང་ཡོད་པ་དང་། དམིགས་བསལ་ད་ལྟའི་ཨ་རིའི་སྲིད་འཛིན་(Joe Biden) མཆོག་གི་གཞུང་འཛིན་རིང་འཚམས་གཟིགས་གནང་བ་ད་རེས་ཐེངས་གསུམ་པ་ཆགས་ཀྱི་ཡོད་འདུག

གསར་འགོད་པ། མཁའ་འགྲོ་དབྱངས་འཛོམས། ཀླུ་འབུམ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།

ཐེ་ཝན་གྱི་འོས་བསྡུ་ལ་ད་ལྟ་ནས་རྒྱ་ནག་གཞུང་གིས་ཐེ་ཇུས་བྱེད་བཞིན་པར་ཐེ་ཝན་ཕྱོགས་ནས་དྭོགས་ཟོན་བྱེད་ཀྱི་འདུག

Wed, 21 Jun 2023 14:47:35 -0400

རྒྱ་ནག་གཞུང་གིས་བརྡ་འཕྲིན་སྒྲིག་ཆས་དང་ཡུལ་སྐོར་སྤྲོ་འཆམ་ཚོགས་པ་ཁག་ལ་ཁྲིམས་འགལ་གྱི་མ་དངུལ་གཏོང་བ་སོགས་ཀྱི་བརྒྱུད་ནས། ཕྱི་ལོ་ ༢༠༢༤ ཕྱི་ཟླ་དང་པོའི་ཐེ་ཝན་གྱི་གནད་འགག་ཆེ་བའི་འོས་བསྡུ་ལ་ཐེ་ཇུས་བྱ་ཐབས་བྱེད་བཞིན་ཡོད་པ་ཐེ་ཝན་གཞུང་གིས་བརྗོད་པ་རོའུ་ཡེ་ཊར་གསར་སྤེལ་ཁང་གིས་ནང་ཁུལ་གྱི་བདེ་འཇགས་སྐོར་གྱི་སྙན་ཞུ་ཚན་པ་གསུམ་ནང་བཀོད་པ་མཐོང་ལུགས་ལུང་འདྲེན་བྱས་འདུག
རྒྱ་ནག་གཞུང་གིས་དམངས་གཙོ་ལྡན་པའི་ཐེ་ཝན་གླིང་ཕྲན་གྱི་གཏམ་བརྗོད་ལ་ཤུགས་རྐྱེན་སྤྲོད་ཐབས་བྱེད་བཞིན་པ་ཐེ་ཝན་གཞུང་གིས་ཡང་ཡང་བརྗོད་ཡོད་པ་དང་། ཐེ་ཝན་ཕྱོགས་ནས་ངོ་རྒོལ་ཡོད་མིན་ལ་མ་ལྟོས་པར་རྒྱ་ནག་གཞུང་གིས་ཐེ་ཝན་ནི་རྒྱ་ནག་གི་ཆ་ཤས་ཡིན་ཚུལ་བརྗོད་བཞིན་པ་རེད།
ཐེ་ཝན་རྒྱལ་ཡོངས་བདེ་འཇགས་ལྷན་ཁང་གི་འགན་འཛིན་(Wellington Koo)ཐེ་བའི་ཐེ་ཝན་བདེ་འཇགས་ཐད་ཀྱི་མཐོ་རིམ་དཔོན་རིགས་ཀྱིས་ཁ་སྔོན་རྒྱ་ནག་གིས་གནས་ཚུལ་རྫུན་མ་ཁྱབ་སྤེལ་སོགས་བྱེད་པའི་བརྒྱུད་ནས་ཐེ་ཝན་ནང་སྲིད་འཛིན་དང་གྲོས་ཚོགས་འཐུས་མིའི་འོས་བསྡུར་ཐེ་ཇུས་བྱེད་ཐབས་བྱེད་བཞིན་པ་བརྗོད་ཡོད་ཀྱང་། རྒྱ་ནག་གཞུང་གིས་ཁྲིམས་འགལ་གྱིས་མ་དངུལ་བསྡུ་རུབ་དང་མཁོ་གཏོང་ཇི་ལྟར་བྱེད་ཡོད་བཞིན་ཡོད་པའི་སྐོར་གྱི་ཞིབ་ཕྲའི་གནས་ཚུལ་གསལ་ཁ་བཏོན་མེད་པ་རེད།
རོའུ་ཡེ་ཊར་གསར་ཁང་གིས་མཐོང་བའི་གསང་བའི་ཡིག་ཆ་ཞིག་གི་ནང་། ཐེ་ཝན་གྱི་བདག་དབང་རྒྱ་ནག་ལ་གཏོགས་པར་རྒྱབ་སྐྱོར་ཡོད་པའི་སྲིད་དོན་ཚོགས་པ་ཆུང་ངུ་དང་། ས་གནས་གྲོས་ཚོགས་འཐུས་མི། རྒྱ་ནག་དང་འབྲེལ་བ་ཡོད་པའི་དགོན་པ་བཅས་ལ་ལྟ་ཞིབ་བྱེད་སའི་མིང་ཐོའི་ནང་བཀོད་ཡོད་འདུག
ཡང་སྙན་ཐོ་གཞན་ཞིག་ཏུ་རྒྱ་ནག་གཞུང་གིས་འོས་ཤོག་ལ་ཤུགས་རྐྱེན་བཟོ་ཐུབ་པའི་ས་གནས་ཀྱི་སྲིད་དོན་མི་སྣ་དང་། གྲོང་སྡེའི་སྡེ་དཔོན་སོགས་མི་སྣ་བརྒྱ་ཕྲག་མང་པོ་འོས་བསྡུའི་སྔོན་ལ་འགྲོ་གྲོན་མི་དགོས་པའི་ཐོག་ནས་རྒྱ་ནག་ནང་ཡུལ་སྐོར་སྤྲོ་འཆམ་དུ་མགྲོན་འབོད་བྱེད་བཞིན་ཡོད་པ་སོགས་ཀྱི་གནས་ཚུལ་བཀོད་འདུག

གསར་འགོད་པ། ལྕགས་མོ་འཚོ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཀླུ་འབུམ།

ཡུ་ཊ་ཨེ་ཤེ་ཡའི་དུས་སྟོན་ནང་བོད་མིས་མཉམ་བཞུགས།

Wed, 21 Jun 2023 13:51:00 -0400

ཡུ་ཊ་བོད་མིའི་སྤྱི་མཐུན་ཚོགས་པའི་ཚོགས་གཙོ་བློ་བཟང་ཚེ་རིང་ལགས་དང་ལྷན་དུ་ཚོགས་པའི་ངོས་ནས་ལོ་ངོ་སུམ་བཅུ་ལྷག་ཙམ་རིང་ཁུལ་དེའི་ཨེ་ཤེ་ཡའི་དུས་སྟོན་ནང་མཉམ་ཞུགས་གནང་ཏེ་བོད་པའི་ཐུན་མོང་མ་ཡིན་པའི་རིག་གཞུང་དང་སྒྱུ་རྩལ་སོགས་གོ་རྟོགས་སྤེལ་བའི་བརྒྱུད་རིམ་སྐོར་བཀའ་མོལ་ཞུས་པ་ཞིག་རིག་འཛིན་ཆོས་སྒྲོན་ལགས་ནས་སྙན་སྒྲོན་ཞུས་གནང་གི་རེད།

གསར་འགོད་པ། རིག་འཛིན་ཆོས་སྒྲོན།

རྩོམ་སྒྲིག་པ། རིག་ལྡན་སྒྲོལ་མ།

དྲྭ་ཐོག་སྤེལ་མཁན། པ་སངས་དོན་ལྡན།