རྨ་ཆུའི་རྒྱུད་ཀྱི་དཀར་མོ་གཡང་འཁྱིལ་ཆུ་ཪགས་ཀྱི་རྐྱེན་གཤམ་འོག་དགོན་སྡེ་ཁག་ཅིག་ཆུས་བསྣུབས་འདུག

རྒྱ་ནག་གཞུང་གིས་བོད་མདོ་སྨད་མཚོ་སྔོན་ཞིང་ཆེན་མཚོ་ལྷོ་ཁུལ་བྲག་དཀར་རྫོང་དཔལ་ཁ་གྲོང་བརྡལ་གྱི་ཉེ་འགྲམ་རྨ་ཆུའི་རྒྱུད་དུ་དཀར་མོ་གཡང་འཁྱིལ་ཆུ་ཪགས་བརྒྱབ་ཡོད་པ་དེའི་ཆུ་རྒྱས་ཏེ་ཉེ་འདབས་ཀྱི་ནང་པའི་དགོན་སྡེ་ཆུའི་ནང་བསྣུབས་ཡོད་པའི་གནས་ཚུལ་ཐོན་འདུག

དེ་ཡང་ཆེད་མཁས་པས་སྲུང་སྐར་བརྒྱུད་པར་བླངས་ནས་གནས་ཚུལ་ཤེས་རྟོགས་བྱུང་བ་ལྟར་ན། ཕྱི་ཟླ་༨པའི་ཚེས་༡༠ཉིན་གྱི་རྗེས་སུ་རྒྱ་ནག་གཞུང་གིས་རྨ་ཆུའི་སྟོད་རྒྱུད་ཀྱི་དཀར་མོ་གཡང་འཁྱིལ་ཆུ་ཪགས་ཀྱི་ཆུའི་འབབ་ཤུགས་སྟངས་འཛིན་བྱེད་པའི་ཆུ་སྒོ་བརྒྱབ་པར་བརྟེན་ཆུའི་བསགས་ཚད་ཇེ་མཐོར་སོང་ནས་ཆུ་ཕྱི་ལ་ཤོར་བའི་རྐྱེན་གྱིས་ཉེ་འགྲམ་གྱི་དུས་རབས་༡༩པ་ནས་ཡོད་པའི་ཨ་ཚོགས་དགོན་པའི་ཤུལ་དང་མཆོད་རྟེན་སྡེ་བ་སོགས་ཆུའི་བསྣུབས་པ་མ་ཟད། གཡང་འཁྱིལ་གྲོང་སྡེའི་ཕྱེད་ཀ་ཆུས་བསྣུབས་པའི་གནས་ཚུལ་ཐོན་འདུག

ཉེ་སྔོན་རྒྱ་ནག་གཞུང་གིས་མཚོ་སྔོན་མཚོ་ལྷོ་ཁུལ་བྲག་དཀར་རྫོང་གི་དཀར་མོ་གཡང་འཁྱིལ་ཆུ་མཛོད་བཟོ་སྐྲུན་ཆེད་ཨ་ཚོགས་དགོན་པ་གནས་སྤོར་བྱེད་དུ་བཅུག་ཡོད་པ་དང་། ཕྱི་ཟླ་༧ནང་དེ་སྔ་དགོན་པ་ཡོད་སའི་ས་གནས་ནས་རྩ་གཏོར་གྱིས་ཤུལ་དུ་གྱང་རོ་ཙམ་ཡང་མཇལ་རྒྱུ་མེད་པ་བཟོས་ཡོད་པ་མ་ཟད། དགོན་པ་གནས་སྤོ་བྱ་ཡུལ་དུ་འཛུགས་སྐྲུན་སོགས་གང་ཡང་བྱས་མེད་པར་དགེ་འདུན་པ་ཚོ་ལྕགས་ཤོག་ཁང་པའི་ནང་སྡོད་དགོས་བྱུང་གི་ཡོད་པ་རེད།
ཨ་ཚོགས་དགོན་བདེ་ཆེན་ཆོས་འཁོར་གླིང་ནི། ཕྱི་ལོ་༡༨༨༩ལོར་ཨ་ཚོགས་མཆོག་སྤྲུལ་དཀོན་མཆོག་ཆོས་དར་མཆོག་གིས་ཕྱག་བཏབ་པ་དང་། ད་ལྟའི་ཆར་དགོན་པ་དེར་སློབ་གཉེར་གནང་མཁན་དགེ་འདུན་པ་༡༥༧ལྷག་ཡོད་འདུག་ལ། དགོན་པ་དེ་ཕྱག་བཏབ་ནས་ད་བར་ལོ་ངོ་ ༡༣༠ལྷག་འགྲོ་བཞིན་ཡོད་པ་དང་། ཕྱི་ལོ་༢༠༢༡ལོ་ནས་བཟུང་རྒྱ་གཞུང་གིས་དགོན་པ་དེར་ལོ་ཆུང་གྲྭ་རྒྱུན་གསར་ཞུགས་མི་ཆོག་པའི་ཚོད་འཛིན་དམ་དྲག་སོགས་བྱས་ཡོད་པ་རེད།།

གསར་འགོད་པ། ལྕགས་མོ་འཚོ། ཀླུ་འབུམ།
རྩོམ་སྒྲིག་པ། དོན་གྲུབ་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།