འབར་མའི་གཞུང་གིས་གསར་འགྱུར་འགྲེམས་སྤེལ་བ་བཙོན་འཇུག

༄༅༎ཕྱི་རྒྱལ་གྱི་གསར་འགོད་པའི་ཚོགས་པ་ཞིག་གིས་འབར་མའི་གཞུང་ལ་ཨོ་སི་ཀྲོ་ལི་ཡའི་གསར་འགྱུར་འགྲེམས་སྤེལ་གནང་མཁན་ཞིག་བཙོན་འཇུག་བྱས་པ་དེ་གློད་བཀྲོལ་གཏོང་དགོས་པའི་དགོས་འདུན་བཏོན་ཡོད་པ་རེད་

བདུན་སྔོན་མའི་རེས་གཟའ་འཕུར་བུ་ཉིན་ཡུལ་དེའི་དབྱིན་ཡིག་གསར་ཤོག་མིཡན་མར་དུས་བབ་(Myanmar Times)ཞེས་པ་དེ་འགོ་འཛུགས་གནང་མཁན་ཁོངས་ཡིན་པ་སྐུ་ཞབས་རོསི་ཌང་ལི་འབར་མའི་རྒྱལ་ས་རྙིང་པ་ཡན་སྒུན་ནང་འཛིན་བཟུང་བྱས་ཡོད་པ་རེད་           ཁོང་དལྟ་འབར་མའི་ཡུལ་གྱི་གྲགས་ཆེ་བའི་ཨིན་སའེན་ཞེས་པའི་བཙོན་ཁང་དེའི་ནང་བཙོན་བཅུག་བྱས་ཡོད་པ་ཁོང་གི་ཕྱག་རོགས་ཤིག་གིས་གསུང་འདུག ཀམ་སྦོ་དྲི་ཡའི་ནང་རྟེན་གཞི་བྱས་པའི་ཕྱི་རྒྱལ་གྱི་གསར་འགོད་པའི་མཐུན་ཚོགས་ཀྱིས་སྤྱི་བསྒྲགས་ཤིག་སྤེལ་བའི་ནང་སྐུ་ཞབས་ཌང་ལི་ཁྲིམས་གཏུགས་མ་བྱས་གོང་བཙོན་བཅུག་བྱེད་དགོས་དོན་མེད་པ་དང་ཁོང་བཙོན་བཅུག་བྱེད་པ་དེ་ཚོང་དོན་དཀའ་རྙོགས་ཤིག་སེལ་རྒྱུར་ཁྲིམས་འགལ་ཐོག་སྤེལ་བའི་བྱ་བ་ཞིག་ཆགས་ཀྱི་ཡོད་སྐོར་སྐྱོན་བརྗོད་གནང་ཡོད་པ་རེད་ གོང་ཞུས་ཀམ་སྦོ་དྲི་ཡའི་ཕྱི་རྒྱལ་གྱི་གསར་འགོད་ཚོགས་པའི་ཚོགས་གཙོ་སྐུ་ཞབས་དྲེ་ལྦིདྲ་ཨམ་སི་ཀྲོརོང་ཡིས་སྐུ་ཞབས་ཌང་ལི་འཛིན་བཟུང་བཙོན་བཅུག་བྱས་པ་དེ་འབར་མའི་ཡུལ་གྱི་མིཡན་མར་དུས་བབ་ཅེས་པའི་གསར་ཤོག་གི་ཕྱི་རྒྱལ་དང་རྒྱལ་ནང་གི་སྦྱིན་བདག་བར་དབང་ཆའི་འཐབ་རྩོད་ཡོད་པ་དེ་དང་འབྲེལ་བ་ཆགས་ཀྱི་ཡོད་སྐོར་གསུང་འདུག

མིཡན་མར་དུས་བབ་ཅེས་པའི་དབྱིན་ཡིག་གི་གསར་ཤོག་དེ་སྐུ་ཞབས་ཌང་ལི་དང་འབར་མའི་དྲག་པོའི་གཞུང་གི་དྲིལ་བསྒྲགས་བློན་ཆེན་གྱི་ཉེ་འབྲེལ་སྐུ་ཞབས་ཀྲིན་ཀྲིན་ཨུ་ཡིས་བདག་གཉེར་གནང་གི་ཡོད་པ་རེད་