ལྷ་ལྡན་གཙུག་ལག་ཁང་གི་སྒོ་ཆེན་སྟེང་ཡང་དམར་ཤོག་གི་དྲིལ་བསྒྲགས་བྱེད་ཀྱི་འདུག

2021-06-25
Share
ལྷ་ལྡན་གཙུག་ལག་ཁང་གི་སྒོ་ཆེན་སྟེང་ཡང་དམར་ཤོག་གི་དྲིལ་བསྒྲགས་བྱེད་ཀྱི་འདུག ལྷ་ལྡན་གཙུག་ལག་ཁང་གི་སྒོ་ཆེན་སྟེང་ཡང་དམར་ཤོག་གི་དྲིལ་བསྒྲགས། ༦།༢༡
བོད་འབྱོར།

རྒྱ་ནག་དམར་ཤོག་ཚོགས་པ་བཙུགས་ཏེ་ལོ་བརྒྱ་འཁོར་བའི་དུས་དྲན་སྲུང་བརྩིའི་གྲ་སྒྲིག་བྱེད་བཞིན་པའི་སྐབས་འདིར། བོད་ཀྱི་རྒྱལ་ས་ལྷ་སའི་ནང་རྒྱ་ནག་དམར་ཤོག་ཚོགས་པར་དགའ་ཞེན་དགོས་པའི་དྲིལ་བསྒྲགས་ཤུགས་བྱེད་བཞིན་འདུག་ལ། དམིགས་བསལ་བོད་མིའི་ཆོས་དད་ཀྱི་ལྟེ་གནས་ལྷ་ལྡན་གཙུག་ལག་ཁང་གི་སྒོ་ཆེན་སྟེང་རྒྱ་ནག་དམར་ཤོག་གི་དྲིལ་བསྒྲགས་སྦྱར་ཡིག་ཆེན་པོ་ཞིག་བཀལ་འདུག
ཨེ་ཤེ་ཡ་རང་དབང་རླུང་འཕྲིན་ཁང་གིས་ཤེས་རྟོགས་བྱུང་བར། ཟླ་༧་ཚེས་༡་ཉིན་ནི་རྒྱ་ནག་དམར་ཤོག་ཚོགས་པ་བཙུགས་ནས་ལོ་ངོ་བརྒྱ་འཁོར་བའི་དུས་ཚིགས་ཤིག་ཡིན་པས། འདི་ལོ་རྒྱ་ནག་རྒྱལ་ཡོངས་སུ་དམར་ཤོག་ཚོགས་པའི་ལོ་རྒྱུས་ལ་སློབ་སྦྱོང་དང་དྲིལ་བསྒྲགས་ཀྱི་ལས་འགུལ་ཁྲོད། བོད་ཀྱི་ས་གནས་ཁག་ནང་དུ་ཡང་བོད་བརྒྱུད་ནང་བསྟན་གྱི་ཁྱབ་པའི་བོད་གངས་ཅན་ལྗོངས་སུ་ལྷ་མེད་སྨྲ་བའི་དམར་ཤོག་གི་སློབ་གསོ་དང་དྲིལ་བསྒྲགས་ཤུགས་ཆེན་སྤེལ་བཞིན་ཡོད་པ་ལྟར། བོད་ཀྱི་རྒྱལ་ས་ལྷ་སའི་ནང་དམར་ཤོག་ཚོགས་པའི་དྲིལ་བསྒྲགས་ཀྱི་སྦྱར་ཡིག་གིས་ཁེངས་ནས་ཡོད་འདུག

joekhang1.jpg
བོད་མིའི་ཆོས་དད་ཀྱི་ལྟེ་གནས་ལྷ་ལྡན་གཙུག་ལག་ཁང་གི་སྒོ་ཆེན་ཐོག་རླབས་ཆེན་གྱི་ཀྲུང་གོ་གུང་ཁྲན་ཏང་ཁྲི་ལོར་བརྟན་པ་ཤོག་ཅེས་པའི་ཡིག་བྱང་ཆེན་པོ་ཞིག་བཀལ་ཡོད་འདུག བར་སྐབས་ནས་རྒྱ་ནག་གཞུང་གིས་བོད་མི་ལས་བྱེད་དང་རྒས་ཡོལ་ཞུས་ཟིན་པའི་ལས་བྱེད། དམར་ཤོག་ཚོགས་པའི་ཚོགས་མི་ནང་ནང་མི། སློབ་མ་སོགས་གཙུག་ལག་ཁང་དུ་བསྐྱོད་མི་ཆོག་པ་བཟོས་ཡོད་པ་རེད།
བོད་མི་དད་ལྡན་མང་ཚོགས་ཀྱིས་མི་འདོད་པ་ཆེན་པོ་ཡོད་རུང་སྐྱོན་བརྗོད་དང་མི་འདོད་པའི་རྣམ་འགྱུར་བཏོན་པའི་ཐོབ་ཐང་གང་ཡང་མེད་པ་ལྷ་སའི་གྲོང་མི་ཁག་ཅིག་གིས་ཨེ་ཤེ་ཡ་རང་དབང་རླུང་འཕྲིན་ཁང་ལ་བརྗོད་བྱུང་།
རང་ཉིད་ཀྱི་བདེ་འཇགས་སྲུང་སྐྱོབ་ཆེད་མིང་འདོན་གནང་འདོད་མེད་པའི་བོད་མི་གནས་ཚུལ་མཁོ་སྤྲོད་པ་དེས། དེང་སྐབས་བོད་ནང་གི་གནས་སྟངས་ནི་བོད་མིའི་ཐོག་བཙན་པོ་དབང་ཡོད་དང་། རིག་གནས་གསར་བརྗེའི་ལས་འགུལ་བསྐྱར་ལངས་བྱེད་པ་ལྟ་བུ་ཡོད་པ་བརྗོད་བྱུང་།
ཕྱི་ཟླ་༦་ཚེས་༢༤་ཉིན་གཞི་ཀ་རྩེ་ཁུལ་དུ་སློབ་མ་༨༠༠་ཙམ་མཉམ་ཞུགས་ཀྱིས་ཕྲུ་གུའི་སེམས་པ་རྒྱ་ནག་དམར་ཤོག་ལ་ཕྱོགས་པ་དང་དམར་ཤོག་གི་རྗེས་སུ་འབྲངས་པ་ཟེར་བའི་བྱེད་སྒོ་ཞིག་ཀྱང་གཉེར་ཡོད་འདུག བོད་ནང་གི་ཕ་མ་མང་པོས་སློབ་གསོའི་གནས་སྟངས་འདིར་ཁ་ཕྱོགས་སྐབས་རང་ཉིད་ཀྱི་བུ་ཕྲུག་ལ་བོད་ཀྱི་ཐུན་མོང་མ་ཡིན་པའི་རིག་གཞུང་དང་བོད་ཀྱི་སྐད་ཡིག་བེད་སྤྱོད་ཐད་ལ་ཡང་གོ་སྐབས་ཉིན་རེ་བཞིན་ཉུང་རུ་འགྲོ་བཞིན་པའི་ཐད་ཧ་ཅང་གི་སེམས་འཚབ་ཆེན་པོ་བྱེད་བཞིན་ཡོད་འདུག

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎

དྲ་གནས་ཆ་ཚང༌།