རྒྱ་ནག་གཞུང་གིས་བོད་ནང་མི་རིགས་རྩ་མེད་དུ་གཏོང་རྒྱུའི་གོམས་སྟབས་མགྱོགས་སུ་གཏོང་བཞིན་པ་བློ་ཚབས་སྐྱེས་གཞི་ཡིན་པ་ཉམས་ཞིབ་པས་གསུངས་བྱུང་།

དེ་ཡང་ཟླ་༧པའི་ཚེས་༢༥་ཉིན། བོད་རང་སྐྱོང་ལྗོངས་ཟེར་བའི་ཁོངས་ཀྱི་དིང་རི་རྫོང་གིས་དམར་ཤོག་ཚོགས་པའི་ཆོས་ལུགས་ལས་དོན་ཚོགས་ཆུང་དང་ཆོས་ལུགས་མི་སྣའི་འཐུས་ཚབ་ཀྱི་བཞུགས་མོལ་ཚོགས་འདུ་ཟེར་བ་ཞིག་ཚོགས་ནས། བོད་རྒྱུད་ནང་བསྟན་དང་སྤྱི་ཚོགས་རིང་ལུགས་གཉིས་མཐུན་པ། ཆོས་ལུགས་མི་སྣའི་དམིགས་བསལ་ནུས་པ་དང་ཐུན་མོང་མ་ཡིན་པའི་ཁྱད་ཆོས་བེད་སྤྱོད་པ། དད་ལྡན་པ་ཚོས་དཔྱོད་ཤེས་ཀྱི་སྒོ་ནས་ཆོས་ལུགས་དང་ལེན་བྱེད་པ། ཁྲིམས་ལུགས་ལྟར་ཆོས་ལུགས་ལ་དོན་དམ་བྱས་ནས། མི་རིགས་མཐུན་སྒྲིལ་དང་ཆོས་ལུགས་འཆམ་མཐུན། སྤྱི་ཚོགས་བརྟན་བརླིང་ལ་སྐུལ་འདེད་བྱེད་དགོས་ཞེས་བཤད་འདུག
དེའི་ཐད་བོད་རྒྱའི་གནད་དོན་ཉབས་ཞིབ་པ་དང་ཡོ་རོབ་ཁུལ་གྱི་རྒྱ་རིགས་འབྲེལ་མཐུད་པ་སྐུ་ཞབས་སངས་རྒྱས་སྐྱབས་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ། དིང་རི་རྫོང་གི་ཆོས་ལུགས་སྐོར་གྱི་བཞུགས་མོལ་ཚོགས་འདུ་དེས་ནང་དམིགས་བསལ་གང་ཡང་མེད་པར་ནམ་རྒྱུན་རྒྱ་ནག་གཞུང་གིས་བཤད་བསྡད་ཡོད་པ་དེ་དག་བསྐྱར་བཤད་བྱས་ཡོད་པར་ངོས་འཛིན་གནང་གི་པ་འགྲེལ་བརྗོད་གནང་བྱུང་།
བཞུགས་མོལ་ཚོགས་འདུའི་སྟེང་། ཉེ་ལམ་འཚོགས་པའི་དམར་ཤོག་ཚོགས་པའི་ཚང་འཛོམས་གྲོས་ཚོགས་ཚོགས་དུས་གསུམ་པའི་ནང་དོན་དང་། ཞི་ཅིན་ཕིན་གྱིས་ཆོས་ལུགས་ལས་དོན་ཐད་ཀྱི་བསམ་ཚུལ་དང་བོད་ལྗོངས་དང་ལྷ་ས་གྲོང་ཁྱེར་གྱི་དམར་ཤོག་ཚོགས་པའི་ཆོས་ལུགས་ལས་དོན་ཚོགས་འདུའི་ནང་དོན་སོགས་སྒྲོག་སྦྱོང་བྱས་ཡོད་པ་རེད། དེ་མིན་བཞུགས་མོལ་ཚོགས་འདུའི་སྟེང་དམར་ཤོག་ཚོགས་པའི་བཀའ་དྲིན་མི་བརྗེད་པ་། དམར་ཤོག་ཚོགས་པའི་ཁ་ལ་ཉན་པ། བློ་བརྟན་འགྱུར་མེད་ངང་དམར་ཤོག་ཚོགས་པའི་རྗེས་སུ་འབྲང་དགོས་ལུགས་ནན་གྱིས་བརྗོད་པ་དང་། ཆབས་ཅིག་ཏུ་ནམ་རྒྱུན་ལྟར་མེས་རྒྱལ་གཅིག་གྱུར། མི་རིགས་མཐུན་སྒྲིལ། ལངས་ཕྱོགས་གསལ་བོའི་སྒོ་ནས་ཁ་བྲལ་ལ་ངོ་རྒོལ་བྱེད་པ་སོགས་བཤད་འདུག
སྐུ་ཞབས་སངས་རྒྱས་སྐྱབས་ལགས་ཀྱིས་རྩ་བའི་ཆ་ནས་ཉེ་ལམ་ཚོགས་པའི་རྒྱ་ནག་དམར་ཤོག་གཞུང་གི་ཚང་འཛོམས་གྲོས་ཚོགས་ཚོགས་དུས་གསུམ་པ་ནི་རྒྱ་ནག་གི་སྒོ་ཡོངས་སུ་བརྒྱབས་པའི་ཚོགས་འདུ་ཞིག་ལ་མི་རྣམས་པས་ངོས་འཛིན་བྱས་ཡོད་ལ། ཚོགས་འདུ་དེའི་ཐོག་གྲངས་ཉུང་མི་རིགས་རྒྱ་སྒྱུར་གྱི་སྲིད་ཇུས་སྐོར་གླེང་ཡོད་པས། རྒྱ་ནག་གཞུང་གིས་བོད་ཀྱི་རིག་གཞུང་རྩ་མེད་དུ་གཏོང་བའི་བྱེད་ཐབས་གདུག་རྩུབ་ཅན་དང་། བོད་མི་རིགས་རྩ་མེད་དུ་གཏོང་བའི་གོམ་སྟབས་ཇེ་མགྱོགས་སུ་གཏོང་བཞིན་པ་ནི་བློ་ཚབས་སྐྱེས་གཞི་ཡིན་པ་གསུངས་བྱུང་།
བཞུགས་མོལ་ཚོགས་འདུ་དེ་གལ་ཆེན་དོན་ཆེན་དུ་བརྩིས་ནས་དིང་རི་རྫོང་དམར་ཤོག་དྲུང་ཆེ་གཞོན་པ་དང་སྲིད་ཁྲིམས་ལས་ཁང་གིས་དྲུང་ཆེ། ཉེན་རྟོག་ལས་ཁང་གི་འགན་འཛིན། རྒྱལ་ཁབ་བདེ་འཇགས་གཞུང་སྒྲུབ་ཁང་གི་འགན་འཛིན། ལྟ་སྐུལ་འགན་འཛིན་བཅས་གཅིག་ལྕོགས་ཡིན་པའི་ཀྲང་ལིན་ཟེར་བས་གཙོ་སྐྱོང་བྱས་ཡོད་པ་དང་། དིང་རི་རྫོང་གི་དམར་ཤོག་ཚོགས་པའི་དྲུང་ཆེ་ཡིས་གཏམ་བཤད་གཙོ་བོ་བྱས་ཡོད་པ་དང་། རྫོང་དམར་ཤོག་ཚོགས་པའི་ཆོས་ལུགས་ལས་དོན་ཚོགས་ཆུང་གི་མི་སྣ་ཚང་མ་དང་རྫོང་ཡོངས་ཀྱི་ཆོས་ལུགས་མི་སྣའི་འཐུས་ཚབ། རྫོང་འཐབ་ཕྱོགས་གཅིག་གྱུར་ལས་ཁང་གི་ལས་བྱེད་པ་ཚང་མ་ཞུགས་ཡོད་པ་རེད།
རྒྱ་ནག་དམར་ཤོག་ཚོགས་པའི་སྐབས་༢༠པའི་ཚང་འཛོམས་གྲོས་ཚོགས་ཚོགས་དུས་གསུམ་པའི་སྐབས། གྲངས་ཉུང་མི་རིགས་རྒྱ་སྒྱུར་གྱི་སྲིད་ཇུས་རིགས་ཤུགས་ཆེ་རུ་གཏོང་རྒྱུ་དང་། རྒྱ་ནག་གི་དབང་བསྒྱུར་འོག་གི་མི་རིགས་༥༦སེ་འབྲུ་བཞིན་གཅིག་ཏུ་བསྒྲིལ་དགོས་ལུགས་བརྗོད་ཡོད་པའི་ཐད། སྲིད་སྐྱོང་སྤེན་པ་ཚེ་རིང་མཆོག་གིས་ཚེས་༢༤ཉིན་འདི་ག་རླུང་འཕྲིན་ཁང་གི་བཅར་འདྲི་སྐབས། རྒྱ་ནག་གིས་བོད་ནང་མི་རིགས་རྩ་མེད་དང་རིག་གཞུང་རྩ་མེད་བཟོ་བ། བོད་ཀྱི་སྣོད་བཅུད་ཡོངས་རྫོགས་མེད་པ་བཟོ་རྒྱུའི་སྲིད་བྱུས་དེ་ད་ཆ་རྣོ་ངར་ཆེ་རུ་གཏོང་གིན་ཡོད་པའི་དངོས་ཡོད་གནས་སྟངས་དེ་རྒྱལ་སྤྱིའི་སྤྱི་ཚོགས་སུ་བསྒྲགས་ཤུགས་ཆེ་རུ་གཏོང་རྒྱུ་དང་། རྒྱ་ནག་གི་འགོ་འཁྲིད་ཞི་ཅིན་ཕིང་དང་འགོ་འཁྲིད་མཐོ་ཤོས་གསུམ་པ་ཝང་ཧུ་ཉིན་། དེ་མིན་རྒྱ་མིའི་པན་ཆེན་སོགས་བོད་ཀྱི་ས་ཁུལ་ཁག་ཏུ་བསྐྱོད་པ་དེས་བོད་ཀྱི་བརྟན་ལྷིང་ལ་སེམས་འཚབ་ཡོད་པ་ཤེས་ཐུབ་ཅེས་གསུངས་ཡོད་པ་རེད།
གཞན་ཡང་ད་ལོའི་ཟླ་༦པའི་ཚེས་༢༦ ཉིན་རྒྱ་ནག་གཞུང་གིས་བསྐོ་བཞག་བྱས་པའི་པན་ཆེན་རྒྱལ་མཚན་ནོར་བུ་བོད་ལྗོངས་སུ་ཡོང་སྐབས། བོད་རང་སྐྱོང་ལྗོངས་གི་དམར་ཤོག་ཚོགས་པའི་དྲུང་ཆེ་ཝང་ཅུན་ཀྲིན་གིས་དགའ་བསུ་སྣེ་ལེན་བྱས་ཏེ་མེས་རྒྱལ་གོང་བུ་གཅིག་གྱུར་སྲུང་སྐྱོབ་དང་མི་རིགས་མཐུན་སྒྲིལ་ལ་ཤུགས་སྣོན་བྱེད་དགོས་བ། ཁ་བྲལ་ལ་ངོ་རྒོལ། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོ་བྱེད་དགོས་ལུགས་སོགས་བཤད་ཡོད་པ་རེད།

གསར་འགོད་པ། སྟག་ལྷ་རྒྱལ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།