ཨ་མདོ་ཁུལ་གྱི་དམངས་ཁྲོད་རྡུང་ལེན་པ་འཛིན་བཟུང༌།

བོད་ཨ་མདོ་ཁུལ་གྱི་དམངས་ཁྲོད་རྡུང་ལེན་པ་ཤེས་རབ་རྒྱ་ནག་གཞུང་གིས་འཛིན་བཟུང་བཀའ་ཉར་བྱས་ཡོད་འདུག
2009-02-04
གློག་འཕྲིན།
མཆན།
Share
པར་བཀོད།

༄༅༎ཕྱི་ཟླ་གཉིས་པའི་ཚེས་གསུམ་འདི་ག་རླུང་འཕྲིན་ཁང་ལ་ཁུངས་ལྡན་གནས་ཚུལ་འབྱོར་བ་ལྟར་ན་ཧ་ལམ་ཟླ་བ་གཅིག་ལྷག་གི་སྔོན་ལ་བོད་ཨ་མདོ་རྨ་ལྷོ་ཁུལ་སོག་པོའི་རྫོང་གི་དམངས་ཁྲོད་ཀྱི་རྡུང་ལེན་པ་དང་ཁ་ཤགས་བཤད་མཁན་གླུ་བ་སོག་ཕྲུག་ཤེས་ལགས་ཀྱིས་བོད་མིའི་སྐྱིད་སྡུག་དང་འབྲེལ་བའི་སྐད་འཁོར་ཅིག་གསར་སྐྲུན་འགྲེམ་སྤེལ་བྱས་པར་བརྟེན་རྒྱ་ནག་གཞུང་གིས་འཛིན་བཟུང་བྱས་ཡོད་ཚུལ་བརྗོད་ནའང༌། སྒྲ་འཁོར་འདིའི་མིང་ལ་ཅི་ཟེར་ཤེས་རྟོག་མེད་ཀྱང་དེའི་ཁྲོད་ཀྱི་སྒྲ་སྙན་རྡུང་ལེན་སྤྱི་ལོ་ ༡༩༥༨-༢༠༠༨ ཞེས་པའི་གླུང་དབྱངས་དེ་ད་ལྟ་བོད་ཨ་མདོ་ཕྱོགས་སུ་གསར་བའི་སྒོ་ནས་དར་ཁྱབ་ཆེན་པོ་ཡོད་ཟེར།ཡང་ད་ལྟ་ཨོས྄་ཁྲརེ་ལི་ཡའི་ནང་ཡོད་པའི་བོད་མི་ཞིག་གིས་ཁ་སྔོན་ཁོང་གིས་ཕ་ཡུལ་ཕྱོགས་སུ་འབྲེལ་གཏུགས་བྱེད་སྐབས་མི་མང་པོ་ཞིག་གིས་སོག་ཕྲུག་ཤེས་རབ་ལགས་ཀྱི་གོང་བརྗོད་གླུ་གཞས་དེ་ལག་ཁྱེར་ཁ་པར་ནང་བཅུག་ཡོད་པ་གསུངས་བྱུང༌ལ་དེ་བཞིན་སོག་ཕྲུག་ཤེས་རབ་ལགས་ཀྱིས་སྐད་འཁོར་གསར་པ་དེ་གསར་སྐྲུན་འགྲེམ་སྤེལ་བྱས་མ་ཐག་ཁོང་འཛིན་བཟུང་བཀག་ཉར་བྱས་ཡོད་པ་མ་ཟད་ད་ལྟ་སྐད་འཁོར་རྣམས་གཞུང་བཞེས་བྱས་ནས་ཚོང་རྭར་བཙོང་ཆོག་གི་མེ་ཟེར། སོག་ཕྲུག་ཤེས་རབ་ལགས་ནི་བོད་ཨ་མདོ་ཁུལ་གྱི་གཞོན་སྐྱེས་གླུ་བ་ཞིག་ཡིན་ཞིང་།དེ་སྔོན་མཚོ་སྔོན་རླུང་འཕྲིན་ཁང་སོགས་ཀྱིས་གཙོ་སྒྲུབ་བྱས་པའི་རིག་རྩལ་དགོང་ཚོགས་སོགས་སུ་ཞུགས་མྱོང་མཁན་ཞིག་ཡིན་ཚུལ་ལས་ཁོང་གི་སྐོར་གྱི་ཞིབ་ཕྲའི་གནས་ཚུལ་གཞན་གང་ཡང་ད་ལྟའི་བར་རྒྱུས་ལོན་བྱེད་ཐུབ་མེད་པ་རེད།

༡༩༥༨-༢༠༠༨ གཞས་ཚིག

འདིལི་སྤྱི་ལོ་ང་བརྒྱད་ལོ། དགྲ་ནག་པོ་བོད་ལ་ཐོན་གི་ལོ།

རྗེ་བླ་མ་བཙོན་ལ་བཟུང་གི་ལོ། ལོ་གན་ན་ང་ཚོ་འཇིགས་སྣང་ཆེ།

ལོ་གན་ན་ང་ཚོ་འཇིགས་སྣང་ཆེ།

འདི་ལོ་སྤྱི་ལོ་ང་བརྒྱད་ལོ། བོད་དཔའ་བོ་ཁྲག་ལ་སྦྱར་བའི་ལོ།

བོད་ཉེས་མེད་བཙོན་བཟུང་གི་ལོ། ལོ་གན་ན་ང་ཚོ་འཇིགས་སྣང༌ཆེ།

ལོ་གན་ན་ང་ཚོ་འཇིགས་སྣང་ཆེ།

འདིའི་ལོ་ཉིས་སྟོང་བརྒྱད་ཀྱི་ལོ། བོད་ཉེས་མེད་གཅར་རྡུང་བྱེད་ཀྱི་ལོ།

སའི་གོ་ལའི་འབངས་མི་བསད་པའི་ལོ། ལོ་གན་ན་ང་ཚོ་འཇིགས་སྣང་ཆེ།

ལོ་གན་ན་ང་ཚོ་འཇིགས་སྣང་ཆེ།

མཆན། (0)
Share
དྲ་གནས་ཆ་ཚང༌།