བོད་རྒྱའི་འབྲེལ་མོལ་ཐེངས་གཉིས་པ་དེ་གནང་རྒྱུའི་ཁས་ལེན་གནང་བ།

༄༅༎རྒྱ་ནག་གཞུང་གི་འགོ་འཁྲིད་ཚོས་༧གོང་ས་མཆོག་གི་སྐུ་ཚབ་རྣམ་གཉིས་དང་མཇལ་མོལ་

ཐེངས་གཉིས་པ་དེ་གནང་རྒྱུའི་ཁས་ལེན་གནང་ཡོད་པ་རེད་ རྒྱ་ནག་གཞུང་འབྲེལ་སི་སི་ཊི་ཝི་

བརྙན་འཕྲིན་ལས་ཁང་གིས་རེས་གཟའ་ཉི་མའི་ཉིན་གུང་གི་རྒྱང་སྲིང་ལས་རིམ་ནང་༧གོང་ས་མཆོག་གི་

སྐུ་ཚབ་རྣམ་གཉིས་རྒྱ་གར་དུ་༧གོང་ས་མཆོག་ལ་སྙན་སེང་ཞུ་བར་བཅར་དགོས་པ་དང་ཕྱོགས་

ཕན་ཚུན་གཉིས་ཀས་དུས་ཚོད་སྟབས་ལེགས་ཤིག་ལ་བསྐྱར་དུ་མཇལ་རྒྱུའི་མོས་མཐུན་བྱུང་སྐོར་

སི་སི་ཊི་ཝི་བརྙན་འཕྲིན་ལས་ཁང་གིས་བརྗོད་ཡོད་པ་རེད་ ཡང་རྒྱ་ནག་གཞུང་འབྲེལ་ཤིན་ཧ་

གསར་འགྱུར་ལས་ཁང་གིས་ཉིན་གཅིག་གི་འབྲེལ་མོལ་དེ་མཇུག་བསྒྲིལ་ཟིན་པ་དང་འབྲེལ་མོལ་

དེའི་ནང་བཀའ་མོལ་ཇི་བྱུང་གཞུང་འབྲེལ་གྱི་གསལ་བཤད་གང་ཡང་གནང་མེད་པ་རེད་ ཡིན་ནའང་རྒྱ་གཞུང་གི་དཔོན་རིགས་ཚོས་༧གོང་ས་མཆོག་གི་སྐུ་ཚབ་རྣམ་པར་ཉེ་ལམ་བོད་ནང་

ངོ་རྒོལ་གྱི་ལས་འགུལ་མང་དག་བྱུང་བ་དེས་ཕྱོགས་ཕན་ཚུན་དབར་འབྲེལ་མོལ་གནང་རྒྱུར་འགོག་རྐྱེན་

གསར་པ་ཞིག་ཆགས་ཡོད་སྐོར་བརྗོད་ཡོད་པ་རེད་ རྒྱལ་སྤྱིའི་ཐོག་ཉེ་ལམ་བོད་རྒྱ་ཁྱབ་ཏུ་ངོ་རྒོལ་གྱི་

ལས་འགུལ་བྱུང་བ་དེར་རྒྱ་གཞུང་གིས་གདུག་རྩུབ་ཆེན་པོའི་ཐོག་དྲག་གནོན་བྱས་པར་སྐྱོན་བརྗོད་

ཤུགས་ཆེ་ཕོག་ཡོད་པ་དང་གནད་དོན་དབྱེ་ཞིབ་གནང་མཁན་རྣམས་ཀྱིས་རྒྱ་གཞུང་ནས་

༧གོང་ས་མཆོག་གི་སྐུ་ཚབ་རྣམ་པ་དང་མཇལ་མོལ་གནང་རྒྱུའི་ཐག་གཅོད་དེ་པེ་ཅིང་ཨོ་ལིམ་པིཀ་

རྩེད་འགྲན་དང་ཉེ་བའི་དུས་སྐབས་དེར་སྐྱོན་བརྗོད་མི་ཕོག་རྒྱུའི་ཆེད་སྲིད་བྱུས་ཤིག་འཛིན་པ་ཡིན་

སྐོར་འགྲེལ་བརྗོད་གནང་གི་ཡོད་པ་རེད་ ༧གོང་ས་མཆོག་གི་སྐུ་ཚབ་རྣམ་གཉིས་དང་རྒྱ་གཞུང་གི་

དཔོན་རིགས་དབར་གྱི་མཇལ་མོལ་དེ་ཧོང་ཀོང་ཉེ་འཁྲིས་ཤན་ཀྲན་གྲོང་ཁྱེར་དེར་གནང་ཡོད་པ་རེད་