ཨོ་བྷ་མ་མཆོག་གི་མཇལ་འཕྲད་ལ་རྒྱ་ནག་གཞུང་གིས་སྐྱོན་བརྗོད།

2016-06-16
གློག་འཕྲིན།
མཆན།
Share
པར་བཀོད།
རྒྱ་ནག་གི་ཕྱི་སྲིད་ལས་ཁང་གི་མགྲིན་ཚབ་པ་Lu Kang
རྒྱ་ནག་གི་ཕྱི་སྲིད་ལས་ཁང་གི་མགྲིན་ཚབ་པ་Lu Kang
fmprc

འདི་ཚེས་༡༥ཉིན་ཨ་མི་རི་ཀའི་སྲིད་འཛིན་ཨོ་བྷ་མ་མཆོག་གིས་སྲིད་འཛིན་ལས་ཁུངས་ཕོ་བྲང་དཀར་པོའི་ནང་། བོད་ཀྱི་དབུ་ཁྲིད་བླ་ན་མེད་པ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་མཇལ་འཕྲད་བཀའ་མོལ་ཞུས་པ་དེར་དེ་རིང་རྒྱ་ནག་གཞུང་གིས་ངོ་རྒོལ་ཞུས་འདུག
དེ་ཡང་འདི་ཚེས་༡༥་ཉིན་ཨ་རིའི་སྲིད་འཛིན་ཨོ་བྷ་མ་མཆོག་གིས་ཐུགས་དགྱེས་ཚོར་ཆེན་པོའི་སྒོ་ནས། སྤྱི་ནོར་༧གོང་ས་མཆོག་སྲིད་འཛིན་ལས་ཁུངས་ཕོ་བྲང་དཀར་པོའི་ནང་གུས་བསུའི་སྣེ་ལེན་གཟབ་རྒྱས་ཞུས་པ་མ་ཟད། ཕོ་བྲང་དཀར་པོའི་Oval office་ཞེས་ཕྱི་རྒྱལ་གྱི་དབུ་ཁྲིད་རྣམས་དང་ཨ་རིའི་སྲིད་འཛིན་བར་གཞུང་འབྲེལ་མཇལ་འཕྲད་ཞུ་ས་སོགས་ལ་གཟིགས་སྐོར་ལ་གདན་འདྲེན་ཞུས་པ་དང་། དུས་ཡུན་རིང་པོར་བཀའ་མོལ་ཞུས་ཡོད་པ་རེད།
དེ་རིང་ཚེས་༡༦ཉིན་རྒྱ་ནག་གི་ཕྱི་སྲིད་ལས་ཁང་གི་མགྲིན་ཚབ་པ་Lu Kang་ཡིས་ཨ་རིའི་འགོ་ཁྲིད་ཀྱིས་ཏཱ་ལའི་བླ་མ་མཆོག་རྣམ་པའི་ག་རེའི་ཐོག་ལ་མཇལ་འཕྲད་གནང་ན་ཡང་མཇལ་འཕྲད་དེས་དེ་སྔོན་ཨ་མི་རི་ཀས་བོད་རྒྱ་ནག་གི་ཆ་ཤས་ཤིག་ཡིན་པར་ངོས་འཛིན་བྱ་རྒྱུ་དང་། བོད་རང་བཙན་ལ་རྒྱབ་སྐྱོར་བྱ་རྒྱུ་མིན་པ། དེ་བཞིན་ཁ་བྲལ་ལ་རྒྱབ་སྐྱོར་བྱ་རྒྱུ་མིན་པའི་ཁས་ལེན་དམ་བཅའ་བཞགས་པ་དེར་བརྩི་མེད་རྡོག་རོལ་བཏང་བ་ཡིན་ལུགས་རྒྱ་ནག་གི་རྒྱལ་ས་པེ་ཅིན་ནས་རྒྱུན་ལྡན་གྱི་གསར་འགོད་ལྷན་ཚོགས་ཐོག་སྐྱོན་བརྗོད་བྱས་འདུག
ཨོ་བྷ་མ་མཆོག་གིས་ཨ་རིའི་སྲིད་འཛིན་གྱི་ཐུགས་འགན་བཞེས་པ་བཟུང་བོད་ཀྱི་དབུ་ཁྲིད་བླ་ན་མེད་པ་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ད་རེས་མཇལ་འཕྲད་བཀའ་མོལ་གཙོས་པའི་མཇལ་འཕྲད་ཐེངས་མ་བཞི་ཞུས་ཡོད་རེད།
སྲིད་འཛིན་ཨོ་བྷ་མཆོག་གིས་༧གོང་ས་མཆོག་ནི་འཛམ་གླིང་ནང་གི་གུས་བརྩི་ཆེན་པོ་ཞུ་ཡུལ་གྱི་སྐྱེས་ཆེན་དམ་པ་ཞིག་ཡིན་པའི་འགྲེལ་བརྗོད་ཞུ་བཞིན་ཡོད་པ་རེད། དེ་སྔ་དབུ་ཁྲིད་རྣམ་གཉིས་ཀྱི་མཇལ་འཕྲད་སྐབས་ཀྱང་རྒྱ་ནག་གཞུང་གིས་སྐྱོན་བརྗོད་བྱས་ཡོད་པ་རེད༎

གསར་འགོད་པ་སེང་གེ་རི་བསོད་ནམས་ལྷ་མོ།

མཆན། (0)
Share
དྲ་གནས་ཆ་ཚང༌།