རྒྱ་ནག་ལ་བཟང་ཕྱོགས་ཀྱི་འགྱུར་བ་ཡོང་རྒྱུའི་རེ་བ་།

༄༅༎རྒྱ་ནག་གི་དམངས་གཙོ་དོན་གཉེར་བ་དབྱང་ཅན་ལི་ཡིས་ རྒྱ་ནག་ནང་བཟང་ཕྱོགས་ཀྱི་འགྱུར་བ་ཞིག་ཡོང་རྒྱུའི་ཐུགས་རེ་ཆེན་པོ་ཡོད་སྐོར་ ཁོང་གིས་ཁ་ས་འདི་ག་ཨ་རིའི་རྒྱལ་ས་ཝ་ཤིང་ཀྲོན་ནང་རྟེན་གཞི་བྱས་པའི་རྒྱ་ནག་གཞུང་ཚབ་མདུན་ ༡༩༨༩ ཕྱི་ཟླ་ ༦ པའི་ཚེས་ ༤འི་གནམ་བདེ་སྒོ་མོའི་དམངས་གཙོའི་ལས་འགུལ་གྱི་དུས་དྲན་ལ་དྲན་གསོའི་ངོ་རྒོལ་གྱི་ལས་འགུལ་ཞིག་སྤེལ་སྐབས་གསར་འགོད་པ་ཚོར་གསུངས་ཡོད་པ་རེད་ སྐུ་ཞབས་དབྱང་ཅན་ལི་ཡིས་ རྒྱ་ནག་ནང་ད་རེས་ཨོ་ལིམ་ཕིག་གི་རྩེད་འགྲན་དང་འབྲེལ་ མི་མང་གི་ཁྲོད་གཞུང་གི་སྐུལ་སློང་བྱས་པའི་རྒྱལ་ཞེན་རིང་ལུགས་ཤུགས་ཆེ་ཞིག་ཡོད་ནའང་ ཁོང་གིས་དགོངས་པར་ དེ་ལྟ་བུའི་སྡིག་པ་མིག་བཙུམས་ཀྱི་རྒྱལ་ཞེན་རིང་ལུགས་དེ་ རྒྱུན་རིང་བརྟན་མི་ཐུབ་ཅེས་དང་ མཐར་ཐུག་རྒྱ་ནག་དམངས་གཙོར་འགྱུར་བའི་སྐབས་སུ་ མི་མང་གི་ནུས་པ་དེ་ས་གནས་འཛིན་སྐྱོང་གི་ཆབ་སྲིད་དང་ སྤྱི་དམངས་ཀྱི་ཤེས་ཡོན་དང་འཕྲོད་བསྟེན་ ལྐོག་ཟའི་གནད་དོན་སེལ་ཐབས་བཅས་ཀྱི་ཐད་ནུས་པ་བཏོན་གྱི་ཡོད་པ་གཟིགས་ཀྱི་ཡོད་ཅེས་གསུངས་ཡོད་པ་རེད་

དགུང་གྲངས་༤༥ ཡིན་པའི་སྐུ་ཞབས་དབྱང་ཅན་ལི་ནི་ རྒྱ་ནག་གཞུང་གིས་ཕྱི་ལོ་༢༠༠༢ ཀྱི་ལོར་རྒྱ་ནག་གི་གསང་བ་རྐུ་འཁྱེར་བྱེད་མཁན་གྱི་ཐེ་ཝན་གྱི་སོ་མྱུལ་ཞིག་ཡིན་པའི་ཉེས་བཙུགས་འོག་བཙོན་བཅུག་གིས་ མཐར་ཕྱི་ལོ་༢༠༠༧ གི་ཕྱི་ཟླ་༤པའི་ནང་བཙོན་འགྲོལ་ཐོབ་པ་ཞིག་ཡིན་པ་དང་ ཁོང་ནི་ཨ་རིའི་གཙུག་ལག་སློབ་གྲྭ་ཆེན་མོ་ཧར་ཝ་ཌེ་དང་སྦར་ཀ་ལི་གཉིས་ནས་མཁས་དབང་གི་ཕྱག་འཁྱེར་ཐོབ་པའི་ཨ་རིའི་ནང་གཏན་སྡོད་ཆོག་པའི་རྒྱ་རིགས་ཤིག་ཡིན་པ་རེད་ དེ་ཡང་ཁོང་གིས་ རྒྱ་ནག་ནང་དམངས་གཙོའི་ལས་འགུལ་གྱི་ཆེད་ ད་རེས་ཉིན་གྲངས་མང་པོའི་རིང་ ཁོང་གི་བཞུགས་ཡུལ་ཨ་རིའི་གྲོང་ཁྱེར་སྦོ་སི་ཀྲོན་ནས་ཨ་རིའི་རྒྱལ་ས་ཝ་ཤིང་ཀྲོན་གྱི་བར་གོམ་བགྲོད་ཀྱི་ལས་འགུལ་ཞིག་སྤེལ་ཡོད་པ་རེད