བཀྲ་ཤིས་རབ་བརྟན་དམ་པའི་འདས་ཆོས་ལ་དམ་དྲག་བྱས་འདུག

བཀྲ་ཤིས་རབ་བརྟན་དམ་པའི་འདས་ཆོས་སྒྲུབ་པར་ཡང་རྒྱ་ནག་གི་ཉེན་རྟོག་པས་དམ་དྲག་དང་སུན་གཙེར་བྱེད་ཀྱི་ཡོད་འདུག
དེ་ཡང་འདི་ག་རླུང་འཕྲིན་ཁང་གི་བལ་ཡུལ་གྱི་གསར་འགོད་པས་གནས་ཚུལ་བཏང་བ་ལྟར་ན། བོད་དོན་ཆེད་སྐུ་ལུས་མེར་བསྲེགས་བཏང་ནས་འདས་གྲོངས་སུ་ཕེབས་པའི་བཀྲིས་རབ་བརྟན་དམ་པའི་ནང་མི་ཚོར་རྒྱ་ནག་གཞུང་གིས་ཁོང་གི་སྐུ་ཕུང་རྩིས་སྤྲོད་མ་བྱས་པར་རུས་ཐལ་མ་གཏོགས་སྤྲད་མེད་པ་མ་ཟད། འདས་ཆོས་ཐོག་ལའང་དམ་དྲག་ཆེན་པོ་བྱེད་བཞིན་པར་ཁོང་གི་ནང་མི་དང་ས་གནས་མི་མང་ཚོས་བློ་ཕམ་ཆེན་པོ་གནང་བཞིན་ཡོད་འདུག
གནས་ཚུལ་ལྟར་ན། བཀྲིས་རབ་བརྟན་ལགས་དམ་པ་དེ་ཉིད་ཀྱི་སྐུ་ཕུང་ནང་མི་ཚོས་བླ་བྲང་དགོན་པར་འཁྱེར་ནས་བོད་ཀྱི་སྲོལ་རྒྱུན་ལྟར་ཞུགས་འབུལ་གྱིས་སྨོན་ལམ་གསུང་རྒྱུའི་གྲ་སྒྲིག་གནང་ཡོད་ཀྱང་། རྒྱ་གཞུང་གིས་དེ་ལྟར་བྱེད་དུ་བཅུག་མེད་པའི་སྐོར་བོད་ནས་གནས་ཚུལ་འགྲེལ་བརྗོད་གནང་འདུག མ་ཟད་འདས་པོ་བཀྲིས་རབ་བརྟན་ལགས་ཀྱི་ཁྱིམ་དུ་ཆོས་འབུལ་སྨོན་ལམ་འདོན་རྒྱུར་རྒྱ་མིས་སུན་གཙེར་བྱེད་བཞིན་ཡོད་སྟབས། ས་གནས་ཀྱི་དགོན་པ་ཞིག་ནང་འདས་ཆོས་སྒྲུབ་དགོས་བྱུང་འདུག
བཀྲིས་རབ་བརྟན་ལགས་ཀྱི་བོད་དོན་ཆེད་རང་གི་གཅེས་པའི་ལུས་སྲོག་བློས་གཏོང་གནང་བར་བརྟེན་ས་གནས་དེའི་ཁུལ་གྱི་བོད་མི་མང་པོ་ཞིག་གིས་འདས་ཆོས་རྒྱས་པ་ཞིག་གནང་རྒྱུའི་རེ་འདོད་གནང་ཡོད་ནའང། རྒྱ་ནག་གཞུང་གི་ཉེན་རྟོག་པས་ལྟ་སྲུང་དམ་པོའི་འོག་དེ་ལྟར་གནང་མ་ཐུབ་པར་འགྱོད་སེམས་ཆེན་པོ་གནང་གི་ཡོད་པའི་སྐོར་བོད་ནས་འགྲེལ་བརྗོད་གནང་འདུག

གསར་འགོད་པ་རིག་ལྡན་སྒྲོལ་མ།