བོད་མིར་ཁྲིམས་རྩོད་རོགས་སྐྱོར་བྱེད་མཁན་ལ་དམ་བསྒྲགས་བྱས་སྐོར།

༄༅༎བོད་ནང་རྒྱ་ནག་གཞུང་ལ་ངོ་རྒོལ་བྱས་པའི་དོགས་གཞིའི་འོག་འཛིན་བཟུང་བྱས་པའི་བོད་མི་རྣམས་ནས་གླ་ཆ་མི་དགོས་པའི་ཐོག་ནས་ཁྲིམས་རྩོད་རོགས་རམ་ཞུ་རྒྱུའི་དང་བླང་བྱེད་མཁན་རྒྱ་མིའི་ཁྲིམས་རྩོད་པ་གཉིས་ལ་རྒྱ་གཞུང་གིས་ཁྲིམས་རྩོད་པའི་ལས་ཀ་བྱེད་མི་ཆོག་པའི་དམ་བསྒྲགས་བྱས་འདུག

རྒྱ་མིའི་ཁྲིམས་རྩོད་པ་ཐེང་པིའོ་ཡིས་རྒྱ་ནག་གཞུང་གི་འབྲེལ་ཡོད་ལས་བྱེད་པ་ཚོས་གཟའ་ཁོར་སྔོན་མའི་ནང་ཁོང་གི་ཁྲིམས་རྩོད་ལག་ཁྱེར་བསྐྱར་གསོ་བྱས་མ་བྱུང་ཞེས་དང་རྒྱ་མིའི་ལས་བྱེད་པ་དེ་ཚོས་ཁོང་གི་ཁྲིམས་རྩོད་པའི་ལག་ཁྱེར་བསྐྱར་གསོ་བྱ་རྒྱུའི་ཁས་ལེན་མ་བྱས་པ་དེས་ཁོང་ནས་ཁྲིམས་རྩོད་པའི་ལས་ཀ་བྱ་རྒྱུའི་ཁྲིམས་མཐུན་གྱི་ཐོབ་ཐང་བརྩི་མེད་རྡོག་རོལ་བཏང་བ་དང་རྒྱ་ནག་གཞུང་གིས་རང་གི་མི་སེར་གྱི་ཐོབ་ཐང་སྲུང་སྐྱོབ་བྱ་རྒྱུའི་ཁས་ལེན་དམ་བཅའ་དང་འགལ་བ་ཡིན་སྐོར་ཕཱ་རན་སིའི་གསར་ལས་ཁང་ལ་གསུངས་འདུག རྒྱ་མིའི་ཁྲིམས་རྩོད་པ་ཅང་ཐེན་ཡུང་ཡིས་ཁྲིམས་རྩོད་ལག་ཁྱེར་ཡང་འབྲེལ་ཡོད་རྒྱ་མིའི་ལས་བྱེད་པས་བསྐྱར་གསོ་ཕྱིར་འགྱངས་བྱས་སྐོར་གསུངས་འདུག ཁྲིམས་རྩོད་པ་ཐེང་ཡིས་ཁོང་དང་ཅང་གཉིས་གཙོས་པའི་རྒྱ་མིའི་ཁྲིམས་རྩོད་པ་མང་པོས་བོད་ནང་རྒྱ་ནག་གཞུང་ལ་ངོ་རྒོལ་བྱས་པའི་དོན་རྐྱེན་འོག་འཛིན་བཟུང་བྱས་པའི་བོད་རྣམས་ནས་གླ་ཆ་སྤྲོད་མི་དགོས་པར་ཁྲིམས་ཞིབ་ལས་དོན་ཆེད་ཞབས་ཞུའི་ཡི་གེ་ཞིག་ལ་འདི་ལོའི་ཕྱི་ཟླ་བཞི་པའི་ནང་མཚན་རྟགས་སྐྱོན་པའི་དབང་གིས་ཁོང་གཉིས་ཀྱི་ཁྲིམས་རྩོད་ལག་ཁྱེར་བསྐྱར་གསོ་མ་བྱས་པའི་སྐོར་ཡང་གསུངས་ཡོད་པའི་གནས་ཚུལ་འདུག།