རྒྱ་ནག་གིས་མེ་ཤུགས་འཕུར་མདེལ་ཚོད་ལྟ་ཡང་ཡང་བྱས་བར་བརྟེན་ཐེ་ཝན་དྭོགས་ཟོན་ངང་གནས་ཡོད་འདུག

དེ་ཡང་རྒྱ་ནག་ནང་མེ་ཤུགས་ཕུར་མདེལ་ཚོད་ལྟ་ཐེངས་མང་བྱས་པ་ཐེ་ཝན་གྱིས་ཤེས་རྟོགས་བྱུང་བ་དང་མཉམ་ཐེ་ཝན་གྱི་དམག་དཔུང་གིས་ཛ་དྲག་གི་གནས་སྟངས་སུ་བརྩིས་ཏེ་དྭོགས་ཟོན་ངང་གནས་ཡོད་པ་ཐེ་ཝན་རྒྱལ་སྲུང་ལྷན་ཁང་གིས་གཟའ་ཉི་མའི་ཉིན་བརྗོད་ཡོད་ཅིང་། ཉིན་ཤས་གོང་རྒྱ་ནག་གིས་ཞིང་ཆེན་ཁག་ནང་མེ་ཤུགས་འཕུར་འདེལ་རིགས་ལ་ཚོད་ལྟ་བྱས་ཡོད་པ་རེད།
རྒྱ་ནག་གཞུང་གིས་ཐེ་ཝན་དེ་བཞིན་རྒྱ་ནག་རང་ཉིད་ཀྱི་མངའ་ཁོངས་ཡིན་ལུགས་བརྗོད་བཞིན་པ་དང་ཐེ་ཝན་མཚོ་ཁུལ་དུ་རྒྱུན་དུ་ནས་དམག་དོན་གྱི་བྱེད་སྒོ་ཁག་སྤེལ་གྱི་ཡོད་ཅིང་། དེར་བརྟེན་ཐེ་ཝན་གྱིས་རྒྱ་ནག་གི་དམག་དོན་ལས་དོན་ཁག་ལ་དོ་སྣང་ཆེན་པོ་བྱེད་ཀྱི་ཡོད་ན་ཡང་། རྒྱ་ནག་ནང་ཁུལ་དུ་བྱུང་བའི་དམག་དོན་གྱི་ཞིབ་ཕྲའི་གནས་ཚུལ་དེ་རིགས་ཕྱིར་བསྒྲགས་བྱེད་རྒྱུ་ཧ་ཅང་དཀོན་པོ་ཡིན་པ་རེད།
ཐེ་ཝན་རྒྱལ་སྲུང་ལྷན་ཁང་གིས་གསལ་བསྒྲགས་ཤིག་སྤེལ་བའི་ནང་། གཟའ་སྤེན་པའི་སྔ་དྲོའི་ཚོུད་དྲུག་དང་སྐར་མ་ལྔ་ཅུ་ཙམ་ནས་རྒྱ་ནག་གི་དམག་དཔུང་དང་རྐང་དམག་གིས་ནང་སོག་དང་ཀན་སུའུ། མཚོ་སྔོན། ཤིན་ཅང་སོགས་ས་གནས་ཁག་ནང་མེ་ཤུགས་འཕུར་འདེལ་རིགས་ལ་ཚོད་ལྟ་ཐེངས་མང་བྱས་ཡོད་པ་དང་། ཐེ་ཝན་དམག་དཔུང་གིས་འབྲེལ་ཡོད་གནས་ཚུལ་ཐད་མུ་མཐུད་ནས་ལྟ་ཞིབ་ནན་པོ་བྱེད་བཞིན་ཡོད་པ་མ་ཟད། ཐེ་ཝན་གྱི་མཁའ་དམག་སོགས་ཀྱིས་ཛ་དྲག་གི་གནས་སྟངས་ངང་དོ་སྣང་བྱས་བསྡད་ཡོད་པའི་སྐོར་བཀོད་ཡོད་འདུག
རྒྱ་ནག་རྒྱལ་སྲུང་ལྷན་ཁང་ལ་གོང་ཞུས་གནད་དོན་ཐད་རོཡེ་ཊར་གསར་འགྱུར་བརྒྱུད་ལམ་གྱིས་ཁ་པར་བརྒྱུད་འདྲི་རྩད་བྱས་བར་ལན་འདེབས་བྱེད་མཁན་བྱུང་མེད་པ་རེད། གཟའ་ཕུར་བུའི་ཉིན་ཐེ་ཝན་རྒྱལ་སྲུང་ལྷན་ཁང་གིས་རྒྱ་ནག་གིས་ཐེ་ཝན་གྱི་ཉེ་འགྲམ་དུ་དམག་དོན་གྱི་བྱ་སྤྱོད་དང་མཚོན་ཆ་དངོས་བེད་སྤྱད་ནས་དམག་དོན་སྦྱོང་བརྡར་བྱེད་བཞིན་པར་ཉེན་བརྡ་བཏང་ཡོད་པ་དང་། རྒྱ་ནག་གི་དམག་དཔུང་གིས་ཐེ་ཝན་མཚོ་ཁུལ་གྱི་ཉེ་འགྲམ་དུ་དམག་དོན་སྦྱོང་བརྡར་བྱེད་བཞིན་པ་ནི་ཁྲིམས་མཐུན་ཡིན་ལུགས་བཤད་ནས་མུ་མཐུད་དུ་དམག་དོན་སྦྱོང་བརྡར་བྱས་ཡོད་པ་རེད། དམག་དོན་སྦྱོང་བརྡར་དེའི་གོང་རྒྱ་ནག་གཞུང་གིས་ཞི་བདེ་རྒྱ་མཚོའི་ཁུལ་དུ་རྒྱུན་དུ་མཐོང་དཀོན་པའི་གླིང་ཕྲན་བར་སྙོབ་ཐུབ་པའི་མེ་ཤུགས་འཕུར་འདེལ་ཞིག་ལ་ཚོད་ལྟ་བྱས་ཡོད་འདུག

གསར་འགོད་པ། འཆི་མེད།
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།