མཁས་པའི་བགྲོ་གླེང་།
2013.09.26
༄༅། །བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་ཐོག་བཞུགས་སྒར་ཕོ་བྲང་དུ་འཛམ་གླིང་གི་ནང་པའི་མཁས་པ་༢༥ལྷག་མཉམ་ཞུགས་གནང་བའི་བགྲོ་གླེང་ལྷན་ཚོགས་ཤིག་ཕྱི་ཚེས་༢༣ནས་༢༥བར་ཉིན་གྲངས་གསུམ་རིང་གནང་འདུག དཔེ་དེབ་རྩོམ་སྒྲིག་ཚོགས་ཆུང་གི་ཚོགས་གཙོ་རྣམ་རྒྱལ་གྲྭ་ཚང་གི་མཁན་པོ་ ཁྲོམ་ཐོག་རིན་པོ་ཆེ་མཆོག་གིས་གསུང་ན། དཔེ་དེབ་འདི་ནི་ལོ་ངོ་གསུམ་རིང་གདན་ས་ཆེན་པོ་ཁག་གི་དགེ་བཤེས་བདུན་ཅུ་ལྷག་གིས་དཔྱད་ཞིབ་གནང་སྟེ་ཕྱོགས་སྒྲིག་ཞུས་རྗེས་ མཁས་དབང་དྲུག་ལས་གྲུབ་པའི་ལག་བསྟར་རྩོམ་སྒྲིག་ཚོགས་པས་རྩོམ་སྒྲིག་གནང་བའི་དཔེ་དེབ་པོད་གཉིས་ཡོད་སྐོར་གསུངས་འདུག པོད་དང་པོ་ནི་ཤེས་བྱ་ཡུལ་གྱི་སྐོར་དང་། པོད་གཉིས་པ་ཡུལ་ཅན་ཤེས་པ་བཅས་ཀྱི་སྐོར་ཡིན་པ་རེད། དཔེ་དེབ་འདི་ནི་ཆོས་ལུགས་ཤིག་ལ་དད་པ་ཡོད་མེད་ཀྱི་གནད་དོན་ཞིག་མིན་པར་ ལོ་ངོ་སྟོང་ཕྲག་གི་རིང་ལ་རྩོད་སྒྲུབ་ཀྱི་རྣམ་དཔྱོད་ལས་གྲུབ་པའི་ནང་སེམས་ཁམས་ཀྱི་མཚན་ཉིད་རིག་པའི་དཔེ་དེབ་ཞིག་ཡིན་པ་དང༌། སངས་རྒྱས་ཆོས་ལུགས་ཀྱི་ནང་དུ་འཁོད་པའི་ནང་སེམས་ཁམས་མཚན་ཉིད་རིགས་པའི་སྐོར་གྱི་དཔེ་དེབ་དེ་འཛམ་གླིང་གི་སྐད་རིགས་མི་འདྲ་བ་ཉི་ཤུ་ལྷག་ནང་བསྒྱུར་ནས་མིའི་རིགས་ཀྱི་སེམས་ཁམས་མཚན་ཉིད་རིག་པའི་སྟོང་ཆ་ཞིག་སྐོང་ཐུབ་པའི་རེ་བ་དང་ཡིད་ཆེས་གནང་གི་ཡོད་འདུག།