རྒྱ་གཞུང་གི་དྲག་གནོན་སྲིད་བྱུས་ལ་བོད་མིའི་ཚེ་སྲོག་གི་འབོད་སྒྲའི་དཔེ་དེབ།
2018.06.15
རྒྱ་གཞུང་གི་དྲག་གནོན་སྲིད་བྱུས་ལ་བོད་མིའི་ཚེ་སྲོག་གི་འབོད་སྒྲ་ཞེས་པའི་དཔེ་དེབ་ཅིག་བོད་མི་མང་སྤྱི་འཐུས་ལྷན་ཚོགས་ནས་འགྲེམས་སྤེལ་བྱས་འདུག
དེ་ཡང་ཟླ་ ༦ ཚེས་ ༡༤ ཉིན། བོད་མི་མང་སྤྱི་འཐུས་ལྷན་ཚོགས་ནས་བོད་ཡིག་དང་། དབྱིན་ཡིག རྒྱ་ཡིག་བཅས་སྐད་ཡིག་གསུམ་ཐོག༼རྒྱ་གཞུང་གི་དྲག་གནོན་སྲིད་བྱུས་ལ་བོད་མིའི་ཚེ་སྲོག་གི་འབོད་སྒྲ། ༽ ཞེས་པའི་དཔེ་དེབ་ཅིག་དཔར་བསྐྲུན་འགྲེམས་སྤེལ་ཞུས་ཡོད་པའི་ནང་།
༢༠༠༩ ཟླ་ ༢ ཚེས་ ༢༧ ནས་ཕྱི་ལོ་ ༢༠༡༨ ཟླ་ ༣ ཚེས་ ༧ བར་བོད་ནང་དུ་རང་ལུས་མེར་བསྲེགས་གནང་མཁན་བོད་མི་གྲངས་༡༥༢ བྱུང་བ་རྣམས་ཀྱི་མཚན་དང་ལོ་དུས་དང་། ཁོང་རྣམས་ཀྱིས་བཞག་པའི་ཞལ་ཆེམས་ཕྱོགས་བསྡུས། རྒྱ་གཞུང་གིས་བོད་ནང་འཛིན་པའི་སྲིད་བྱུས་དང་དེའི་རྗེས་འབྲས་བོད་ཀྱི་རིག་གཞུང་རྩ་གཏོར། བོད་ཀྱི་ཁོར་ཡུག་གཏོར་བཅོམ། དྲག་གནོན་འོག་གི་ཞི་རྒོལ། རྒྱ་དམག་གིས་བོད་མིར་དྲག་གནོན། རྒྱ་གཞུང་གིས་བོད་ཐོག་དམག་གྲབས་བཅས་འཁོད་པ་རེད།
དཔེ་དེབ་དེའི་སྐོར་ལ་བོད་མི་མང་སྤྱི་འཐུས་ལྷན་ཚོགས་ནས་གནས་ཚུལ་སྤེལ་ཡོད་པའི་ནང་། བོད་རྒྱལ་ཁབ་དང་མི་རིགས། རིག་གཞུང་གི་ཆེད་དུ་རང་ལུས་མེར་བསྲེགས་གནང་མཁན་རྣམས་གཙོ་བོར་གྱུར་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་ལྷག་བསམ་དང་སྙིང་སྟོབས་ནི། བོད་མི་རྣམས་ཀྱིས་དུས་ནམ་ཡང་བརྗེད་ཐབས་མེད་པར་བརྟེན། གུས་བརྩི་དང་བཅས་བོད་མི་མང་སྤྱི་འཐུས་ལྷན་ཚོགས་རིམ་པའི་ནང་གདུང་སེམས་མཉམ་སྐྱེད་ཀྱི་གྲོས་ཆོད་རིམ་པར་བཞག་ནས་རྗེས་དྲན་ཞུས་ཡོད་ལ། དེ་བཞིན་ང་ཚོས་རྒྱལ་གཅེས་པ་ཚོའི་མགྲིན་ཚབ་བྱས་ཏེ་རྒྱལ་སྤྱིའི་ཐོག་ཁོང་རྣམ་པའི་ལོ་རྒྱུས་བརྒྱུད་བསྒྲགས་བྱ་རྒྱུ་ནི་ལྡོག་ཐབས་མེད་པའི་འོས་འགན་ཞིག་ཡིན་ཞེས་བཀོད་འདུག།
གསར་འགོད་པ་སྐལ་བཟང་སྒྲོལ་མ།